Un spazi dulà cjatâsi pai zovins de citât

La Caritas di Udin è à inviât un “Spazi pai Zovins” par tignî dongje i fantats e daûr un pont di riferiment dulà cjatâsi. Il centri al è logât te struture di vie Marinoni a Udin, che e je stade screade ai 19 di Setembar, dopo dai lavôrs di ristruturazion che a son stâts fats tai ultins agns. Il complès di vie Marinoni al è stât metût a disposizion de Caritas di Udin des muiniis “Fiis de Caritât, San Vincenzo de Paoli”. In graciis di un contribût regionâl, la Caritas lu à sistemât e cumò li dentri a son disposizion de comunitât servizis tant che la sartorie sociâl, l’empori solidâl “Pan e gaban”, il centri di scolte inter parochiâl, la associazion “Casetta a colori” e un convit par students forescj a presits bas.
◆ Adun cun chescj servizis, midiant di un contribût de Fondazione Friuli, al è stât inviât un “Spazi pai Zovins”: «Il progjet – al spieghe Sandro Polo de Caritas di Udin – si è inviât cuant che e je mancjade, doi agns indaûr, chê zovine cjatade muarte te stazion di Udin: dute la societât si è domandade parcé che e fos sucedute une robe dal gjenar e o vin pensât a chescj zovins che o riscjìn di pierdi. Il Spazi pai Zovins al veve di jessi screât in Fevrâr ma la emergjence no lu à permetût. Dut câs, vie par chescj mês nô operadôrs o vin fat ativitât di strade cui zovins».
◆ Tal Spazi pai Zovins si cjate un laboratori musicâl cun mieçs che a permetin di regjistrâ musichis, un laboratori pe produzion di videos, un laboratori di marangon e ancje un pai “zûcs di rûl”. Cun di plui, a son ancje spazis dulà che i zovins di Udin a puedin vignî se a àn cualchi ore libare tra la buinore e il dopomisdì a scuele. Cul jutori de Fondazione Friuli si podaran inviâ i incuintris e i laboratoris dulà che i fantats a cjataran personis che ur staran daûr e che a puartaran indenant ativitâts cun lôr. Il centri de Caritas si cjate in vie Marinoni, ma par jentrâ tal Spazi pai Zovins si à di rivâ par vie Rivis: «In dì di vuê – al spieghe inmò Polo – a Udin al è operatîf dome il centri di vie Riccardo di Giusto, e invezit il “Poliedro”, alì dal parc dal ciment, al è sierât di doi agns. Cul gnûf Spazi pai Zovins, o volin creâ un pont di riferiment pai plui zovins, dulà che a puedin cjatâsi sedi pai laboratoris che par studiâ e par fâ i compits».  ❚