Felici ma Furlans, ma content ancje Luciano Lunazzi: il sucès di “Tacons”

Intal articul di un pâr di mês fa li che o contavin dal sbarc a Milan di chei di “Felici ma Furlans” o anticipavin che la compagnie video-teatrâl-umoristiche e veve cualchi novitât che e stave par rivâ. E vele ca la novitât che a àn burît fûr: une serie di mini video di “lezions” di furlan, recitadis dal “mestri di vite” (cussì al è definît tal filmât) Luciano Lunazzi, clamadis “Tacons”. A son deventâts subit un sucesson sul web, ancje in gracie de formule: une vore curts, duncje adats a deventâ “virâi” su la rêt.
I video a son simpri umoristics, li che si tradusin espressions talianis cun frasis tipichis furlanis… ma no propit “politically correct”. “Buongiorno” par furlan al sarès “Ce bevistu?”, “Come stai” “Cemût la bighe?” e vie indevant.
In plui dal divertiment di trasponi espression seriis talianis cun mûts di dî popolârs furlans, un dai fatôrs dal sucès e je la “recitazion” di Luciano Lunazzi, 63 agns, artist di strade hippie che al piture su carton o su materiâl riciclât, deventât pe ocasion insegnant (cun chel biel acent cjargnel che i è restât ancje se, partint di Davâr, al à zirât il mont par passe 30 agns).
No ducj a àn capît che “Tacons” e je la ironizazion di “Blecs”, une altre serie di mini-filmâts produsûts dal Ent Friûl tal Mont par insegnâ il furlan cun frasutis semplicis ai emigrâts furlans di seconde o tierce gjenerazion, che a àn magari pierdude la marilenghe: a esistin in version furlan-inglês, furlan-castilian, furlan-talian e vie indevant.  Se i “Blecs” si clamin cussì, ve i “Tacons”; se chei a son “pillole di friulano”, chestis di clamin “supposte di friulano” e il ritmi des frasutis di “Blecs” e la lôr ripetizion e ven ricjapade cun ironie. Un biel “contrappasso” pal regjist di “Blecs” Massimo Garlatti Costa, che al inizi de cariere al à fat tancj videos ironics par furlan e che o ricuardìn il documentari umoristic “Buris. Libars di scugnî vignî” su une improbabile cjase di produzion di video porno furlane. Ma no i displasarà…
A Luciano Lunazzi, oltri al sucès, o imagjinìn che i tocjarà il stes destin di Oscar Schwander, il capitan Kirk de dopleadure par furlan di Star Trek (si impensaiso?) che, par un biel toc, pai bars dal Friûl al veve di ripeti lis frasis de sô part a chei che lu ricognossevin. Po ben, pazience: il tai al sarà simpri paiât. ❚
Dree Venier