Sfuei Mensîl Furlan Indipendent
Archivi de Patrie

Matilde Copetti, une furlane in puarte cul Napoli

Dree Venier

Interviste cul portîr furlan che al à vinçût il campionât
cu la scuadre dal Napoli. Anzit, une portiere: Matilde Copetti
e difint la puarte dal Napoli Femminile, la scuadre feminine
di balon de citât che e à a pene vinçût il campionât di B talian

No dome Alex Meret: i furlans in puarte des scuadris di Napoli a son in doi. La titulâr dal Napoli Femminile che e à vinçût il campionât di Serie B e je Matilde Copetti di San Denêl. Cressude te scuadre dal Tavagnà, cun Alex Meret e à in comun i colôrs di scuadre, la vitorie di un campionât e la stesse etât. Di fat, tes superiôrs a jerin ancje te stesse classe.
_
Matilde, cemût âstu scomençât a zuiâ di balon? Viodude la tô etât, o pensi che in chê volte il balon feminin nol fos cussì famôs tant che cumò.
Sì, di fat ancje jo no savevi nuie, dopo nol è che jo o ven di une famee che e praticave il balon: si jere dome tifôs tant che ducj. O ai scomençât a zuiâ dilunc des ricreazions a scuele cui miei compagns di classe, e magari parcè che o jeri une frute, mi disevin dispès di stâ in puarte. Lant indenant, mi disevin che o jeri brave, forsit par fâmi stâ li e no a zuiâ “fûr” (e rît ndr). Dut câs, o ai viodût che mi plaseve e o ai cjapât gust, e cussì o ai zuiât intes zovanîls a San Denêl cu lis scuadris dai masclis. Deventade plui grande o pensavi di molâ, ancje parcè che nol jere calcolât un sport di frutis, mi sintivi un pôc une bestie rare. A chel pont mi à incoragjât mê mame «se ti plâs, continue» mi à dit.
_
E cussì tu sês passade intes zovanîls dal Tavagnà.
Sì, mi àn fevelât di chê realtât che e veve une scuadre feminine, cussì o soi jentrade, e cressint o soi passade in prime scuadre tant che tierç portîr. In chê volte il Tavagnà al zuiave in serie A e tant che portîr titulâr e jere Marchitelli che e jere la miôr in Italie.
Intai agns dopo o soi cressude, e intal 2014-2015 o ai fat il gno debut tant che titulâr.
_
Dopo tu sês lade a Ravenna.
O volevi zuiâ cun plui continuitât e fâ esperience, e duncje mi soi trasferide li zuiant par trê stagjons in serie B.
_
In serie B e in gjenerâl intal balon feminin nol è il professionisim. Ce vuelial dî? Che ti dan dome un rimbors spesis?
Sì, ti dan un rimbors spesis, o a judin cul lozament, ma par mantignîti tu âs di vê un altri lavôr. Par esempli, jo a Ravenna o fasevi la rilevadore di presits pai supermarcjâts.
_ Po dopo tu sês lade al Lugano, inte serie A svuizare. Li il balon al è professionistic. Ce diference ise? La diference e je grande, tant che struturis e tant che alenaments: o vevin cjamps e palestris dedicadis a nô. Cun di plui tant che professionist tu âs une paie, e cun contribûts pensionistics regolârs. O soi lade tal forest sedi par svincolâmi dal Ravenna, se o restavi in Italie no rivavi, che par fâ une esperience di professioniste.
_
L’an dopo tu sês passade al Napoli, ma in serie B nol è il professionisim, cemût mai cheste sielte?
Il Napoli al è une scuadre ambiziose, duncje al da aes atletis un rimbors spesis che al è cuasi tant che une paie. Però in B, no podint jessi professioniscj, par esempli no tu âs i contribûts: il professionisim cumò al pues jessi dome in Serie A.
_
Une scuadre ambiziose sì, il Napoli: o vês vinçût il campionât.
Sì, e batint inte ultime partide propit il Tavagnà, li che o ai debutât. Al è stât un campionât lunc e combatût, e je propit une grande sodisfazion.
_
Âstu un zuiadôr preferît, un to mît, un model, sedi dal pont di viste di ispirazion che tecnic pal to rûl?
A part l’Udin, che e je simpri tal cûr, mi plâs il Milan e in particolâr fin di piçule mi plaseve Kakà, al è simpri stât un idul par me. Come personaç che o ai supât tant, e je la Marchitelli che o disevi prime, che e zuiave tal Tavagnà. Viodile zuiâ e alenâsi al jere imparâ. Di portieris che a son cumò che mi plasin e je Camelia Ceasar de Rome.
_ O ai cjalât on line cualchidune des tôs intervistis video, ancje des tôs compagnis: pûr jessint no professionistis devant de telecjamare si esprimês cun snait di vêrs professioniscj. Une volte cui zuiadôrs nol jere cussì, isal cualchidun che us insegne cemût fâ ancje chest? No, nol è nissun che nus da lezions di comunicazion. Un pôc al dipent dal caratar, ma dut câs o pensi che in confront di gjenerazions di une volte nô o sin tant plui usadis a vê a ce fâ cui videos, sedi a viodiju che a fâju.
_
Cumò in cjamp masculin e je une gjenerazion di portîrs furlans fuarts pardabon numerose. Di ce dipendial?
Par me un pôc ancje dal caratar furlan (e rît, ndr): il portîr al somee che propit al vedi lis carateristichis de nestre int, un pôc solitari e grant lavoradôr. Purpûr un numar tant grant, i portîrs brâfs no puedin jessi un câs e al va dât bon at ai preparadôrs de Udinese di jessi grancj professioniscj: tancj a son vignûts di li e no je une robe che e pues jessi un câs.
_
In cjamp feminin nol è cussì.
No, pal moment no je une gjenerazion paragonabile.
_
A proposit di portîrs furlans, al di là di zuiâ inte stesse citât, cun Alex Meret o vês in comun la etât e fintremai o jeris in classe insiemi tes superiôrs.
Sì, o jerin in classe insiemi al liceu, in prime e al seconde dal Copernic. Si scambiavin opinions ancje sul balon. Alex al è stât simpri tant scrupulôs e un grant lavoradôr ancje a scuele. Al principi di cheste stagjon, cuant che o soi stade trasferide al Napoli mi à fat i compliments e un incoragjament sui social. Magari cussì no, par ducj i nestris impegns al moment chi ancjemò no sin rivâts a viodisi.
_
Tu âstu pensât za a ce che tu fasarâs dopo de cariere sportive?
No in maniere precise, ma o soi daûr a fâ ancje la universitât, cuant che il timp mal permet: o studi Siencis de comunicazion e mi plasarès lavorâ in chel cjamp. In particolâr o soi inmagade dal mont de publicitât.
_
Zirâ la Italie e lâ tal forest di tant zovine isal stât dificil? Ce esperience ise?
I miei a un ciert pont si son trasferîts tal forest cuant che o jeri piçule. Jo o stevi za frecuentant lis zovanîls dal Tavagnà e duncje o soi restade in Italie, a viodevin di me lis agnis e i parincj. Chest mi à judât inte mê indipendence, duncje il fat di stâ bessole cuant che dopo o soi lade fûr dal Friûl no mi à pesât tant. Lâ fûr e je stade une biele esperience: jo o ai vivût simpri in paîs e in campagne, duncje o ai podût cognossi realtât diviersis ad implen tant che par esempli lis citâts cun dutis lis lôr oportunitâts e problemis.
__
Inte cariere e zirant pal mont ti aial judât jessi furlane? Âstu notât carateristichis particolârs che o vin in confront di chei altris puescj?
Forsit, rispiet al Friûl, in cierts lûcs o ai notât plui viertidure, cualchi volte nô sul imprin o sin un pôc “duruts”. O ai puartât ator la nestre atitudin ae serietât intal lavôr che mi è stade ricognossude simpri. No ai notât che a vessin opinions particolârs su di nô, parcè che a dîle dute… il Friûl nol è cognossût. E cussì o ai vût mût di fâ cognossi jo a lôr la nestre tiere. ❚

……………………………………………………………………….

FOCUS. Tavagnà, une storie gloriose che cumò e clope un tic

La Associazione Sportiva Dilettantistica Unione Polisportiva Comunale Tavagnacco, plui cognossude tant che Tavagnacco, e je stade fondade intal 1989, e e à otignût risultâts siôrs tal balon feminin.
◆ E à zuiât intal campionât di Serie A, rivant ancje seconde in campionât e duncje partecipant a competizions internazionâls par club. E à vinçût par dôs edizions consecutivis la Cope Italie di balon feminin.
◆ La societât e gjestìs une scuele di balon par insegnâ i principis dal sport fin de prime etât e par inviâ lis fantatis ai campionâts zovanii.
◆ Chest an la scuadre e zuiave il campionât di Serie B là che, magari cussì no, e je rivade tierçultime, cessant indaûr in C. O volìn fâur un grant auguri di podê tornâ ai fascj antîcs di un timp. Fuarce Tavagnà. ❚

…………………………………………………………………….

LINK & LEAMS

Si pues vê notiziis su la cariere di Matilde lant su Wikipedia, li che e je une sô pagjine al link https://it.wikipedia.org/wiki/Matilde_Copetti

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +