Sfuei Mensîl Furlan Indipendent
Archivi de Patrie

ELEZIONS REGJONÂLS DAI 29 DI AVRÎL. Bolzonello nol dinee nuie, ma al promet plui dialic cul teritori

............

Sergio Bolzonello
Sergio Bolzonello

«Riformis falidis par une cospirazion dai sindics che cumò a tentin la scjalade al Consei regjonâl»


Il so al è il compit plui grivi par un candidât president aes prossimis Regjonâls: no dineâ cetant che di bon al è stât fat intal Centriçampe intai ultins 5 agns, «smarcjantsi» però des riformis sbaliadis (par ecès di sigurece e par pôc dialic cul teritori) di Debora Serracchiani. 58 agns, Bolzonello – vicepresident de Regjon e assessôr aes Ativitâts produtivis, turisim e cooperazion te Zonte Serracchiani – al è stât sindic di Pordenon par doi mandâts, dal 2001 al 2011.

1) Il centridiestre al à svendût la nestre Regjon a Rome intal 2010 obleantnus a meti ogni an 370 milions al Stât. In sostance, par simpri e cence otignî nuie in cambi. O vin di fâ di dut par tornâ a negoziâ chel acuardi in virtût de nestre capacitât di gjestî ben lis funzions che la nestre autonomie nus garantìs. In chescj agns, o sin rivâts adore recuperant 120 milions di euros ogni an, in graciis dal pat Serracchiani-Padoan. Intal prossim futûr, o volìn domandâ gnovis competencis e gnovis risorsis al Stât parcè che o sin convints di savê gjestî miôr dal guvier centrâl ciertis funzions tant che chês scolastichis.

2) Lis Provinciis a son stadis abolidis cul vôt unanim dal Consei Regjonâl rispietant il mandât eletorâl vût intal 2013. La riforme dai ents locâi no à funzionât cemût che e doveve par doi motîfs: une carence croniche di personâl intai nestris Comuns e une conflitualitât politiche prejudiziâl metude in cjamp di un grup di sindics che vuê, su chê onde, al tente la scjalade al Consei Regjonâl. A chest, finide la campagne eletorâl, o metarìn rimiedi impuestant un confront viert a ducj i sindics par passâ lis contraposizions, e disblocant lis assunzions pai ents locâi. Diviers al è il discors su la identitât dal Friûl che no si esaurìs intun consei provinciâl e che no si pues definî par contradizion cun altris teritoris de nestre Regjon. Ogni teritori al à une sô storie e une sô vocazion che a van valorizadis de unitât regjonâl. Se o volìn lâ indevant a cressi o vin di confrontâsi e di condividi soluzions, no creâ contraposizions.

3) In chescj cinc agns o vin dopleadis lis cifris dedicadis ae tutele de lenghe furlane, dopo tancj agns che cualchidun si è jemplât la bocje, evitant di fâ cualsisedi robe in mût pratic. O volìn lâ indevant a garantî chês risorsis par progjets scolastics e di poie aes associazions che a tutelin la lenghe. O vin lavorât ancje cu la Rai pal rinovament dal contrat, duncje o disarès che la strade tacade e je dal sigûr chê juste.

4) Intal 2008 o vevin 517 mil ocupâts, intal 2013 o sin lâts jù a 495 mil, parcè che il Centridiestre al à vût miôr no frontâ la crisi che e veve colpît la Italie e la nestre regjon. Si à vût miôr fâ fente che al les dut ben. In chescj cinc agns, in gracie de nestre leç “Rilancimpresa”, o vin recuperât 10 mil puescj di vore. Vuê, jessûts de fase di emergjence, o vin di invistî sul lavôr di cualitât e creâ altris 10 mil puescj di vore. Al sarà strategjic otignî la autonomie scolastiche dal Stât, parcè che nus consintarà di formâ i nestris fantats su la base des esigjencis dal marcjât. Par ce che al tocje l’atrat, o vin margjins impuartants su la jeve fiscâl.

5) La nestre propueste e je di 100 euros a fi fin ai 18 agns. E je une cifre dongje dai 22 mil euros, une misure struturade e concrete. I “bonus” a servissin a pôc, parcè che a àn une durade limitade, cun cheste formule invezit o fasìn un pat cu lis fameis. La uniche domande e je che dopo il sest an di etât 1/3 dai 1.200 euros ad an al vadi impleât par culture e sport. Che a sedin libris, museus o cors di formazion e di sport, nol impuarte, o volìn però dâ la pussibilitât a ducj di podê fâ esperiencis in contescj che a judin a vierzi la ment.

di Roberto Pensa

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +