Tal 2020 e à viert la aziende agricule “Archeologa del gusto” a Vile di Cjargne. “Archeolighe – e conte Francesca Oliverio, une zovine di 31 agns – parcè che o soi laureade in archeologjie inte Universitât di Siene. O vevi decidût di slontanâmi de Cjargne e o ai fat esperience universitarie in Toscane. Dopo lis laureis trienâl e bienâl, o soi tornade a cjase e o ai tornât a fâ lis verduris sot vueli, une tradizion mandade indenant in particolâr di mê none e des mês agnis bande gno pari, che a son oriundis de Calabrie. Po dopo, o ai pensât di coltivâ lis materiis primis achì in Cjargne e duncje o ai viert partide IVZ e inviât la aziende agricule. Prin o fasevi dut cjase, ma dopo o ai vût contribûts che mi àn permetût di vierzi il pont vendite e il laboratori inte zone centrâl di Vile. O vent sei prodots di ort frescs che sot vueli fats jo, e ancje prodots agricui di altris realtâts locâls.
◆ Mi plâs unî inte mê produzion i guscj di dôs regjons: il Friûl e la Calabrie.”
Ae domande “Il prodot che al nas tal sud Italie aial un altri gust rispiet a chel che al nas in Cjargne, cambiant sedi il soreli che il teren?” Francesca e dîs che ancje in Cjargne a vegnin sù prodots bogns cun savôrs unics: “O coltivi pomodoros tes sidreris, e a àn un bon savôr. Chest an o ai cjapât sù almancul un centenâr di melons bogns, cuntun savôr miôr rispiet a chei dal Sud. Int vevi tancj che o ai fat ancje la marmelade. O planti ancje pevaroncin picant e chest an al è vignût tant fuart che mai. Par solit lu fâs sot vueli e mal domandin in tancj! Achì si è usâts a coltâ lis solitis robis: “cartufulas”, fasûi, blave… jo oltri a ce che o ai za dit, o zonti melanzanis, pevarons e v.i. O lavori cuasi un etar di tiere.”
◆ La buteghe di Istât e je vierte dome a buinore, stant che il dopomisdì Francesca e je impegnade tai lavôrs dal ort e tal laboratori. Vie pal Invier e je sierade di lunis. Dongje de produzion cjargnele, Francesca e fâs rivâ ancje alc de Calabrie come il vueli e i narançs.
“Mi plasarès fâ alc di gastronomie cui miei prodots. – e va indenant Francesca – La idee le scuen inmò disvilupâ ancje par sfrutâ il laboratori e il pont vendite dut l’an. Inte Vierte o cjapi sù lis jerbis spontaniis (tale, flôr de tale, saût…). Disìn che mi fermi un moment a Zenâr e Fevrâr, dopo o torni a partî cu la ativitât. Une grande man mi le dan i miei gjenitôrs.”
◆ Francesca e je nassude e cressude a Vile e e dîs: “O soi tornade in Cjargne dopo la universitât parcè che o vevi nostalgjie de mê famee e mi mancjavin la pâs e la trancuilitât dai nestris paisuts di mont. Cuant che o jeri adolessente, finît il liceu, o ai volût lâ vie parcè che o vevi insoference par chest puest. Dopo o soi cressude e mi soi rindude cont che mi mancjavin tantis robis e par chest o ai decidût di tornâ e di restâ achì fasint un sfuarç plui grant: vierzi une ativitât. In Cjargne la strade e je dute di rive sù: lis stagjons a son chês che a son e coltivâ nol è sempliç; spes o cjati int che no je tant vierte e che e pretindarès di comprâ ducj i prodots che si cjatin intes grandis buteghis. Par fortune o soi rivade a fâmi il gno zîr di clients.”
◆ Par cualsisei novitât e inzornament, si pues visitâ la sô pagjine su Facebook e Instagram. ❚
