Pandemie psicologjiche

Cu lis ultimis novitâts su la pandemie e cul passaç de nestre regjon in zone zale, no son stadis pocjis lis perplessitâts des personis. Massime par ce che al tocje la ristorazion: isal sensât permeti a bars e ristorants di dâ di mangjâ e di bevi dome fûr? Si podeve previodi che il risultât al sarès stât  chel che si à za viodût, o ben desenis e desenis di personis intropadis fûr dai locâi, a spietâ un tai o a cjacarâ cui amîs. Pluitost, forsit, al jere miôr lassâ di subit la pussibilitât di cjatâsi ancje dentri dai puescj di ristorazion, là che dut câs si varès podût tignî la distance di sigurece, e dutis chês altris misuris cuintri il Covid.
◆ Chescj a son, plui o mancul, i coments che, di lunis, si sintin cuasi ogni dì, par television, sui gjornâi o fevelant cui amîs, cu lis amiis o cu la famee. Ma pardabon ise dibisugne di continuâ a lamentâsi par dut? No si puedial, invezit, stâ contents di jessi passâts in zâl e vonde? Al somee cuasi che si sedi daûr a cirî simpri un alc par no jessi contents, là che invezit si varès di gjoldi dal fat che lis robis a stan pardabon lant in miôr. E chest al è il gno pinsîr e impegn dal mês: no contribuî ae ande pessimistiche che si sint fin masse dispès in ducj i lûcs, ma pluitost fâ ognidun la sô part par cirî di fâ pesâ di mancul la situazion particolâr che o sin daûr a vivi. E podarà ancje someâ une robe cence sens ma se si pues vivi miôr, parcè no tentâ? ❚
Marianna Tonelli