Sfuei Mensîl Furlan Indipendent
Archivi de Patrie

Paola Del Negro, une vite dedicade ai ecosistemis marins

Erika Adami
Paola Del Negro vie par une campagne oceanografiche intal mâr di Ross, in Antartide. Sul fonts la isule di Coulman.
Paola Del Negro vie par une campagne oceanografiche intal mâr di Ross, in Antartide. Sul fonts la isule di Coulman.

Di fantate e voleve fâ la biolighe ospedaliere, ma la vite, e i incuintris dilunc dal so percors universitari, le àn fate svicinâ al mâr e ai siei organisims, che e à studiât a dilunc, ancje tes aghis glaçadis de Antartide, tant di vuadagnâsi, cul so curriculum di prin plan, la fiducie dal consei di aministrazion dal Istitût nazionâl di Oceanografie e di Gjeofisiche sperimentâl – Ogs che, intal 2018, le à nomenade diretore gjenerâl. Une incarghe prestigjose davuelte cun competence e passion di Paola Del Negro, sienziade furlane cun lidrîs cjargnelis de bande dal pari, cognossude e preseade in particolâr pes ricercjis sul studi dal funzionament dai ecosistemis marins, massime chei des cuestis, chei di transizion e polâr. E je stade confermade di resint pal cuadrieni 2021-2025 inte sô posizion di vertiç dal ent di ricercje che al nas inte seconde metât dal Sietcent cuant che e je stade istituide a Triest, su richieste di Marie Taresie di Austrie, la Scuele di Astronomie e Navigazion.
◆ «In chest gno secont mandât o lavorarai par favorî la integrazion dal compart aministratîf cun chel de ricercje, par rinfuarçâ il spirt di apartignince al nestri istitût che al à un rûl strategjic par vie che al unìs lis competencis su tiere e mâr», carateristiche che, peade a une cjadene di comant strente, concentrade in regjon, lu rint unic tal panorame talian. Cun di plui, «o vuei fâ in mût che dutis lis personis che i lavorin si sintin part di une scuadre, protagoniste de riprese dal Paîs, parcè che la ricercje e pues jessi motôr di svilup e di sostignibilitât». L’Ogs al à sede intune regjon a concentrazion cetant alte di realtâts sientifichis a caratar internazionâl. «Mi plasarès che intai citadins e fos plui cussience dal valôr zontât dât dai ents di ricercje dal Friûl-Vignesie Julie. O pensi, par esempli, aes tantis oportunitâts ufiertis aes scuelis di cheste grande presince di ricercjadôrs. Se a fossin plui relazions, disfrutant lis tantis competencis esistentis, studentessis e students a varessin pardabon une marcje in plui intal lôr percors di studi e di cressite».
◆ Del Negro e ven dal mont de ricercje – di formazion e je biolighe –, e par davuelzi al miôr la incarghe di diretore gjenerâl e à frecuentât un master in Gjestion des risorsis umanis e organizazion dal lavôr te Universitât dal Friûl. Ma prime di acetâ il gnûf rûl in Ogs, e à cjapât part a cetantis campagnis tra Antartide e Mediterani. «La ricercje sul cjamp e je une ativitât fadiose – e conte –. La prime campagne oceanografiche le ai fate a metât dai agns Novante. Si fevelave cu la famee midiant di puints radio. Mê fie piçule e veve 4 agns. Cuant che si rivave a cjapâ la linie e jere une fieste par dut l’ecuipaç! Mi mancjin lis relazions umanis cui coleghis che tu vivis a dilunc a strent di comedon, il cricâ dal dì su la nâf, la bielece dal mâr. Mi emozioni  ancjemò a pensâ al Istât austrâl cuant che il soreli nol va mai jù disot dal orizont. Tornant bande de Gnove Zelande si passave de lûs al scûr e tornâ a viodi lis stelis e jere une maravee, tant che tornâ a viodi il vert dopo doi mês e mieç dome di blanc e turchin tai voi! E cemût dismenteâ il passaç de nâf tra lis balenis o i pinguins che ti vignivin dongje?».
◆ Spetacui de nature magnifics che a ripaiavin de fature di un lavôr cence orari, organizât sul moviment dal mieç di traspuart. «Cuant che al rivave te aree che o vevi di studiâ – e podeve jessi matine tant che sere tart –, o cjapavi sù i campions dai popolaments microbics che mi ocupavi, e ju analizavi. Intal 2006, dilunc vie de mê ultime campagne antartiche, cuant che o vin tocjât il pont plui a Sud che si fos sburtade une nâf taliane, jo o durmivi! No sieravi voli di doi dîs par vie dal lavôr».
◆ La Antartide e je un lûc clâf par capî cemût che la cuvierte di glace plui grande de Tiere e sedi daûr a rispuindi ai cambiaments di temperadure sedi de atmosfere che dal ocean e, duncje, cemût che e contribuìs aes variazions dal nivel dal mâr e de circolazion marine globâl. Cun di plui, al è impuartant indagâ trope sostance organiche des aghis superficiâls antartichis che e alimente i popolaments animâi des grandis profonditâts oceanichis «par capî il funzionament dai ecosistemis che l’om no ju influence a fuart». Tant che al sucêt invezit a cjase nestre. «La pescje sbrenade, cence regulis, e à impuarît i nestris mârs che a son simpri plui plens di organisims gjeladinôs, tant che lis medusis o lis Mnemiopsis leidyi (coculis di mâr), specie aliene rivade tal Adriatic cu lis aghis di saorne des nâfs, cun pôcs predadôrs e une vore ingorde, che e pues jessi nocive pai pes che a vivin tal nestri ecosisteme». Indagâ struture e funzionament dal ecosisteme marin – ben savint che «la sorevivence des personis e je peade ae cualitât dal planet e che i ecosistemis a van protets e no manipolâts» – al è tra i compits di Ogs, clamât – cu la sô sezion di Oceanografie – a studiâ il mâr cuntune metodiche multidissiplinâr par rispuindi aes sfidis globâls in cjamp ambientâl e sociâl. Un mandât ancjemò plui impuartant intal Deceni dal mâr (2021-2030), istituît dal Onu par sburtâ a cognossi i oceans – prin pas fondamentâl pe lôr protezion –, un dai obietîfs de Agjende 2030 des Nazions Unidis pal svilup sostignibil. «Il 71 par cent dal nestri planet al è cuviert di aghe, cuasi dute salade, ma trops sano che de cualitât dai mârs a dipendin salût e benstâ dai umans? La Tiere e à doi polmons: un al è costituît des forestis, chel altri dal mâr». ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +