Cuatri stuis adun cun 2.100 socis,
un faturât di passe 60 milions di euros
O sin aromai cuasi rivâts al moment de nassite di “Essicatoi FVG”, un gnûf grup de cerealiculture furlane targât Confcooperative FVG. Dopo des deliberazions des assembleis des cooperativis ugnulis, a son 4 lis struturis furlanis che a àn decidût di metisi insiemi intune uniche imprese cooperative: “Essicatoio Bozzoli”, di Palme (che si è costituît intal 1920); “Essicatoio Torricella”, di San Vît dal Tiliment (nassût intal 1975); “Essicatoio Torre Natisone”, di Remanzâs (nassût intal 1976) e “Granaio Friulano”, di Feagne (nassût tal 2022 de fusion tra la cooperative “Vieris” di Cjasteons di Strade e la “Morenica Cereali” di Feagne).
◆ «E je une operazion buine che e coventave – peraule di Daniele Castagnaviz, president di Confcooperative FVG e di Granaio Friulano – dopo passe 50 agns di storie de essicazion cooperative in regjon. Dai prins agns di chestis esperiencis, il mont al è cambiât dal dut, e ancje la agriculture. Si scuen lâ indevant tal agâr za segnât di altris agregazions. O fâs riferiment, in particolâr, a chês di FruttaFriuli (che al à unît lis cooperativis Friulkiwi di Spilimberc e Friulfruct di Sant Zorç da la Richinvelde) e Granaio Friulano. Cun Essicatoi FVG o metìn in rêt plui di 2.100 socis conferidôrs che a operin suntun teritori di 60.000 etars su 90 Comuns tra lis provinciis di Pordenon, Udin e Gurize e un faturât complessîf di plui di 60 milions di euros. I obietîfs de fusion a son clârs – al zonte Castagnaviz -: incressi e rindi plui fuartis lis oportunitâts dai socis e des 4 impresis; dotâ Essicatoi FVG di une aministrazion uniche par ducj i centris; rinfuarçâ la struture produtive e comerciâl par sostignî lis filieris; favorî i invistiments strategjics; consolidâ il patrimoni e la ativitât finanziarie di cheste gnove struture».
◆ Ae fin de fusion, che si calcole dentri dal mês di Jugn, Essicatoi FVG al podarà contâ su 8 implants di essicazion, 9 centris di racuelte, 22 colonis di essicazion cuntune produzion potenziâl di 113.000 cuintâi in dì, 2.030.000 cuintâi di capacitât di imagazenament, une produzion di 2.912 kWh di energjie di fonts rinovabilis (fotovoltaic e biogàs) e 11 milions di kW prodots ogni an che al è il consum energjetic di 4.000 fameis. ❚
