FRIÛL EUROPE. Masse biele par jessi vere

Une gnove masse biele par jessi vere, che e je false. E une storie di pressapochisim “tipicamente italiana”. Si pues strucâle in cheste maniere la vicende de ratifiche – presumude e inesistente – de Cjarte europeane des lenghis regjonâls o minoritariis de bande dal Guvier Talian, di cemût che la robe e je stade pandude ator e di cemût che tancj di lôr a àn fat sunâ lis cjampanis a fieste cence inacuarzisi che no jere stade raticaficade nissune convenzion e forsit cence savê nancje ce che a son la Cjarte e la sô ratifiche.
Dut al è tacât Vinars ai 9 di Març cuant che sul sît internet dal Guvier talian e saltave fûr la note là che si leieve che il Consei dai Ministris al veve ratificât la Cjarte europeane. Cualchidun, daûr di cualchi nozion tecniche e de memorie che la ratifiche de Convenzion di suaze pe protezion des minorancis nazionâls e jere stade fate dopo de aprovazion de leç 302/1997, al à vût daurman cualchi dubi su la biele gnove. Nol è stât cussì par cui che al veve dât fûr la note governative e nancje par une schirie di gjornaliscj, blogarins e operadôrs de informazion, ancje tal mont des minorancis linguistichis dal Stât talian.
Un sclariment su la cuistion al vignive fat tal GR di Onde Furlane di Lunis ai 12 di Març. La sere di chê stesse dî e rivave ancje la retifiche di www.governo.it, là che si podeve lei che il Guvier al veve dome fat bon un dissen di leç pe ratifiche, che al varà di vê la aprovazion dal Parlament. Cun dut achel no son mancjadis in chê dì e ancje tai dîs seguitîfs, in Friûl e inaltrò, declarazions publichis di rapresentants di istituzions publichis e privadis di preseament pe “ratifiche fate” dal Guvier. Dome siet dîs plui indenant la stampe locâl si è inacuarte de retifiche, ma no à capît (o no à mostrât di capî) che, par esempli, pal ûs e pal insegnament dal furlan a scuele nol covente spietâ la ratifiche de Cjarte europeane, ma al è avonde meti in vore ce che al è za previodût de Leç 482/1999.
Il dissen di leç no si à ancjemò rivât a viodilu, ma di ce che si sint bande Rome al varès di jessi sù par jù compagn di chel prontât tal 2007 dal guvier Prodi, une vore “minimalist” e ” parziâl”. Dopo dai gnûfs tais ai fonts pe leç statâl de tutele, valial il coment che “alc al è alc e nuie al è nuie”? ■
MARCO STOLFO