Sfuei Mensîl Furlan Indipendent
Archivi de Patrie

Minorancis: un dirit o un delit?

Pre Antoni Beline

Finît il carnevâl curt, uficiâl, al va indenant chel lunc, seguitîf, di un Stât che al fâs fente di sei seri e invezit al è in mascare e al à la mascare.
La grande mascare de istituzion republicane taliane si pues cjatâle in tancj cantins: tun guvier che al va indenant a sun di verifichis des verifichis, là che al è pôc ce verificâ; tune economie che e vûl passâ par sane la cuâl che la disocupazion e la mancjance di prospietivis ti sta copant soredut chê zoventût che ducj, a bocje, a van disint di difindile; tune libertât che ur ven dineade ai piçui e ai diferents e che e devente impunitât, arogance, mafie, anarchie tal sens plui piês de peraule pai furbos. Tant che al ven di domandâsi se la vecje definizion di Bismarck che al viodeve la Italie tant che une «espression gjeografiche», no pecjave di otimisim. Ma esistie cheste Italie? E cuale? Chê de partitocrazie o chê des istituzions? Chê libertarie o chê liberticide? Chê de Costituzion o chê de realtât? Chê dal «Va pensiero» o chê dal «Stringiamoci a coorte», là che la «coorte» e je deventade «corte», il palaç là che ducj a vuelin roseâ ma che nissun nol intint di puartâ dongje alc e di lavâ la massarìe.
A son 120 agns che le àn repeçade e 40 che le àn rifondade. E nissun storic o politic di rispiet nol pues dineâ chestis dôs colonis di fonde: la bugade risorgjimentâl, che nus à dade la unitât, e la svintade resistenziâl, che nus à sigurade la libertât. Ma cumò, a distance di tancj agns, sino verementri unîts e libars?
La unitât e à di jessi une concuiste che e partìs di un o plui valôrs che si sintiju come cumuniâi. In cont di chest, si cjate in Italie plui distancis che no tai Stâts Unîts tra une cueste e chê altre. Dibot si cjatin di plui Russie e Americhe, almancul tal fâ i lôr interès.
La libertât e je un fat spirtuâl, di dâ e di vê, di jessi di peraule tant di une bande che di chê altre. Un Stât al pues jessi libar dome cuant che lui al fâs la sô part e alore al pues pratindi che ancje chei altris a fasin la lôr. Robe che no sucêt, jessint il Stât precîs dome tal imponi e tal pratindi e balarin tal dâ. E soredut bausâr. Parcè che nus oblee nô a jessi di peraule cun lui e a lâ daûr de leç, cu la cuâl che lui par prin al tradìs chê leç che e varès di tignîlu peât e adun.
Cheste peande dal Stât nassût su lis maseriis dal fassisim e je la Costituzion. Che e dîs che o sin ducj compagns. E no je lafè vere. Che o vin dirit ducj di lavorâ. E no je vere nancje cheste. Che e dîs, tal art. 6, che la Republiche e pupile lis minorancis. E cheste e je vere ancjemò mancul. E di fat tocje fâ corieris, petizions, porconâ, inrabiâsi, minaçâ par vê ce che un Stât cussient al varès di dâlu se no altri par vê une parvence di serietât. Cui ur aial dit di pupilâ lis minorancis? No lu àno dit lôr? E parcè no lu fasino? No àno timp? Lu àn pûr là che a vuelin e là che ur torne cont!
Ce che nol fâs lâ indenant cheste Italie no je tant la tristerie di chel o di chel altri om o partît politic. Al è, usance nô, l’implant che nol va, che al è frait, che al sta parant dut in vacje. E je la Italie che no esist. E partant no pues esisti nancje une filosofie politiche, economiche, culturâl taliane.
Partide par cumbinazion cul espansionisim dal Piemont, si è cjatade a vê in man un ream che al jere unît dome te crepe di cualchi mat o brigant. No te realtât. E lis visions di Mazzini lis àn fatis passâ par veris plui che no la stesse realtât che e diseve juste il contrâr. Se la Italie e ves vude la inteligjence di rispietâ chês diviersitâts sacrosantis che a jerin e che a son, si varès ancje podût cjatâ un mût di fâ strade insieme. Ma cu la prepotence, cu la falsetât, cul pastrocj no si pues fâ ni strade ni storie ni civiltât. E o sin rivâts a di un pont là che lis fuarcis che a tindin a scjampâ (Sudtirôl, Sardegne, Friûl e vie) a stan tirant plui di chês che a tindin a unî. Alore là che un inteligjent al doprarès la politiche dal rispiet, un stupit al scuen doprâ la disonestât de prepotence. Si dopre lis armis di Mussolini ancje se no si vûl acetâ di jessi siei fîs.
Cheste malatie croniche di nazionalisim reonzude di fassisim e je la grande plaie di cheste Italie tignude adun ma no unide, libare a cjacaris e tirane tai fats. Cuant che un Stât al partìs che jessi minorance al è un dirit ma si sa che sot vie lu considere un delit, e al dopre ducj i mieçs par copâ chestis minorancis, di cualsisei sorte o nature, al è malât, nol pues pratindi fiducie nol pues vê durade. Parcè che al à dentri di sè, tal cûr dal so implant, il vier de sô disfate.
Varaial il Stât talian tant sintiment di lassâ che lis svareadis minorancis, ognidune te bielece e tal sflandôr de sô unicitât, a puedin convivi e judâlu a lâ indenant? Al è dut ce vuadagnâ. Laraial indenant come cumò, fasint invelegnâ chei che si sintin defraudâts tal lôr sacrosant dirit che lui stes ur al à ricognossût? Che si spieti di dut fûr che ben.
Un Stât nazionalistic e fassist nol à di vê fastidis pe sô cjante nazionâl, se al è il câs dâ sù «Stringiamoci a coorte» o «Va pensiero». L’unic che si merete al è: «Va a trai».

Editoriâl di “La Patrie dal Friûl” di Fevrâr dal 1986, n. 2

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +