Sfuei Mensîl Furlan Indipendent
Archivi de Patrie

AUSTRIE. La glesie catoliche e comemore i slovens parâts fûr de Carinzie

............

Tal 1941, su ordin di Heinrich Himmler, in paralêl cul trasferiment di fameis de Val Cjanâl –  ancje chês dispès slovenis – in Carinzie, e je tacade ai 14 Avrîl dal 1942 tal teritori bilengâl la deportazion di cirche 300 fameis contadinis slovenis. Tes primis oris de buinore, i camions a son rivâts e tal zîr di une ore lis personis, a sorprese e in maniere imediade, a son stadis costretis a lassâ la lôr patrie; propit un traume pe int contadine che no jere usade a lassâ la tiere e i siei cjamps.
In ocasion dal setantesin aniversari de espulsion, la television austriache statâl ORF e à ricuardât i events di chel timp cui doi films documentaris “Vertrieben als Slowenen” e “Schatten des Leids”, dulà che testemonis a fevelin de lôr storie personâl.
I documents a mostrin ancje il mecanisim psicologjic: pes vitimis, la pôre di jessi depuartâts e je durade par une vore di timp ancje tal periodi dal dopovuere; in consecuence, a volevin dismenteâ il passât e lis lôr lidrîs. I psicolics a fevelin chi di une identificazion cul agressôr. Magari cussì no, za la gjenerazion dai fîs e vuê chê dai nevôts dispès no fevelin plui il sloven.
Memoreazion bilengâl te Catedrâl di Clanfurt_ Cuntune messe bilengâl in lenghe slovene e todescje, la glesie catoliche in Carinzie e à memoreât la deportazion dai slovens carinzians di setante agns fa. “No vin di finî di fevelâ de storie di un popul”, al à visât il vescul diocesan Alois Schwarz te memoreazion te Catedrâl di Clanfurt. I pinsîrs e la memorie a son necessaris par iluminâ la ment, par evitâ che il passât al deventi teren di culture di violence, svindic e di gnovis vueris”, al à dit il vescul. Tal stes timp, al à domandât perdon aes vitimis ancje in non de glesie, criticant chei rapresentants che no àn dade simpri la atenzion necessarie aes soferencis des vitimis.
Presint ancje la gnove ministre pai slovens tal forest Ljudmila Novak, che tal so intervent e à rimarcade la presince di diviers mioraments in Carinzie e la necessitât di costruî propit su chest. E à dit ancje che i slovens carinzians a àn patît umiliazions pe lôr lenghe.
In cualitât di unic rapresentant uficiâl de politiche austriache – a mancjavin rapresentants dal guvier carinzian e di chel di Viene –, e je vignude dome la componente dal Partît socialdemocratic in Parlament Christine Muttonen che e à marcât che il passât al à di jessi vuê «ricuart che al scuen ancje incoragjâ il procès di aprendiment, tant che orientament pal futûr.”
Lavôr fuarçât in Gjermanie e in Polonie_ Lis lôr cjasis a son stadis vendudis a agricultôrs de Val Cjanâl. La plui part dai depuartâts no je mai tornade in patrie. 1075 peronis a son stadis puartadis al pont di racuelte a Ebenthal: tra chês a jerin 500 fruts, cul plui zovin che al veve a pene 17 dîs. Pôcs paîs a son stâts sparagnâts: in dut il teritori bilengâl a puartavin vie ducj chei che a jerin acusâts “di no vê voie di assimilâsi”. Par 917 che a son stâts uficialmentri acusâts di jessi “nemîs di stât”, il viaç al è lât indenant doi dîs dopo in trens speciâi par centenârs di chilometris viers nord, intal “vieri Reich”, dongje Norimberghe e in Polonie.
Secont la storiche Brigitte Entner (http://www.brigitte-entner.net) che e à publicât diviers studis su la storie resinte de minorance slovene, chei lager a jerin controlâts des unitâts de SA: pai fruts nol jere permetût nissun gjenar di istruzion e di formazion, e chei che a vevin plui di 15 agns a jerin inviâts al lavôr fuarçât.
Gjermanizazion dal teritori sloven_ 224 agricultôrs de Val Cjanâl a son stâts puartâts in Carinzie par colonizâ il teritori lassât dai slovens: gjermanizazion dal sisteme nazist di “completece”, dome cul unic probleme che ancje i colonizadôrs de Val Cjanâl a jerin dispès ancje lôr slovens.
Daûr la storiche Entner, za prime dal “Anschluss” de Austrie, il Kärntner Heimatbund al faseve indagjins su cui che tra i slovens al jere “pericolôs”, val a dî che al veve cussience nazionâl slovene. Chescj elencs za pronts a son stâts mandâts ae autoritât naziste.
L’obietîf al è stât la gjermanizazion totâl dal teritori abitât dai slovens. Himmler si insumive di impastanâ une gnove “Carinzie” in Ucraine, dulà che al voleve depuartâ ancjemò plui di 50.000 personis. Par furtune, il teritori predeterminât in Ucraine – Rostov e Harkov – al è stât liberât de Armade Rosse.
Murî tal forest_ Scuasit il 100% dai slovens carinzians puartâts vie nol à mai plui viodude la sô patrie. Par chei altris, tornâts dopo la vuere, al è tacât un traume: dispès a son passâts mês e agns che i lôr bens a son stâts tornâts. Viodût che i responsabii pal ripristinament des proprietâts a jerin i stes funzionaris ex naziscj, la plui part de int e veve di contentâsi dome di une part di chel che e veve lassât indaûr.
La Associazion dai depuartâts slovens_ Za tal esili, vie pe seconde vuere mondiâl, i slovens carinzians a àn decidût di mantignî un ricuart di chei timps, e tornâts in patrie a àn costituide “La Associazion dai depuartâts slovens” (http://www.slo.at/izseljenci). ■
JANEZ ERAT

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +