I è tocjât di di rapresentâ la Fondazione Friuli pe prime volte tant che president ae Scuele superiôr de Universitât di Udin, cuant che sul finî dal mês di Mai e à viert lis puartis dal sflandorôs palaç di Toppo Wasserman par fâ cognossi cheste realtât di alte formazion ai fantats che a decidin di studiâ te Universitât dal Friûl.
Un inviament di presidence dal ent che lu à elet tal 25esim de fondazion, ai 15 di Mai, forsit no casuâl, tant che Giuseppe Morandini – bielzà president des Pmi in Confindustrie nazionâl e dal 2010 fintremai ai prins di Mai di chest an president de Casse dal sparagn Fvg – al à dit: «Us siguri che cheste jentrade no le dismentearai. Al è come che mi disès: sta atent, che tu âs simpri ce imparâ». Cun di fat, ae “Supe”, come che le clamin i universitaris che a àn rivât a superâ il seletîf concors par jentrâ (20 puescj ad an cun concorints di dute Italie), a pontin chei che a àn capît che, come che al à dit Morandini «nol baste plui jessi brâfs, tocje jessi i miôr, I unics. Cussì i tocje ancje aes aziendis – al à zontât -: par jessi competitîfs vuê tocje jessi unics tai prodots e te cualitât, e par zonte jessi svelt e savê lavorâ dutune in aziende». Par chest, ai zovins che a jerin rivâts a scoltâ al à marcât: «Se o decidês di provâ a jentrâ chenti, o fasês une sielte coragjose, ma che te vite e paie».
Une presince no a câs chê dal president de Fondazione Friuli in cheste realtât, par vie che come che al à ricuardât Morandini, «la ‘s’ di scuele tal alfabet e je in 17e posizion”. Invezit, tai impegns e tai invistiments de Fondazion “e je ai prins puescj”, al à dit lassant intindi di volê continuâ, une idee dal so predecessôr, Lionello D’Agostini, che “tant si è dât da fâ par che la zoventût e vedi in Friûl i miôr imprescj par fâsi il so doman». Ai 15 di Mai, l’orghin di indreçament de Fondazione Friuli – componût di 24 di lôr, espression di plusôrs ents e sociis dai teritoris de provincie di Udin e di Pordenon – e à elet il gnûf consei di aministrazion de Fondazion che, subit daspò, al à individuât in Morandini il so president, figure gnove dopo i doi mandâts di D’Agostini. Ancje il Consei al è scuasit dal dut gnûf, fale pal so vice president, il pordenonês Gianfranco Favaro. Tra lui e Morandini, sul finî dal mês di Avrîl e je stade une contese, tant che ai 28 di chel mês no si rivà a cjatâ la fate pal president, par vie che a jerin dôs listis che si contindevin la presidence e i puescj in Consei.
Un fat che al à fat scjas, stant che in 25 agns di vite de Fondazion no si veve mai vût un câs dal gjenar. In plui di cualchidun al à viodût in cheste creture une continuazion de lote tra il Friûl di ca e di là de Aghe che si sta regjistrant in diferents ambients. Tal câs de Fondazion, però, i diplomatics si son metûts in vore e a son rivâts a tiessi la unitât in dôs setemanis: Morandini president, Favaro vice. E vice vicjari Flavia Brunetta, espression dal Comun di Udin. Chei altris components dal consei a son: Piero Cappelletti, Maurizio Cini, Barbara Camparetti, Sergio Dell’Anna, Edgarda Fiorini e Flavio Pressacco. Confermât il coleç sindacâl: Lucia Pippan (president), Alberto Cimolai e Gian Luigi Romanin. Sindics suplents: Giovanna Nadali e Giorgio Zerio.
Tal rinovâ i incarics «e je stade esprimude ae unanimitât la volontât di continuâ lis azions scomençadis cu la aministrazion di prin», sedi in riferiment ai valôrs, «unitât, operositât, sobrietât e rigôr morâl», sedi de mission, che e reste orientade «ae scolte des buliduris e des esigjencis de coletivitât, par stiçâ la coesion sociâl e il sens di partignince a une comunitât, infuartî il procès di svilup teritoriâl e fâ sù un progjet di benstâ sociâl», al à dit D’Agostini saludant. ❚
✒ Antonella Lanfrit
______________________________________________________
I numars de Fondazion e il futûr pal president
Tal ultin an, la Fondazione Friuli e à dât al teritori di riferiment – chel des provinciis di Udin e Pordenon – 7 milions, dant la poie a 451 progjets. Une azion che a permetût di movimentâ, in gracie de compartecipazion dai diferents sogjets interessâts, 27,5 milions di euros. In 25 agns i progjets finanziâts a son stâts 18mil, par 157 milions. Di ducj chescj bêçs, 10 milions a son lâts al volontariât e 9,350 milions tai ultins dîs agns a àn supuartât la didatiche, la ricercje e la internazionalizazion de Universitât. «O ai cjatade une grande realtât, in gracie dal badiâl e cualificât lavôr di Lionello D’Agostini cui siei colaboradôrs, int preparade e motivade, e une istituzion cussiente di jessi al servizi dal so teritori, pronte a scoltâ lis esigjencis e a voltâlis in ideis gnovis, a cjapâ sù lis disfidis che a coventin par fâlu cressi», al à dit a La Patrie dal Friûl il gnûf president, Giuseppe Morandini. «O intint duncje di seguitâ su chest troi, par puartâ indevant cun impegn e condurance chê preziose vore di rêt e di relazions cu lis istituzions, associazions, ents locâi e fameis metude sù par favorî il svilup dal teritori». (A.L.) ❚
