FURLANS, DIGJITAIT FURLAN. Un portâl pe nestre Bibie

Ai 27 di Mai il teatri Gjovanin di Udin al ospitarà l’event “Bibie par un Popul”, metût in pîts di Glesie Furlane cul jutori de ARLeF e in colaborazion cu la Arcidiocesi di Udin e la Provincie di Udin (viôt ancje a pagjine 29). Vie pe serade al vignarà presentât ancje un gnûf portâl che al rindarà dispunibile sei il test sacri che la storiche leture contine de Bibie par furlan, davuelte l’an passât li dal Oratori de Puritât di Udin. La struture dal sît e je une vore direte: si puedarà sgarfâ i libris che a componin la Bibie un par un viodint il test e/o cjalant la regjistrazion video cu la leture. Navigant dentri dal sît si pues cjatâ fûr duncje il propri non e il propri test, une biele sodisfazion par chei che a àn vût la fortune e il plasè di partecipâ a chel storic event. Lant indenant o vin une pagjine di informazions su la Bibie e su la leture continue, une galerie di fotografiis e un spazi di rassegne stampe. La grafiche, realizade dal nestri grafic Pier Antonio Zanini cul disvilup tecnic di Andrea Musi, e je une vore biele, il sfont al è di un simbolic colôr aur: la tinte che ta lis iconis al ven doprât par rapresentâ un spazi che nol aparten al mont teren e ancje un materiâl che pai ebreus al aparten a la divinitât. In zonte a chest articul a cjatais in anteprime une imagjin da la pagjine la pagjine di benvignût al sît, dulà che si pues viodi une miniature cjapade dal antîc Salteri di S. Elisabetta conservât al Museo di Cividât.
Il sît dut câs al sarà in funzion dai 27 di Mai ae direzion www.bibie.org.
Par intant si puedin za viodi i filmâts de regjistrazion de leture continue sul canal YouTube di Glesie Furlane, ae direzion www.youtube.com/user/BibieGlesieFurlane.■
Michele Calligaris