Sfuei Mensîl Furlan Indipendent
Archivi de Patrie

De Australie ae Val Tramontine al servizi di une valade incontaminade e des sôs comunitâts

Erika Adami

Giulia Piazza, di Manià: «La valorizazion
de nestre tiere e passe par un turisim di prossimitât»

De Australie ae Val Tramontine, là che e à inviât un progjet di valorizazion e di promozion de valade, de sô nature libare e salvadie, di scuvierzi e di vivi ad implen. Giulia Piazza, 26 agns di fâ, di Manià, e rive a Melbourne tal Zenâr dal 2019, dopo de lauree in Relazions publichis. «A jerin agns che o volevi partî – nus conte -. La dì de discussion de tesi o ai domandât un vistât di vore di 12 mês pe Australie e comprât un biliet aeri dome par lâ. O ai unît al gno desideri di viazâ chel di cognossi l’ocean, cu la uniche spiete di imparâ miôr une lenghe, l’inglês, che in chel moment no mi rangjiavi masse ben».  ◆ In mancul di un an «o ai vivût in cuatri cjasis diferentis e lavorât, cun diviersis mansions, intune agjenzie educative che e je ancje pont informatîf gratuit, “Just Australia” – fondade di doi furlans! -, e, la sabide e la domenie, intun ristorant. Intant o ai perfezionât il gno inglês intun dai miôr campus de citât, visitât centenârs di puescj, cerçât svariâts plats tipics, fat fieste pal gno complean finalmentri tal cjalt (o soi nassude intal mês di Novembar) in centri Australie, tra Alice Springs e Uluru (Ayers Rock), durmint tal mieç dal desert e jemplantmi i voi di chel colôr ros fûc che al à la tiere dal desert australian. Ae fin dal an, dopo cinc “road trips” (viaçs epics in machine ae scuvierte di lûcs gnûfs, ndr), no savevi plui trops chilometris che o vevi fat! O ai vût la fortune di cognossi e di passâ il gno timp cun personis maraveosis di dut il mont, e cun cualchidune a son nassudis amiciziis straordenariis».
◆ Prime che al scjadès il vistât, Giulia – che no veve chê di fermâsi ancjemò in Australie – si met in viaç, ancjemò une volte, ma no di bessole. Cul so compagn, Alberto Cancian, che no viodeve di un an, a visitin la cueste est de Australie, po la isule sud e la isule nord de Gnove Zelande, li che a lavorin intune aziende agricule, e lis isulis Fiji, tal mieç dal Pacific. In plene emergjence Covid, tra permès straordenariis, vistâts di emergjence, svoi scancelâts e cjapâts par un pêl, la rivade a Rome e, infin, in Friûl, a Manià, cuntune machine a nauli.
◆ Achì, planc a planc, al cjape forme il progjet di Giulia, condividût cun Alberto, furlan di Lavorêt, che al à daûr une storie impuartante di viaçs, tra Amazonie e Asie, contâts in libris une vore preseâts, e dôs laureis tal management dal turisim. Un progjet, il lôr, che «al è la nestre vite, che al cjape dentri i nestris valôrs, desideris e passions».
◆ Intune epoche segnade dal isolament e dal distanziament sociâl, «jo e Alberto o sintivin fuart dentri di nô la esigjence di tornâ a svicinâsi ae nature intindude sedi tant che ambient sedi come essence di ogni persone. Cussì e je nassude “ri.natura”. Pai indigjens de Amazonie colombiane, tant che pai aborigjens de Australie centrâl, no sin dome une specie che e cjamine sul planet, ma che e fâs part dal planet. Duncje, se il planet al patìs, o patìn ancje nô. Se al sta ben, o stin ben ancje nô. “Ri.natura” e vûl dismovi cheste cussience traviers di esperiencis diviersis: cjareçant un mus o dant di mangjâ a un agnel, cuietant i pinsîrs fasint yoga tal bosc, gjoldint de nature lant in canoe suntun lâc… ta cheste maniere si tornin a scuvierzi il rispiet pal ambient, par nô stes, par chei altris, par dutis lis creaturis de tiere».
◆ Un sium che al è deventât realtât te Val Tramontine, «un di chei puescj che, cuant che tu i vegnis, tu ti inamoris», e dîs Giulia, che in Val e leve za di picinine, cu la famee, ben prime che gjornaliscj inglês a ‘nt scuvierzessin l’incjant, fasintle cognossi, massime pes sôs pocis vert smeralt, di là dai confins dal Friûl. I ricuarts di Giulia a son dolçs. «Mi impensi ancjemò des ridadis, dai bagns tal flum, des partidis di cjartis e de none che mi ingosave di fetis di torte…».
◆ Cumò, la Val Tramontine – di mete des gjitis cence pinsîrs dai dîs di fieste – e je deventade cjase, cu la sô gjenuinitât e gjenerositât – chês de vicine che ti tuche te puarte par regalâti lis verduris dal so ort o dai fruts che ti dan il bundì cuntune bocje di ridi -, cu la sô autenticitât, cu la sô bielece. «No tu puedis no restâ incantesemât devant de sô nature incontaminade, des pocis di aghe frescje colôr smeralt, dai siei borcs fantasime sparniçâts pe valade, des lusignis che a iluminin la gnot, dal so cidinôr. Cemût fasistu a no vê agrât a chei artesans e produtôrs locâi che a puartin indevant tradizions vecjonis e a dan valôr aes tipicitâts tant che la pitine e il formai dal cit? Cemût fasistu a no preseâ dutis chês personis, e a son tantis, che a àn a cûr cheste val e che a cirin di mantignîle in vite midiant di gnûfs progjets, festival, concierts, puartant indevant laboratoris artesanâls e tant altri?».
◆ Nol è facil. Vivi in mont nol è dut poesie e maravee. «I vûl cussience – e dîs Giulia – sedi di ce che la mont ti ufrìs sedi di ce che ti gjave». Ma al è un viaç ancje chest, e come in ducj i viaçs «tu vivis intune riscuvierte continue, di te stes e di ce che tu âs ator, imparant a metiti in zûc, a rispietâti te e i tiei limits, e chei di cui che tu âs dongje. E a dâ acet al diferent, parcè che tu capissis che al è sinonim di ricjece».
◆ In Val Tramontine Giulia e Alberto – che a àn simpri crodût intun turisim lent, di prossimitât, ancjemò prime de pandemie – a pensin, a organizin e a promovin events e ativitâts che a permetin di tornâ a dâsi te nature – escursions vuidadis, lezions di canoe, yoga tal bosc, spassizadis a contat cun mus, vacjis, cjavai, pioris, fin damis – e di tornâ a cjatâ i guscj di une volte midiant di cercis dai prodots locâi, fats cun cure e tal rispiet des tradizions. A cirin di meti a sisteme la ufierte turistiche de Val doprant tant che cjamp di base il gnûf pont informatîf te sede de Pro Loco Valtramontine a Tramonç Disot, che i doi zovins a gjestissin fin de sô scree, pôcs mês indaûr. Li a dan acet ai turiscj e ai visitadôrs dantjur bogns conseis e materiâl informatîf sui lûcs di visitâ, trois di fâ e puescj dulà mangjâ. Cuntune rispueste une vore positive: simpri plui personis a stan scuvierzint la valade ancje par cjapâ part ai events di “ri.natura”. Un segnâl di sperance pal avignî intun an dificil par ducj, ancjemò plui biel e impuartant parcè che al ven di une zovine e di un zovin, de lôr voie di metisi in zûc, al servizi de lôr tiere, dai lûcs che a àn a cjâr e des lôr comunitâts, fasint tesaur di dutis lis lôr storiis, memoriis e usancis. ❚
IL PROFÎL
Giulia Piazza, nassude tal 1994, dopo de lauree in Relazions publichis, publicitât e comunicazion aplicade ae Universitât di Udin, e à vivût in Australie par un an. E je a stâ a Tramonç Disot.
◆ E à madurît une grande esperience tal cjamp dal marketing digjitâl in gjenerâl e dai social media in particolâr, metint dongje studis e passion pe grafiche, pe fotografie e il videoediting.
◆ Cun Alberto Cancian, Giulia e à dât vite al progjet “ri.natura”, par tornâ a svicinâsi ae nature, e e gjestìs, par cont de Pro Loco Valtramontine, il pont informatîf di Tramonç Disot, che al promôf la val, al inmanee ativitâts e events di caratar artistic artesanâl, antropologjic e enogastronomic, e al fâs di reception pal albierc difondût “Mandi”.
◆ E je tra i ideatôrs e colaboradôrs di Pordenoneviaggia, festival dedicât al viaç e ai viazatôrs. ❚

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +