Sfuei Mensîl Furlan Indipendent
Archivi de Patrie

Furlan a scuele: la peraule ai insegnants

............

A doi agns de sô efetive metude in vore, il furlan a scuele al gjolt la stagjon de verifiche e de auto analisi. Tal Setembar dal 2012, la marilenghe e jentrave in classe cuntun russac di 30 oris anuâls e i istitûts scolastics a vevin l’oblic di furnîlu ai arlêfs, che lis fameis lu domandavin. E parimentri, la Regjon e veve screât l’Elenc regjonâl pal reclutament dai docents. Il timp dal belanç e je une cunvigne organizade in Regjon: i stâts gjenerâi dal furlan a scuele, ai 9 di Setembar stâts. Matine tal auditorium di vie Sabbadini, dopomisdì in cuatri laboratoris di lavôr. Une clamade, cheste ultime de taule taronde, che sul imprin e veve tirât dongje 230 partecipants: ae fin si à dât acet dome a un centenâr di lôr, cu la intenzion dut câs di replicâ il moment di confront. Duncje, cuâl isal il stât des robis? Lu vin cirût di capî scoltant i docents.
😉
Sul imprin, cuant che dut al scomençà, la lagnance e fo sui materiâi. Aes scuelis che a inviavin in mût organic lis ativitâts par furlan, doi agns za fa, ur mancjavin dal dut i imprescj didatics. Probleme che vuê nol esist. E une soluzion eficace le à cjatade la ARLeF, la Agjenzie Regjonâl pe Lenghe Furlane. Une part dal gnûf sît (viodi ae vôs “multimedia”, e po dopo “fruts”) e à dentri une sdrume di materiâi: didatics, zûcs, storiis, contis cun liniis audio, libris, videos. Documents che pal plui a son complets e che si discjamin sore nuie. La sezion si indrece ancje ai gjenitôrs par che a puedin doprâle cui lôr fruts. Cun di plui, de ARLeF a invidin i insegnants ae condivision dai materiâi produsûts e ur domandin di mandâ i lôr prodots origjinâi par che si puedin inserî tal sît e po dopo rindiju trasferibii in classe. Prin di dut, però, e sta la professionalitât dai docents, a marcjin Enza Purino e Laura Urtamonti, dal IC di Feagne, che a àn presentât i curricola pal furlan (de infanzie aes mezanis) metûts in vore tes lôr scuelis (il librut si intitule “Dal curriculum al percors didatic”): “Un insegnament che al dopre plui lenghis al è un valôr zontât pe scuele e pai fruts. O vin dimostrât che midiant di colegaments lessicâi e cun elements di linguistiche comparade, al è pussibil insegnâ cualsisedi materie, doprant la lenghe in mût veicolâr”. Lis scuelis seriis a costruissin duncje i “curricola” (ven a stâi i programs di studi cun obietîfs, timp e contignûts) pe marilenghe.
😐
Ancjemò in strache la cuistion de organizazion intes scuelis. La ripartizion dai docents. Il probleme al è chel di “incjastrâ” l’insegnament e l’espert dentri di un plan orari za definît dal personâl in servizi. I dirigjents scolastics a domandin la disponibilitât tal ordin: prime ai insegnants che a lavorin intal stes istitût, po a chei de scuele de stesse rêt e infin cjapant des graduatoriis di circul o di istitût. Par ognidune, la cundizion e je la iscrizion al Elenc regjonâl. I docents za titolârs te classe di altris dissiplinis no son obleâts a insegnâlu. Si trate di une disponibilitât subietive. Il probleme al è che cui che al rive di difûr (espert esterni) al à di inserîsi dentri di un cuadri orari za formât e la flessibilitât dai docents des scuelis no si pues dal sigûr definî esemplâr. Personalisims, dinamichis che fûr no si cognossin, esigjencis personâls o di servizi a semein ostacui, prin di dut. E dispès i “esternis”, che a insegnin za di altris bandis, a rivin cuntun bloc orari pluitost rigjit, e duncje la prioritât e je completâ lis 40 oris. Po dopo, une notazion su lis variants: superade la viele polemiche dal rapuart cu la coinè, i docents a son deventâts cussients che i materiâi no puedis jessi scrits tes singulis varietâts de lenghe. Ognidun al cîr di doprâju pleantju ae variante dal puest indulà che al lavore. Il compromès al è che la variante e devente il mieç di comunicazion soredut pal orâl, su tescj consultâts che a son in coinè.
🙁
La criticitât plui evidente e je te za nomenade «Liste regjonâl dai insegnants cun competencis ricognossudis pal insegnament de lenghe furlane». Li dentri al è di dut e di plui: int che la lenghe no le sa propit, int che e rive di altris zonis di Italie e che purpûr di lavorâ e à fat un corsut di 20 oris di cualchi bande o che e à partecipât a cualchi progjet culturâl. Par slargjâ la platee dai docents, di tant in tant e ogni an, l’Elenc al ven tornât a vierzi e inzornât. E, di fat, nol covente masse par jentrâ: il regolament al domande esperiencis precedents di insegnament, documentazion grese e partecipazion a progjets: dute robe che … cui puedial controlâ che e sedi stade fate? E soredut: cui puedial atestâ che a sedin il spieli di une reâl competence glotodidatiche? Ciert, cu la aprovazion dal regolament dal “patentin” di bilinguisim e cuntun plan di formazion serie gjestît de Universitât dal Friûl, alc al cambiarà. Ma divuardi se lis gnovis misuris (comprendût un inzornament continui dai docents) no saran domandadis ancje a chei che za a son iscrits, in plui che ai gnûfs. La domande di une competence minime te lenghe e te sô didatiche e va a bracecuel cuntune professionalitât minime. Se no, il furlan a scuele al sarà ancjemò plui atacât di dutis lis bandis. ❚
✒ Oscar Puntel

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +