Sfuei Mensîl Furlan Indipendent
Archivi de Patrie

Gibelli: «No son bêçs pal teatri furlan». Ma pai teatris di Triest a ‘nd è simpri

............

E intant in Europe lis esperiencis in lenghe minoritarie a son vivarosis

La buine gnove e je che finalmentri si è pardabon inviât il procès di costituzion di un Teatri stabil par furlan: chê mancul buine e je che i nemîs zurâts de marilenghe a son za pronts a copâlu inte scune. Par fâlu a vegnin dopradis obiezions che a son – come dispès al capite – une vore ingjanosis, a imbroin lis cjartis e a tindin a disorientâ la int. E alore al è miôr fâ un pocje di clarece su chest teme.

Il gnûf ent al sarà gjestît di une Associazion che il Consei comunâl di Udin al à aprovât ae fin di Jugn. A imbastî cheste gnove realtât si son metûts dongje il Comun di Udin, il Teatro Nuovo Giovanni da Udine, la Agjenzie Regjonâl pe Lenghe Furlane, la Societât Filologjiche Furlane, l’Istitût Ladin Furlan “Pre Checo Placerean”, il Css Teatri stabil di inovazion dal Friûl-Vignesie Julie e la Academie Nico Pepe. Une operazion fate ben, cun timps e obietîfs ben clârs, ambiziôs, ma no fats sù tai nûi. Come che si podeve spietâsi, a colp si è dismot il front dai contraris: in aule al à votât cuintri dome l’ex assessôr ae culture di Furio Honsell, Federico Pirone, ma la vere oposizion e je vignude di plui lontan, di chel ent che ae fin al varès di finanziâ in buine part la ativitât dal Teatri, ven a stâi la Regjon. La assessore ae culture Tiziana Gibelli e à spesseât a fâ savê che – come che a disin a Triest – «No se pol»: «par metilu in pîts di fat – e à dite – a coventaressin masse bêçs. E cumò la Regjon no ju à».

Ce straçons chescj furlans che a vuelin ancje un lôr Teatri a spesis de int! Ma trops sono chescj finanziaments che a varessin di jessi doprâts? Intal plan economic e finanziari si fevele di 1 milion 165 mil euros in dut pai prins trê agns, e po di 595 mil euros par ogni an cuant che la struture e larà a regjim. No son lontans i timps indulà che la Regjon e leve a cuvierzi cence fastidis e cence fâ compliments i 14 milions di euros di buse dal Teatri liric di Triest. Cumò, invezit, tirâ fûr di sachete un milionut in trê agns al devente impensabil: pôc al conte che i dirits linguistics dai furlans no sedin rispietâts, e che la cifre e sedi ridicule par une Regjon che e à un belanç di 3 miliarts e mieç. La assessore e somee no cognossi (e no je la uniche) lis previsions de Costituzion taliane (art. 6 e 3), la leç 482/99, la leç 29/2007 de stesse Regjon che i paie il stipendi e ancje i tratâts internazionâi (prin di ducj la Cjarte europeane des lenghis regjonâls o minoritariis) che a tutelin ancje la minorance linguistiche furlane.

Un Teatri stabil al sarès fondamentâl par fâ cressi il status de lenghe furlane e par dâ continuitât a une produzion teatrâl professionâl in marilenghe. La garanzie di une produzion di cualitât alte e pues di fat vignî dome di une istituzion dal gjenar: une struture di produzion che e lavori dilunc dal timp, sul model di chês che a son lis minorancis europeanis numerosis tant che i furlans.

Il teatri in lenghe minoritarie in Europe al è di fat vivarôs: a son tancj i esemplis di comunitâts che a àn decidût di scometi su cheste forme di art, ricognossint in maniere formâl ents di produzion. Cualchidune e à sielzût la forme dal Teatri stabil, altris a àn creât imprescj ad hoc par promovi la produzion culturâl e la difusion dai lavôrs teatrâi. Al pues jessi util fâ cualchi esempli par capî miôr la situazion des minorancis in Europe.

Sedi in Gales che in Catalogne o cjatìn teatris nazionâi: il Theatr Genedlaethol Cymru fondât tal 2003, e il Teatro Nacional de Catalunya, fondât zaromai tal 1996. Ducj i doi, in plui che produsi e meti in sene spetacui, a proponin une schirie di ativitâts colaterâls: programs educatîfs e sociâi pes scuelis, programs pe inclusion sociâl, programs di aprendiment de lenghe e in lenghe.

Tal Paîs Basc a son un grum di associazions governativis par promovi la culture basche, ma une des plui ativis e je Sarea, la rêt basche dai teatris nassude tal 1993. Un ent a caratar interistituzionâl metût dongje dal Dipartiment culture dal Guvier centrâl, des Diputaciones Forales e des aministrazions comunâls.

In Galizie, la Consellería de Cultura da Xunta de Galicia e à costituît tal 2008, cuntune leç di pueste, la Axencia Galega das Industrias Culturais (AGADIC). E je une realtât publiche che e covente a promovi e rindi plui salt e fuart il tiessût imprenditoriâl tal setôr culturâl galego.

Ancje i frisons a àn un lôr panorame teatrâl dut particolâr, cuntune compagnie professionâl clamade Tryater, che e à sede a Leuwaarden, capitâl de Frisie olandese. La compagnie e gjolt di un sussidi finanziari di bande dal Stât e e je inseride intal cussì clamât BIS (Sociocultural Basic Infrastructure). Ma nol è dut: a son ancje clapis volontaris clamadis “Iepenloftspullen” (open air theatre) che a fasin spetacui ducj par frison. E ancje la piçulissime minorance frisone intal Schleswig-Holstein (Gjermanie) e à une compagnie semi professionâl clamade Teooter, che e recite cui sottitui par todesc e cussì e jemple i teatris di chel Land.

Ancje i sami a àn la lôr realtât teatrâl no dome in Finlande, ma ancje in Norvegje dulà che al esist Beaivvas, teatri nazionalitari di cheste minorance che e conte cuasi 40 mil personis. Al funzione une vore ben ancje il Deutsch-Sorbisches Volkstheater che al è logât inte citât di Bautzen in Sassonie: e je la istituzion culturâl principâl de minorance serbo-lusazie, che e fevele la lenghe sorbe, espression di une comunitât stimade in 12 mil personis. Particolâr un grum significatîf al è che il plui grant leterât de lenghe sorbe al reste un predi de fin dal Votcent, Jakub Bart, che al à scrit ancje un bon numar di oparis pal teatri.

E chenti? O vin ducj sot dai voi la situazion dai teatris di cheste regjon, a partî dal Teatri Sloven che ogni an al dopre 739 mil euros di fonts publics: e in chest câs il dirit de minorance nol ven metût par nuie in discussion. Ma ce che al fâs pensâ al è il scuilibri teritoriâl des risorsis publichis che in Friûl-Vignesie Julie a vegnin spindudis in chest setôr. Pal teatri si metin 22 milions di euros ogni an: di chescj, plui di 17 a van ai teatris di Triest. Il Teatro Verdi di bessôl al glot 12 milions e mieç ad an, il Rossetti 2 e mieç, La Contrada 1 e il Miela 460 mil euros. Zontant ancje i bêçs pal Teatri Sloven si rive al 77,88% di ducj i finanziaments sul teatri che a cjapin la strade di Triest. I fruçons ur tocjin a chei altris. In provincie di Udin al rive dome il 10,92% dai contribûts: si spindin 2 milions e 400 mil euros in dut (mancul che pal Rossetti, secont teatri di Triest): metât a van al Css, 900 mil al Giovanni da Udine, 160 mil ae Nico Pepe e 120 mil al Pasolini di Çarvignan. 1 milion e 600 mil a van a Gurize (al è il 7,3%), e dome 850 mil a rivin a Pordenon, che cul 3,87% al è l’ultin di ducj.

Cuant che si dîs che “no son bêçs pal teatri furlan” di bande dai aministradôrs de Regjon cheste e je une amission di colpe e un fal di mendâ: nol pues jessi un rimpin par no fâ nuie. A son tantis realtâts (dal Css ae Nico Pepe, de Associazion Teatrâl Furlane al Teatro Club cul Pali Studentesc) che a podaressin deventâ la anime di un gnûf resonament sul teatri in marilenghe. L’impuartant al è fâ lis robis cun grande cure e impegn, intal mût miôr: e evitâ i erôrs, che a son sot il voli di ducj, che a àn puartât al faliment de esperience de Farie Teatrâl Furlane pôcs agns indaûr. Bisugne jessi bogns di no ripetiju, parcè che i nemîs dal furlan no spietin altri. ❚


Walter Tomada

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +