Casse integrazion europeane, la Comission e fâs indenant la sô ripartizion dai fonts

Si torne a vierzi la racuelte
di firmis pe ICE a pro des”regjons nazionâls”. Scjadince ai 7/11

Par sigûr al è un pas indenant viers de Europe de solidarietât e dal lavôr, ancje se dome plui in là tal timp si podarà valutâ tal detai chê che e sarà la sô fuarce reâl e chel che al sarà il so impat concret. Ai 24 di Avost stâts, la Comission Europeane (CE) e à fate la sô prime propueste di implei di sù par jù 81 miliarts di euros dai 100 previodûts pal program SURE, il jutori finanziari che la Union Europeane (UE) ur da ai Stâts par che a metin in vore intervents a pro dai lavoradôrs e des impresis, cun chê di fâur cuintri, o almancul di moderâlis, aes incidencis socioeconomichis de pandemie di coronavirus. ◆ Il mecanisim di chê che e ven clamade ancje “Casse integrazion europeane” al è chel dal prestit a cundizions favorevulis e facilitadis a ognidun dai stâts che a fasin domande. SURE al è un dai struments di intervent cun operativitât svelte che a jerin stâts metûts impins ancjemò tal mês di Avrîl stât de bande de CE, in cunvigne cul Eurogrup (i ministris des financis dai disenûf stâts che a àn l’euro) e cu la Bancje Centrâl Europeane (BCE).
◆ Fin ae metât di Avost, a vevin domandât di gjoldi di chest jutori finanziari cuindis dai vincjesiet stâts membris de UE. Il Stât talian, in particolâr, lu veve fat ai prins dal mês, cuntune letare firmade dal ministri de economie Roberto Gualtieri e de ministre dal lavôr Nunzia Catalfo, là che si domandavin 28,5 miliarts e si marcave la impuartance dal program tant che «un esempli positîf di solidarietât tra i stâts a pro dai lavoradôrs europeans».
◆ Daûr de ripartizion proponude de CE, Rome e varès di vê sù par jù dut ce che e à domandât. Cun di fat, il Stât talian al risulte jessi chel che al à il finanziament plui grues (27,5 miliarts), intant che tra chei che ur vignarès dade une cuote consistente dal fonts SURE a figurin ancje la Spagne (21,3 miliarts), la Polonie (11,2 miliarts) e la Belgjiche (7,8 miliarts).
◆ Slovenie e Cravuazie a cjaparessin cirche un miliart par om. La Austrie, invezit, forsit parcè che no i covente e salacor cun chê di mantignî il so profîl “nordic” e “rigorist”, e je un di chei Paîs che no àn domandât il finanziament.
Al è probabil che si zonti ancjemò cualchi stât, e par chel a son stâts lassâts in bande chei altris 19 miliarts de disponibilitât di SURE. Lu conferme il fat che juste passade la metât di Avost a àn fat la lôr domande di finanziament ancje il Portugal e la Ongjarie.
Cumò al varà di dî la sô in cont de propueste de CE ancje il Consei de UE, che in teorie al varès di confermâ la ripartizion. I prestits a judaran i diviers Paîs a cuvierzi i coscj che si riferissin al finanziament dai regjims statâi di riduzion dal orari di vore e di altris misuris analighis introdusudis in rispueste ae pandemie.
◆ Juste tal mês di Avost e je rivade ancje la conferme che si torne a vierzi la racuelte di firmis pe  Iniziative dai citadins europeans (ICE) – che, daûr dal Tratât di Lisbone, e corispuint plui o mancul a chê che a nivel statâl e je une propueste di leç di iniziative popolâr – a pro dal ricognossiment formâl des “regjons nazionâls”, ven a stâi di chês comunitâts che a àn carateristichis linguistichis e culturâls specifichis; ma ancje a pro de viertidure di une linie specifiche di belanç, inte suaze dai fonts pal disvilup teritoriâl, in stât di sapontâ une economie “buine” e “juste”, in armonie cu la promozion des lôr particolaritâts e cul esercizi dai dirits linguistics. La gnove scjadince e je chê dai 7 di Novembar dal 2020. Si pues firmâ ancje in rêt: https://eci.ec.europa.eu/010/public/#/initiative ❚