FURLANS, DIGJITAIT FURLAN – E-MARILENGHE. La Filologjiche e je filo-internet

La Societât Filogjiche Furlane e fo une des primis barcjis furlanis a navigâ su la Rêt e, in dì di vuê, stant il grant rûl istituzionâl che cheste associazion e ten te culture e siencis furlanis e reste un dai sîts par dulà che no si pues lassâ di passâ. Il sît si pues sgarfâlu sei par furlan che par talian, l’unic difiet che o vin cjatât e je la presince di cualchi informazion sorpassade su cualchi pagjine. Il sît al à une atmosfere semplice ma funzionâl, salacor parcè che no à mai viodût grancj intervents su la grafiche, ma ancje cence i “bebeis” dal web 2.0 nol puce di vecjo. Lis sezions a son tantis, ma no fevelarìn di chês elementârs. Su “Progjets” o vin lis descrizions e, in cualchi câs, i leams ai sîts esternis di chei lavôrs che la Filologjiche e à in pîts in chescj agns, par esempli il Dizionari Storic Furlan
(v. E-Marilenghe sul numar di Març) o l’Atlant Toponomastic dal Friûl – Vignesie Julie. Clicant su “Biblioteche” o rivìn al catalic bibliotecari de S.F.F. che al è a dispozion des ricercjis dai utents traviers il sît. Fracant invezit su “Publicazions” o rivìn intune librarie online dulà che si puedin comprâ lis oparis dadis fûr de Societât cun presits speciâi pai socis. Insome, vôts positîfs!
Michele Calligaris