FONDAZIONE FRIULI. A Dieç in mostre i mestri

Ancje chest an la Fondazione Friuli e à dât il so sostegn ae decime cuinte edizion de mostre di art internazionâl di Dieç. La preseade esposizion e je stade screade ai 12 di Mai e si podarà visitâ fin ai 6 di Otubar. Chest an la mostre, che te stagjon passade e veve contât 40 mil visitadôrs e 500 mil di cuant che e je stade inviade tal 2004, si disvilupe traviers lis figuris dai grancj mestris de piture che a àn sielzût par cualchidune des lôr oparis i temis de educazion e dal insegnament. “Maestri” al è di fat il titul de mostre dedicate a chei che a insegnin a pensâ, a scuvierzi il lôr talent: tal detai, a vegnin proponudis oparis realizadis tra il 1150 e il secul passât, di Raffaello, Michelangelo, Caravaggio, Giordano, Jourdy, Fattori, Picasso e tancj altris artiscj. Jenfri lis oparis si segnale ancje la presince de “La Buona Ventura” di Caravaggio. Si trate di un lavôr une vore preseât, un vueli su tele di 96 par 127 centimetris conservât intune colezion privade a Siene: «Il cuadri – al spieghe il curadôr pre Alessio Geretti – al è ogjet di grant interès. Al è stât sometût a analisi sientifiche aprofondide. I dâts storics nus puartin al timp di Caravaggio, tant che i elements tecnics, il mût di procedi, che a son une vore dongje dal timp e dal spazi dal mestri. “La Buona Ventura”, duncje, e podarès sei une opare sô: no sin in grât di sierâ la storie, ma le vin vierte par chei che a àn passion di Caravaggio e pal grant public». In dut a son esponudis 38 oparis metudis dongje su la fonde dai temis “passion pe bielece”, “passion pe cressite”, “passion pe veretât” e “Jesus Mestri”. A Dieç al sarà ancje un calc dal Mosè di Michelangelo, custodît te basiliche di Sant Pieri in Vincoli a Rome: «Il calc – al dîs inmò pre Geretti – al pues jessi studiât di dongje e al da valôr ancje al lavôr dai mestris di art des buteghis che lu àn realizât». ❚
Piero Cargnelutti