Sfuei Mensîl Furlan Indipendent
Archivi de Patrie

FRIÛL EUROPE. Plui lenghis, plui Europe. Plui democrazie

............

Chê dai 26 di Setembar e je une zornade speciâl pe Europe: e je la Zornade europeane des lenghis. Cheste dade e je stade definide passe dîs agns indaûr, ai 6 di Dicembar dal 2001, de bande dal Consei de Europe cun chê di promovi, tes sôs diviersis espressions, il pluralisim linguistic. Propit il 2001, par iniziative dal stes Consei de Europe e de Union Europeane, al jere stât proclamât «An european des lenghis» e dilunc di dut chel an in cuarantecinc Stâts dal continent a jeris stadis metudis adun une schirie di manifestazions par marcâ la impuartance dal aprendiment, de cognossince e dal ûs des lenghis. Dopo di chês celebrazions al coventave creâ une ocasion, in tiermins formâi e a nivel european, par promovi chestis cuistions, che in sostance in Europe a valin simpri, ducj i dîs. E je nassude cussì la “Zornade”, che e tocje dutis lis lenghis de Europe – e no dome di chês “minoritariis”, cemût che al declarave a fanfaron vie un politic di chenti cualchi an indaûr – e che propit par chest e à une sô specifiche impuartance par chês che a son mancul dopradis e che il lôr ûs al è contrastât o condizionât in maniere negative.
Cun cheste cussience, soredut in passât, la ricorince e je stade memeoreade ancje in Friûl cun concierts, cunvignis e altris manifestazions publichis. Cun di fat lis ideis che a stan daûr de “Zornade” a son che la pluralitât des lenghis e je une des fondis dal patrimoni culturâl de Europe, che il pluringuisim al à une sô funzion specifiche inte creazion de citadinance europeane, tant che spazi di ricognossiment e esercizi di dirits di fonde e tant che mieç par creâ cognossince e partecipazion, e che savê e doprâ plui lenghis al zove ancje al disvilup economic. Dut chest si lu cjate ancje in documents tecnics e di programazion, tant che il rapuart prontât tal 2007 di un grup di espert par cont de Comission là che il plurilinguisim al ven definît «une disfide che e conven» o il progjet Language rich Europe, là che a partecipin cu la lôr lenghe ancje Frisons, Galês, Scozês, Bascs e Catalans. Par no fevelâ de normative, a tacâ de Cjarte dai dirits di fonde de UE. Tant a dî: plui lenghis, plui Europe. E ancje: plui lenghis, plui Friûl e plui Friûl in Europe. Un Friûl che magari cussì no in chest moment al somee mancjâ. ■
MARCO STOLFO

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +