Fieste dal Friûl te memorie di pre Checo Placerean, che pai 30 agns de muart la Provincie di Udin i dedicarà un grant event tal 2016

“Tal 2016 la Provincie di Udin e organizarà une impuartante cerimonie par memoreâ la figure di pre Checo Placerean a 30 agns de sô muart. Un omaç a un grant om dal nestri Friûl” lu à dit il President de Provincie di Udin, Pietro Fontanini in ocasion de inaugurazion des gnovis stanziis de biblioteche civiche di Montenârs.
Pe ocasion Fontanini al à regalade la Bibie par furlan (edizions Ribis, 1984) che pre Checo Placerean al à voltât par furlan cun pre Toni Beline. Une donazion particolâr celebrade te zornade dai 3 di Avrîl, fieste dal Friûl.
“La idee e jere nassude propit di pre Checo tal 1977, un an dopo dal taramot” al à ricuardât Fontanini “par sburtâ di bande dal Friûl une reazion, une cjapade di cussience coletive de identitât, de profonditât des lidrîs dal popul furlan. No vin di dismenteâ che in gracie di pre Checo Placerean e dal so sproc ‘dal taramot si ven fûr cul cjâf e no cui pîts” se il Friûl vuê al à la sô universitât. Un segnâl clâr: il Friûl al veve di jessi protagonist”.
I volums de Bibie par furlan a son stâts consegnâts ancje ae comunitât di Cividât che e je stade sede des cerimoniis uficiâls de Fieste de Patrie dal Friûl. Fontanini al à regalade la preziose publicazion ancje ae biblioteche di Gurize e a chê di Pordenon. ❚
Redazion