Elezions tal Ream di Spagne e tal Stâts francês, bogns risultâts di autonomiscj e indipendentiscj

Vie pes elezions plui resintis, che a son stadis tal Ream di Spagne e tal Stât francês, i eletôrs a àn mostrât di preseâ chês listis e chei candidâts che a àn mostrât plui atenzion e plui sensibilitât viers des cuistions che a tocjin identitâts, dirits, autoguvier e teritori.
◆ Chest element al è saltât fûr a fuart in ocasion dal vôt “autonomic” dai 12 di Lui stâts inte Comunitât autonome basche (CAB) e in Galizie, cu la afermazion des fuarcis politichis nazionalitariis, autonomistis o indipendentistis. In chel che al è il cûr dal Paîs Basc – che di chel a fasin part, plui in gjenerâl, ancje la Comunitât forâl de Navarre e i teritoris dal Iparralde, che impen a son sot de France – di une bande al à confermât la sô egjemonie il Partît nazionalist basc (EAJ/PNV) e di chê altre e je stade une incressite di vôts e di seçs di Euskal Herria Bildu (EH Bildu). La coalizion nazionalitarie di çampe alternative e indipendentiste, di fat, e passe di 18 a 22 seçs cun plui dal 27% dai consens (intal 2016 e veve il 21,04%) e cuntune incressite di vôts in tiermins assolûts (+ 25 mil), intant che la storiche formazion autonomiste e centriste e passe di 28 a 31 seçs, concuistant cuasi il 39% dai consens (intal 2016 e je rivade a cuote 37,2%), ancje se cun sù par jù 50 mil vôts in mancul rispiet aes elezions “autonomichis” di cuatri agns indaûr.
◆ In dut a son 53 i deputâts nazionalitaris, ma EH Bildu al restarà ae oposizion e il guvier autonomic al tornarà a jessi fat cu la poie di EAJ/PNV e dai socialiscj (PSE-EE, afiliazion “regjonâl” dal PSOE), che si confermin la tierce fuarce de CAB, stant che a passin il 13% e a zontin un seç ai 9 concuistâts cuatri agns indaûr, intant che lis diestris “spagnolistis” a pierdin vôts e rapresentance. Chest al vâl pe liste unitarie di Partît popolâr (PP) e Ciudadanos (C’s) (che e sbrisse dal 12,5% al 6,8% e di 9 a 5 deputâts) e ancje pai neofranchiscj di Vox, che a vuadagnin vôts rispiet al 2016, ma a ‘nt pierdin a pet des politichis dal 2019: cundut achel, daûr de division dai seçs jenfri lis trê provinciis (Bizkaia, Gipuzkoa e Araba), cul 2% a rivin fintremai a vê un deputât.
◆ Ridimensionament fuart ancje pe coalizion progressiste tra Podemos e Izquierda Unida (Elkarrekin Podemos), che e passe dal 15% ae 8% e di 11 a 6 seçs, paiant lis sôs contradizions di fuarce di guvier a Madrid. I va ancjemò piês al so corispondent galizian (Galicia en Común), che nol rive nancje al 4% e che al reste fûr de assemblee regjonâl. La plui part dai siei vôts a passin al Bloc nazionalist galizian (BNG), fuarce progressiste e indipendentiste, che e cjape il 24% dai consens e 19 seçs (intal 2016 al jere al 8% e a ‘nt veve 6).
◆ La afermazion dal BNG e je ancjemò plui eclatante di chê di EH Bildu. Lis dôs fuarcis a àn in comun il posizionament politic, la atenzion pes cuistions identitariis e pai dirits sociâi e il fat di vê vût tant che candidadis di ponte dôs feminis plenis di snait: la galiziane Ana Pontón e la basche Maddalen Iriarte.
◆ Ancje in Galizie i socialiscj a àn rivât a tignî bot, tant che tierce fuarce, cun di plui al à tornât a vinci il PP, che si conferme ancjemò partît di maiorance assolude, cul 48% dai consens e cun 41 seçs sui 75, lassant a bocje sute Vox e C’s. In cualchi maniere al è ancje chel un dât “identitari”, cundut che al rapresente une identitât galiziane “minorizade” e “dipendentiste” daûr di chel scheme che in Friûl si palese te idee di “piçule patrie”.
◆ Segnâi interessants a rivin ancje dal secont turni des elezions municipâls intal Stât francês, che al è stât ai 28 di Jugn, cu la afermazion significative di coalizions progressistis, marcadis de presince di listis e di candidâts verts e là che a àn vût une presince significative – parie cui risultâts – ancje espressions politichis teritoriâls e nazionalitariis, autonomistis e indipendentistis.
◆ Al è sucedût in particolâr intal Paîs Basc dal Nord, là che la coalizion EH Bai e veve vût bogns risultâts ancje tal prin turni in Març, cu la concuiste, tra lis altris, des aministrazions di Uztaritze, Ziburu, Urruña e Itsasu, e inte Corsiche, che e je guviernade a nivel regjonâl di une coalizion tra autonomiscj e indipendentiscj, là che in continuitât cul prin turni – marcât par esempli de  afermazion di Jean-Charles Giabiconi intal municipi di Biguglia, ae vuide di une coalizion civiche e progressiste – a son stadis la conferme dal sindic Pierre Savelli a Bastia e la afermazion dai candidâts autonomiscj Jean-Christophe Angelini e Angéle Bastiani, un a Porti Vechju e chê altre a Lisula. Cun di plui, a àn partecipât ae afermazion di coalizions teritoriâls progressistis, tra prin e secont turni, i autonomiscj bretons de UDB, chei ocitans di Paìs Nóstre e chei alsazians di Unser Land, che  a àn sostignût ancje la elezion de gnove sindiche di Strasburc, Jeanne Barseghian. ❚