Elezions tal Stât francês e tal Ream Unît: il sucès de çampe basche e i risultâts diferents di SNP, PC e SF

Il vôt pal rinovament de Assemblee legjislative de Republiche francese, ai 30 di Jugn e ai 7 di Lui, al è stât segnât, daûr di ce che si spietavisi bielzà ae vilie, di une polarizazion fuartonone. Dopo dal prin turni, cuant che la maiorance relative dai vôts le veve cjapade la diestre estreme dal Rassemblement National (RN), in ocasion de balotazion la vitorie e je lade al Gnûf Front Popolâr, la coalizion metude adun de çampe radicâl cui socialiscj, cui ecologjiscj e cun altris fuarcis progressistis par fâi cuintri al partît di Marine Le Pen e Jordan Bardella. Al è stât dome che un sucès parziâl, stant che i deputâts otignûts no son avonde par podê guviernâ di bessôi. Tal moment che o lin in stampe cul gjornâl no si sa ancjemò cuâl che al sarà il gnûf guvier, ma ce che al è sigûr al è la liste dai gnûfs components di chê che a Parîs le clamin “Assemblée Nationale”.
◆ Se si ten cont dome dai teritoris europeans dal Stât francês, la gnove plui impuartante e je chê de elezion, pe prime volte, di un rapresentant de çampe nazionalitarie basche. Cun di fat, Peio Dufau de coalizion progressiste e ecologjiste Euskal Herria Bai! (EH Bai!), candidât dal Gnûf Front Popolâr, al sarà un dai membris de Assemblee di Palaç Bourbon. Cun lui a son altris trê i rapresentants des fuarcis politichis nazionalitariis, regjonalistis e teritoriâls: i cors Paul-André Colombani, dal Partitu di a Nazione Corsa, e Michel Castellani, di Femu a Corsica, e l’autonomist breton Paul Molac.
◆ Ai 4 di Lui stâts a son stadis ancje lis elezions pe Cjamare dai Comuns dal Ream Unît, che, daûr di chês che a jerin lis previsions de vilie, a àn segnât la fin di sù par jù sedis agns di guviers conservadôrs. Cumò tal apartament dal numar 10 di Downing Street al è un premier laburist, il londinês Keir Starner, in graciis dal fat che il so partît al à cjapât la plui part des sentis (412 su 650) cul 34% dai vôts. Il Partît conservadôr al à cjapât un patafon (dome 121 parlamentârs: il risultât piês in assolût inte storie), no dome a vantaç dal Labour Party ma ancje a pro de diestre di Reform UK, liste che e à cjapât 4 milions di vôts (sù par jù il 14%) .
◆ Tra chei che a àn pierdût consens al è par sigûr il Scottish National Party (SNP), che al è passât di 47 a 9 deputâts e di un milion e dusintemil a sietcentmil vôts (dal 45% al 30% in Scozie), a testemoneance dal fat che il partît scozês al è intun moment di crisi relative e che part dal “popul indipendentist” (cuotât ator dal 45% ) al à vût miôr votâ pai Verts, pai laburiscj o par Alba, il partît dal ex SNP Alex Salmond, che però al à cjapât dome 12 mil preferencis.
◆ Lis robis a son ladis miôr, inte Irlande dal Nord, pai republicans progressiscj dal Sinn Féin che a àn confermât i lôr siet rapresentants, passant di 180 mil a 210 mil vôts, e ancje il fat di jessi il prin partît di chenti cul 33% dai consens, e pai socialdemocratics dal SDLP che cundut de pierdite di uns pôcs di vôts, a àn simpri doi elets. Ben ancje in Gales pal Plaid Cymru (PC), che al manten lis sôs cuatri sentis e al cjape 60 mil vôts in plui.
◆ Ai 18 di Lui il Parlament European al à votât pe Presidente de Comission. A pro de conferme di Ursula Von der Leyen a àn votât ancje i eurodeputâts nazionalitaris dai grups popolâr, socialist e liberâl, adun cui conservadôrs flamants de N-VA, intant che i àn votât cuintri sei Perrando Barrena Arza di EH Bildu (Çampe europeane), sei i membris dal grup Verts/ALE de Galizie, Ana Mranda (Bloque Nazionalista Galego – BNG), e dai Paîs Catalans Diana Riba (Esquerra Republicana de Catalunya – ERC) Vicent Marzà (Compromis) e Jaume Asens (Comuns), marcant cussì une distinzion rispiet ae posizion fate indenant de bande dai Verts. ❚