Il so titul al è ‘Adolescenza con coscienza. Mission possible!’ e al è il gnûf progjet metût adun de associazion APS KLARIS di Udin cul intindiment di sapontâ lis fameis e i rapuarts tra gjenitôrs e fîs. La iniziative e ten dongje une schirie di intervents formatîfs e informatîfs, che si davuelzin cu la colaborazion di altris sogjets tant che istitûts scolastics, ents locâi, associazions e cooperativis.
◆ Plui in detai il progjet si disvilupe tra conferencis publichis par cure di esperts, psicolics e educadôrs, laboratoris par fantatis e fantats che la lôr etât e va dal dodis ai disesiet agns e trasmissions radiofonichis.
◆ Lis ativitâts a son stadis screadis ai 7 di Març cul prin laboratori fat a Udin li de scuele ‘G. Tiepolo’ e a son ladis dilunc cuntun altri zûc formatîf, ai 21 di Març a Manzan, e cun dôs conferencis: la prime, dedicade ae comunicazion, e je stade fate li de Ex Latarie di Tombe di Merêt ai 26 di Març, intant che la seconde, dedicade al dialic tra gjenerazions diferentis, si à davuelte inte biblioteche civiche di Remugnan di Reane dal Roiâl ai 30 di Avrîl.
◆ Vie pal mês di Mai si davuelzaran ancjemò dôs conferencis. Miercus ai 7 di Mai a sîs sot sere a Felet, li de biblioteche (in vie Mazzini 9), si fevelarà di relazions, rûi e identitâts. Vinars ai 23 a vot di sere a Cjarlins si frontaran chei stes argoments e si presentaran i risultâts des esperiencis laboratoriâls de prime fase dal progjet. Cun di plui, lis ativitâts davueltis a vignaran presentadis intune serie di trê trasmission su Radio Onde Furlane.
◆’Adolescenza con coscienza. Mission possible!’ al è un progjet metût adun de APS KLARIS cul jutori finanziari de regjon Friûl-VJ e cu la colaborazion de cooperative Informazione Friulana, dal Prin Istitût Comprensîf di Udin e dai Comuns di Cjarlins, Manzan, Merêt di Tombe, Reane dal Roiâl e Tavagnà.
◆ Par savênt di plui, si pues lâ sul sît internet de associazion o su la sô pagjine Facebook: https://klarisweb.wordpress.com e https://www.facebook.com/AssociazioneKlaris ❚
Famee e fantats di 12 a 17 agns a rifletin su cemût cressi cun sintiment
Marco Stolfo
