La Societât Sportive di gjinastiche di Sante Marie di Lestice, vuidade dal tecnic Elena Filipputti, e à vût un grant sucès ai campionâts europeans di Albi, la capitâl dai Albigjês e te tiere dai Catars te Ocitanie francese davuelts dai 12 ai 18 di Lui dal 2008.
Il teme de esibizion e je stade la Mitologjie furlane tra Aganis, Fadis, Sbilfs e Krapus compagnâts des musichis cjapadis de tradizion roseane, cjargnele e furlane, sieltis dal mestri Luciano Marangone.
A Eurogym 2008 (www.eurogym2008.com) a jerin presints 4400 atletis di 25 stâts europeans e la scuadre furlane (cui siei 27 zovins) e je rivade seconde tra lis rapresentativis de Italie, concuistant il pass pe setime edizion dai zûcs che si davuelzaran tal 2010 in Danimarche. La S.S. di Sante Marie no je gnove a esperiencis internazionâls: tal 2003 e jere in Portugal pai mondiâi, tal 2004 in Finlandie e tal 2006 in Belgjiche pai europeans e inmò tal 2007 pai mondiâi in Austrie.
Christian Romanini
