Sfuei Mensîl Furlan Indipendent
Archivi de Patrie

ELEZIONS REGJONÂLS DAI 29 DI AVRÎL. Cecotti: «O rivoltarai la Regjon tant che un cjalçut: vonde acentrament»

............
Sergio Cecotti
Sergio Cecotti

L’ex president regjonâl e ex sindic di Udin al torne in cjamp cun Pat per Autonomie

Une riforme che e partissi di un gnûf pat tra i teritoris e che e combati la burocrazie

Za president de Regjon tra il 1995 e il 1996, e dopo sindic di Udin par doi mandâts dal 1998 al 2008, Sergio Cecotti, 61 agns, fisic teoric ae Sissa di Triest, al torne in cjamp cu la gnove formazion dal Pat pe Autonomie, convint che ni centriçampe, ni centridiestre, che a àn guviernât il Friûl-Vignesie Julie intai ultins 10 agns, a puedin meti man ae crisi grave de specialitât regjonâl.

1) Chescj doi acuardis (il prin in particolâr) a àn gjavât plui di dîs miliarts di euros ae nestre Regjon in nûf agns. Aberazions similis a son stadis pussibilis dome in gracie de mancjance di volontât di Tondo e Serracchiani di fâ valê i dirits dal Friûl-Vignesie Julie. La cosmesi no baste, si à di sbregâju. O pensi di vê lis cjartis a puest: di president de Regjon o ai sierât acuardis finanziaris cul Stât intun moment che il Stât al jere in dificoltâts finanziariis fintremai plui grandis.

2) La cuintririforme e je chê dal Pd, che al è tornât indaûr ai lûcs comuns dai agns ’80. O vuei fâ la riforme dal sisteme public regjonâl, riforme che no je mai stade fate. L’element mancul eficient e mancul rapresentatîf dal sisteme nol è mai stât il Comun e nancje la Provincie, ma la stesse aministrazion regjonâl. Ma la burocrazie regjonâl si è refudade simpri di riformâ se stesse. E à metût un teritori cuintri chel altri, slambrant la coesion istituzionâl de Regjon. La istituzion regjonâl e à di funzionâ in maniere decentrade e difondude sul teritori, e jessi buine di rapresentâ e di secondâ la vocazion des sôs variis componentis teritoriâls, linguistichis e sociâls. Dentri de riforme de Regjon e va risolte – cul consens di ducj – la cuistion dai ecuilibris tra teritoris. Dome une volte riformade la Regjon, si àn di riorganizâ un daûr  chel altri chei altris nivei di guvier, sterilizant però daurman i aspiets plui nefascj de cuintririforme Serracchiani.

3) O poiarai l’ûs des lenghis des nestris minorancis in ducj i ambits sociâi. O soi di simpri impegnât su chescj temis, o crôt di vê lis cjartis in regule. O soi stât l’autôr de leç regjonâl 15/1996 di tutele dal furlan, e dal regolament aplicatîf de leç statâl di tutele des minorancis storichis.

4) Un rapuart dal Ufici Studis de Bancje di Italie al dîs che il timp necessari inte nestre Regjon par vê ducj i permès domandâts par vierzi une ativitât industriâl al è tant plui lunc che in ogni altre regjon taliane. Fin cumò, lis impresis a son stadis discoragjadis dal insediâsi intes nestris zonis industriâls. Eliminâ la burocrazie e je la prime misure. Dopo e covente completade la infrastruturazion des areis industriâls e si à di furnî aes impresis insediadis servizis inovatîfs e competitîfs. Pal lavôr, la misure cun efiet plui imediât e je chê di rilançâ i invistiments publics. Intai ultins dîs agns, inte nestre Regjon e je stade une colade dal 51,1%, cuintri il 23% de medie nazionâl. Chest al à determinade une crisi teribile dal setôr des costruzions, cun ricjadudis ocupazionâls pesantis. Une responsabilitât precise di Tondo e Serracchiani.

5) Rilançâ la natalitât al è il teme decisîf. La sociologjie nus sclarìs che une societât che no fâs fîs e je une societât che no crôt al propri futûr. Par tornâ a tas di natalitât sostignibii no bastin i incentîfs e i aiûts (che pûr a van incressûts), e covente dade une prospetive di futûr ae comunitât regjonâl. Par ce che al tocje il benstâ sociâl: la cuistion centrâl e je la colade de eficacitât de sanitât regjonâl. E va ricostruide par tornâ ae ecelence che i jerin usâts: nô o vin ideis claris di cemût ricostruîle.

di Roberto Pensa


Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +