Motârs

Foto di Ranieri Furlan (FOTORF)
Fracassons, amions, cuntune grande passion: la moto. Beh, considerant ancje la presince di bieleis fantatis al vignarès di dî che lis passions dai motârs a son dôs. E la Biker Fest, (www.bikerfest.it), di chest an lu à confermât
L’apontament al è stât dai 5 ai 8 di Jugn pe edizion numar 22 dal plui grant event motoradunistic di Italie e tra i prins trê di dute Europe.
Il teatri che al à ospitât la fieste al sarà il Parc dal Rivelin cu la sô aree di passe 240 mil metris cuadris li che tal 2000 si son regjistradis passe 30 mil presincis.
Chest an ancje par un pocje di ploie no si à rivât a cjapâ il stes numar, ma sin son dut câs contâts distès passe 20 mil visitadôrs.
Ma no je stade une fieste dome par divertîsi: si à vût ancje moments impuartants di riflession.
Sabide ai 8 di Jugn a 11 di buinore cuant, che la task force formade di Ami (Associazione motociclisti incolumi), Cm (Coordinamento motociclisti), Dismo (Dimensione sicurezza in moto – Disabili in moto) e Gwci (Gold wing club Italia) e à clamât adun par une cunvigne dedicade a la sigurece par strade e a la difese dai dirits dai motocicliscj.
Duncje une manifestazion fate pai apassionâts di motos che a àn voie di divertîsi, ma ancje par chei che a son atents ai aspiets dal sociâl. Cun di plui e je stade une ocasion pe promozion turistiche de nestre tiere stant che la associazion Terre di moto e à organizât une schirie di itineraris turistics par presentâ pal miôr il nestri teritori (www.terredimoto.it).