Al è simpri timp di elezions ator pe Europe, in particolâr di cà e di là dal Mâr di Bretagne. Cun di fat, il mês di Mai al è stât chel des aministrativis tal Ream Unît e de balotazion des presidenziâls tal Stât francês, intant che in Jugn a saran lis politichis sei te «République» che inte Grande Bretagne.
Un mês indaûr l’ultin passaç de competizion eletorâl che e veve di decidi cui che al sarès stât il gnûf incuilin dal Eliseu al è lât cemût che si proviodeve ae vilie. Denant de sielte jenfri il nazionalisim estremist di marcje fassiste di Marine Le Pen e il tecnocratisim liberist di Emmanuel Macron, la maiorance di chei che a son lâts a votâ no à vût dubis: i à dât il so consens al ex ministri de economie.
…
Par plui di cualchidun al è stât tant che scugnî sielzi tra il mâl e il malan. Chest ategjament lu veve palesât, par esempli, il storic partît bretonist di çampe UDB (Union Democratiche Bretone), che dopo vê fat propagande pe astension tal prin turni, par vie che no viodeve nissun dai candidâts in stât di esprimi alc di gnûf rispiet ae tradizion centraliste e nazionaliste francese, e veve dât fûr un document che al piturave la situazion saltade fûr balotazion tant che segnade di dôs menacis diferentis – i doi candidâts – e di une emergjence di fâi cuintri, l’estremisim nazionalist de Le Pen. Jenfri lis cjoltis di posizion a pro di un vôt te balotazion cuintri de candidade dal Front National a son stadis ancje chê dal coordenament des associazions culturâls bretonis Kevre Breizh e chês dai doi leaders de coalizion che e governe la Corsiche: il president autonomist dal guvier, Gilles Simeoni, e il president indipendentist de assemblee, Jean Guy Talamoni.
…
Chei de Bretagne a son stâts tra i teritoris là che Macron al à cjapât plui vôts (75,36% e 78,14% cuintri dal 26, 64% e dal 22, 86%), compagn dal Paîs Basc dal nord (76,52% par lui, 23,48% pe Le Pen). Tes tieris ocitanis e te Catalogne nord, là che in non e de pôre dai imigrâts za di agns il FN al è plui fuart, il gnûf president al à vinçût cun percentuâls che a van dal 62,99% (te gnove regjon Ocitanie), al 55,47% (in Provence) e al 52,47% (tai Pireneus orientâi), cuntun risultât ancjemò plui sclagn in Corsiche (51,48%), là che però al à contât une vore in ducj i doi turnis l’astensionisim dai nazionaliscj cors.
Propit in Corsiche e in Bretagne, vie pe campagne eletorâl, Macron al veve mostrât une cierte atenzion viers dai dirits linguistics, ancje in rispueste des domandis fatis indenant des entitâts di chenti che a fasin part di ELEN (la Rêt Europeane pe Avualiance Linguistiche), cun declarazions a pro de ratifiche de Cjarte europeane e dal potenziament de presince e dal ûs tes scuelis, tai servizis publics e tai media des cussì clamadis «lenghis regjonâls».
…
Intant che par elei il gnûf parlament i citadins francês a votaran ai 11 ai 18 di Jugn, chei britanics a fasaran compagn za Joibe ai 8. A saran elezions impuartantis soredut par ce che al tocje la «Brexit» e il rapuart tra Londre e la Scozie. La premier Theresa May lis veve convocadis propit par chel: cul intindiment di vê plui fuarce tes negoziazions cun Bruxelles e par fâi cuintri al indipendentisim scozês.
In tantis zonis dal Ream Unît si veve za votât ai 4 di Mai pes aministrativis. E je stade une sconfite pai laburiscj, une disfate pai antieuropeiscj dal UKIP e un sucès discret dai Conservadôrs, che a àn vuadagnât alc ancje in Gales e in Scozie. Risultâts avonde positîfs pai nazionaliscj galês dal Plaid Cymru e par chei scozês dal SNP.
Su la fonde di chescj risultâts e di cualchi scandai fat tai dîs passât, sei a Downing street che a Edimburc a son avonde otimiscj. Cemût laraie a finîle?