Vêso decidût di vierzi un blog in lenghe furlane par contâ di une vuestre passion, i fats dal Friûl, i fats vuestris, o juste par butâ jù alc par passion de marilenghe? Benon, nuie di miôr secont nô di “Furlans digjitait furlan”: o provarês la magjie di un vuestris scrit che al podarà jessi let li di cualsisei bande che al sedi un colegament Internet e o jentrarês in contat cun int cu la stesse passion. E cuant che cence savê o inviarês un “flame” (peraule par inglês compagne al furlan – flame – che al sta a indicâ un scrit che al scjadene une grande discussion), magari cualchi gjornâl si inacuarzarà di voaltris e o varês i vuestris 15 minûts di glorie. Dut cuntun piçul sfuarç: une tastiere, une iscrizion a un servizi gratis di blog (Blogspot.com, WordPress.com, Splinder.com) e cualchi minût par scrivi. Al samee dut facil e biel, insumis, ma… Al è un “ma”, un pericul che si plate tes pleis de rêt des rêts: il troll de lenghe!
LA DEFINIZION_ Il troll, come che si dîs tal mont digjitâl, al è un sogjet che al interagjìs cui altris utents cun messaçs provocatoris, fûr tema o cence sintiment, finint par infastidî chei altris. Il tiermin al ven fûr di une creature de mitologjie nordiche, il troll, di forme umanoide, innomenade pal so compuartament trist o fastidiôs. Se o vessin di pensâlu furlan si podarès clamâlu “maçarêt” dal Maçarot, un des creaduris de mitologjie furlane plui matarane e fastidiose.
IL TROLL DE LENGHE_ Cui isal alore chest “troll de lenghe” o “maçarêt”? Ma sì, chel che ti vignarà a comentâ sul to blog disint che no tu scrivis just, che no tu seguissis la grafie uficiâl, che chê peraule no je tal furlan standard ma intune variant, e vie indevant. Un compuartament che nol à nissun sens tal mont mudabil di Internet, li che un scrit al è simpri in evoluzion, e massime pal furlan, dulà che nissun ti à insegnât a scrivi e duncje l’erôr al è no râr, ma sigûr. Cul risultât che un si bute jù e al lasse pierdi dut: al è za brâf a vê voie di metisi a scrivi in marilenghe (tant plui faturôs che a fevelâlu cence la scuele) e se ancje tu cjatis un che ti romp lis scjatulis cui tal fasial fâ?
Nô us sburtìn a lâ indevant, parcè che par un troll che al sberle a son 50 letôrs cidins che a an plasê di gjoldisi alc par furlan (e fevelant di furlans, che si sa che no son int espansivone, la medie probabil e je ancje plui alte).
Cualchi consei, duncje, par difindisi di cheste peule.
1) Ignorâlu – Al è il consei tipic pai troll: par solit a molin dopo di un pôc. Tignît cont che il tipic troll de lenghe nol sa lui par prin lis regulis: par solit e je int sbalinade che e à une infarinadure juste par savênt alc plui di voaltris e sfogâsi di cualchi frustrazion.
2) Vonde creance – La “netiquette” (la “creance de rêt”) e disarès di no scancelâ par educazion i coments che ti fasin i letôrs. In chest câs sbombaitsi, se un al insist al è par prin lui cence creance: fracait sul scancele coment e vie, si stufarà anche prime de soluzion nr. 1.
CONCLUSION_ Visaitsi che cumò come cumò la lenghe furlane su Internet la jude no un blog scrit perfet, ma 100 blogs scrits cun passion, cun erôrs, cu la variant che si vûl, ma che a fasin pression par testemoneâ la voie di lenghe e duncje di vê biadelore une scuele che ti insegni a scrivi. Se dopo us ven il gust di podê scrivi miôr o fasarês un cors (e za cul scrivi o tacarês a miorâ).
No stait a fâsi frenâ, duncje, e scrivêt libars sui blog, come che al sucêt su Facebook. Difat, balinant pal “Muselibri” si viôt simpri plui int che e fevele par furlan cence stâ daûr a corezisi un cul altri. Parcè? Parcè che su FB si interagjìs nome se tu “dâs la amicizie”. E cui mai condividaressial la amicizie cuntun troll de lenghe?
Dree Venier
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +