Sfuei Mensîl Furlan Indipendent
Archivi de Patrie

SLOVENIE. La Slovenie e à fat cuintri ae crisi cence intervents de «troika». Cun sacrificis, ma i risultâts si tachin a viodi

............

steme sloven
steme sloven

Il parlament sloven al à aprovât a metât Novembar il belanç di prevision pai prossims doi agns che al metarà fin a cualchidune des tantis misuris di sparagn, de riduzion des paiis publichis, ae riforme dal sisteme pensionistic (cul aument de etât pensionabile e par cualchi an dal bloc dal adeguament dai assegns pensionistics), ae jevade de Ivz, aes privatizazions (che a van indevant cundut des polemichis), ae regule di aur fiscâl (o sedi la pate di belanç metude tant che norme costituzionâl) fin ae bad bank istituide par bonificâ il sisteme bancjari. Dutis normis adotadis de Slovenie par contrastâ la crisi economiche e finanziarie che le à puartade sul ôr dal crac e al pericul di default. A diference di Grecie, Irlande, Portugal, Spagne e Cipri, la Slovenie ae fin no à vût bisugn dal intervent de troika e nancje di aiûts finanziaris de bande de Union Europeane.
LA STORIE DE RECESSION
La recession e je scomençade intal secont cuadrimestri dal 2008 e e à fat lâ sù, complice soredut la crisi dal sisteme bancjari, il debit public dal 22% dal Pil (4.063 euros pro capite) al 81% (14.615 euros pro capite) dal 2014. La Slovenie, che il so Pil al rapresente (daûr dai dâts dal 2014) il 0,4% de economie de UE, e je stade in ogni câs tra i cinc paîs de Union Europeane là che il debit public al è cressût di plui dilunc de crisi: di 8.216 milions a 30.133 milions di euros. Di chê altre bande al somee però che e sedi prossime a lâ fûr dal tunel. Za intal 2014 il Pil al è cressût dal 3%. Chest an, secont il Fmi, al varès di jessi dal 2,3%. Se la cressite e ves di restâ a chescj nivei ancje intal prossim futûr, cul 2017 o  cul 2018 la Slovenie e varès di passâ i nivei di prime de crisi, cuant che – midiant ancje de circostance economiche favorevule – il paîs al à vivût un bum economic.
BOGNS RISULTÂTS
Intal 2015 i indicadôrs slovens a son risultâts i miôr o dongje de medie inte aree Ocse. Cun di plui e je stade l’unic paîs de UE a rivâ chest an a ridusi i disecuilibris macroeconomics. Tra i dâts plui positîfs dal ultin periodi al è chel dal sigûr sul tas di disocupazion. A Setembar di chest an al è lât jù al 11,5% fasint regjistrâ la cuote plui basse dal Setembar dal 2012. Ancje se al è un dât ancjemò distant a pet dal nivel precrisi: intal Setembar dal 2008 la disocupazion e jere al 6,3%. Intal stes an i lavoradôrs slovens a jerin plui di un milion. Dal 2009 il lôr numar al è calât par cinc agns di file, ma cumò il trend al è tornât a jessi positîf.
UE: PARÊ POSITÎF
Il belanç di prevision sloven al à vût za il parê positîf de Comission Europeane che lu à judicât compatibil cui obietîfs che al perseguìs il pat di stabilitât e cressite. Za intal 2016, il deficit sloven che intal 2013 al à rivât a nivei record cul 15%, al varès di restâ sot dal soiâr Maastricht dal 3% intal rapuart cul Pil. Daûr des previsions, dopo il 5% dal 2014 e il 3,58% dal 2015, intal 2016 il deficit al varès di jessi dal 2,1% e intal 2017 dal 1,74%. Tra i obietîfs dal guvier di Miro Cerer intal bieni prossim e reste la cressite economiche (in chest periodi dovude soredut aes esportazions) che e larà perseguide ancje stimolant la spese publiche. Lis prioritâts segnadis dal esecutîf a saran la sigurece dai citadins e dal patrimoni, sanitât, justizie, infrastruturis e istruzion. ❚
Tjaša Gruden

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +