FRIÛL EUROPE. Barcelone 9/11, Parîs 13/11, Europe 2015. E pal 2016?

Un svolt epocâl o une conferme di une cierte tindince che e va indenant di timp? La domande e tocje i fats tragjics di Parîs dai 13 di Novembar: par cualchidun a son stâts un shock, un alarm improvîs; par altris a son stâts alc che si spietave di timp.
✽✽ Tra chei che a àn declarât di no vê vude nissune sorprese a son soredut chei che no pierdin ocasion par tornâ a bati su la cuistion dal scuintri di civiltât e che a rispuindin al fanatisim cun altri fanatisim, se no piês. Salacor al somee che plui di cualchidun di lôr, cuntun nivel di cinisim ancjemò plui alt di chei imprenditôrs che dopo dal taramot di L’Aquila a ridevin e a gjoldevin pensant al vuadagn che a varessin vût cu la ricostruzion, no viodessin la ore che al sucedès alc dal gjenar, par speculazion politiche e par gratificazion ideologjiche, tant a dî cun chê di cjatâ une dimostrazion par teoremis che a somein plui che altri dogmis e che a tegnin cont dome di une part de realtât.
✽✽ I atentâts teroristics te capitâl dal Stât francês a alcin il nivel di un conflit che al esist za di timp e che al è soredut gjeopolitic, politic, economic e militâr. Duncje, no son une novitât assolude ma si insuazin intune dinamiche che e va indenant di plui timp.
✽✽ Cheste dinamiche gjenerâl, la tragjedie di Parîs e chês altris, che no tocjin dome i citadins francês e chei di dute Europe – Russie comprendude – ma ancje chês altris bandis dal mont, a tornin a meti in evidence un pâr di cuistions avonde griviis. Di une bande al è il dât economic che i vincjevot Stâts de Union europeane (Ue) a metin dongje la seconde spese militâr dal mont ma no àn un vêr sisteme di difese comun che al funzioni pardabon. Di chê altre, al è il fat che plui di cualchidun di chei Stâts – e tra chescj a son par sigûr chel talian e chel francês – al espuarte di agnorums un grum di armis tai Paîs araps, massime in chei che in dì di vuê a son i sostignidôrs dal terorisim dal cussì clamât Stât islamic, e a fasin compagn ducj i cinc membris permanents dal Consei di sigurece de ONU.
✽✽ A saressin avonde argoments par capî che e covente une vere politiche di difese e di relazions internazionâls de Ue, ma a’nd è ancjetancj par capî parcè che no esist e cuâi che a son interès che a sburtin par che no sedi. E salte fûr ancje in chest câs la Europe che e mancje, scjafoiade tra propagande e ‘grandeur’ e pronte a fâ sunâ de bande dai diviers guviers, ognidun par so cont, i tambûrs di vuere e a fâ partî i cjacebombardîrs.
✽✽ A proposit di propagande, e lasse scaturîts la maniere che il guvier di Madrid al à profitât dai fats di Parîs par rilançâ chê aleance costituzionâl cui socialiscj spagnûi, za screade dopo dal atac ae redazion di Charlie Hebdo, metint dongje il pericul jihadist cu lis istancis indipendentistis de Catalogne. Nancje che il Parlament di Barcelone e l’Isis a fossin la stesse robe.
✽✽ Al è un aspiet de reazion fûr scuare di Madrid viers de maniere che si à vierte a Barcelone la gnove legjislature autonomiche. Ai 9 di Novembar, juste un an dopo de consultazion popolâr su la indipendence, là che sù par jù doi milions e 300 mil di lôr a vevin pandude la lôr volontât di decidi in maniere pacifiche, libare e democratiche l’avignî politic de Catalogne, il Parlament al à fat buine une risoluzion che e vierç il procès di distac dal Ream di Spagne.
✽✽ Ma nol è dome il braç di fier cun Madrid, a Barcelone al è ancje un confront fuart tra JpS e Cup, stant che lis dôs fuarcis che a àn prontât e a àn votât chel document no rivin a cjatâ un acuardi par elei il gnûf president catalan, par meti adun il gnûf guvier e par lâ indenant su chê strade. Se no si liberin par ordin di personalisims e di dogmatisims al è il pericul di tornâ aes elezions tal mês di Març dal 2016. Intant, ducj i citadins spagnûi a votaran pes Cortes ai 20 di Dicembar: un vôt che al darà ancje indicazions impuartantis pe Europe di doman. ❚
Marco Stolfo