Federico Vicario, gnûf president de Filologjiche, al presente lis sôs prioritâts pal post-Pelizzo

“Il prin obietîf e je la lenghe, fâ incressi la sô cognossince, il numar dai fruts, fantacins e zovins che le fevelin. Si che duncje, o sburtarìn ancjemò di plui par lavorâ tes scuelis dal oblic e tes superiôrs, dulà che o sin bielzà impegnâts cul progjet Clil”.
Cussì il gnûf president de Societât Filologjiche Furlane, Federico Vicario, al met a clâr i ponts di fonde dal so program, che al cjamine sì sul troi segnât tai ultins agns cu la presidence di Lorenzo Pelizzo (al à vuidade la Filologjiche par 12 agns, dal 2001 al 2013), ma cul intindiment di segnâ ancjemò plui in sot l’agâr dal impegn par rinfuarcî l’ûs de marilenghe e une presince vive de culture furlane.
Vicario, 47 agns docent di linguistiche gjenerâl e romanze ae Universitât di Udin, al è stât elet ae presidence dal Consei gjenerâl ai 12 di avrîl stât, rivânt cussì ae vuide de Socie dopo vê lavorât par tancj agns te Filologjiche e jessi stât vice president.
Tra lis ativitâts che i stan une vore a cûr, l’impegn pe formazion dai insegnants che a son bielzà in servizi e che a stan lavorant tes scuelis dopo che cumò il furlan al è deventât materie curicolâr. “Cun 550 di lôr – al conte – o sin bielzà impegnâts pe didatiche e cun cors su storie, tradizions, musiche e linguistiche. O varìn di continuâ su chest troi”. Cun di plui, “o ai bielzà in calendari di incuintrâmi cui dirigjents scolastics des scuelis superiôrs, par meti in cantîr azions di informazion su la lenghe e lâ indevant cui progjets caraterizâts dal sisteme Clil.
Restant te suaze dal sisteme scolastic, Vicario al è determinât a fâ in maniere che la Biblioteche sociâl de Filologjiche, che à il ricognossiment de Regjon, e deventi simpri plui un imprest doprât des scuelis e frecuentât dai students. “Si à di savê che e je a servizi dal sisteme scolastic, cui siei 25 mil volums e di chescj 750 dedicâts tal specific ae scuele, ancje cun Dvd. In zonte, o ricuardi il diari Olmis, che in curt o presentarin la diesime cuinte edizion, distribuît a gratis in 20 copiis tes scuelis”.
Insieme a dut chest, il president al ricuarde la vore de Filologjiche cui cors pratics in convenzion cu la Arlef che si fasin in 24 Comuns, i rapuarts che a van indevant cu lis Pro Loco, i Comuns, “e che son rapuarts impuartants” e une ativitât che si slargje a condividi batais cun altris istituzions. Come chê in cors par fâ in mût che il materiâl dal Archivi di Stât di Pordenon, e no tant a lunc ancje chel di Udin, nol vegni puartât a Mestre, stant che i edificis dulà che a son conservâts, no son a norme di leç. “O vin aprovade une mozion in assemblee – al spieghe Vicario – e o vin vût ancje di resint une riunion cu la diretore dal Archivi di Stât di Udin, par studiâ lis soluzions”.
Altri cantin su la scrivanie dal president, chel dai rapuarts cu la Regjon. “Ae istituzion – al precise il president – o domandìn di jessi valutâts pe nestre opare di promozion e valorizazion de lenghe e de culture furlanis. Cun di plui, di jessi metûts tes condizions di colaborâ cu la stesse Regjon. Nô cumò o vin une convenzion cun la Arlef, ma si podarès fâ cetant di plui”. In cont a chest, al ricuarde i 3 mil socis de Filologjiche, la presince sul teritori cun cuatri lûcs, oltri al Palaç Mantica di Udin, il sît di Tumieç, Pordenon e Gurize, une presince costant sul teritori cui fiduciaris. Duncje une struture di podê sfrutâ lavorant insieme pe promozion de lenghe e culture. “O vin di ricuardâ ancje – al dîs – che o sin l’unic istitût culturâl de regjon a jessi ricognossût dal ministeri pai Bens culturâi”.
No par ultin, il so pinsîrs al è ai finanziaments. “Pal 2013 la Regjon nus da 150 mil euros, 80 mil di mancul dal an passât e che nus conventin par paiâ la struture e i dipendents, che a son 6, il diretôr e 5 impiegadis. In gracie des convenzions o paìn i lavôrs che si fasin, ma no la struture e duncje – al va indevant Vicario – o speraressin che la aministrazion regjonâl e sostegnìs i coscj struturâi”.
In curt, al siere Vicario, “une presidence in continuitât cul passât, ma in progression. O soi fiduciôs che si rivi a traviersâ ancje chest moment par ducj dificil e o invidarìn la presidente de Regjon e l’assessôr ae Culture par che nus vegnin a cognossi di dongje e par che nus judichin pe vore che o fasìn”.
✒ Antonella Lanfrit