Cuant che tal 1999 Tony Blair al à concedût la “devolution” a la Scozie, plui di cualchidun al à pensât che il ricognossiment di une speciâl autonomie dentri dal Ream Unît al varès fat tasê par simpri il moviment autonomist.
I osservatôrs politics a pensavin che, une volte centrât l’obietîf di vê un Parlament indipendent di chel di Londre, i scozês si saressin contentâts, metint vie par simpri ogni sperance di une secession de Mari Patrie.
Pluitost che calmâ lis golis, però, il parlament di Holyrood al à instaurât un procès politic dut gnûf. Il partît autonomist scozês al jere stât simpri considerât come un moviment che al domandave 100 par vê 10 e lis rivendicazions di plui autonomie a son simpri stadis cjaladis cuntun mist di simpatie e di difidence. Plui folclôr che sostance, insome.
Un rûl impuartant lu à zuiât il fat che, a diference di altris moviments secessioniscj, chel scozês nol à mai vût derivis violentis e al à simpri cirût di tignî lis tratativis suntun plan politic e di doprâ la vie istituzionâl par rivâ adore a puartâ a cjase risultâts concrets.
Ce che i osservatôrs no vevin considerât e je stade la figure di un leader carismatic come Alex Salmond. Cualchidun lu veve considerât un om di çampe, un amì di Tony Blair. La realtât e je ben divierse: Salmond al è prime di dut un scozês e, come che al à dit plui di cualchi volte, al tratarès cun cualsisei partît pûr di rivâ a puartâ fûr la indipendence de sô tiere.
Une volte otignude la devolution no si è dismenteât che l’obietîf al jere un altri e al à tacât une lungje campagne par mobilitâ l’eletorât autonomist in viste des elezions politichis. E i risultâts i àn dât reson: l’SNP (Scottish National Party) al à otignût il miôr risultât di simpri e si è confermât alc di plui di un partît nazionalist. Salmond al à savût, cun bravure ma ancje e soredut cun coragjo, trasformâ un partît nassût come moviment di proteste intun sogjet in stât di detâ la linie politiche.
I risultâts lu àn premiât e la prime conseguence e je stade che al e rivât a fâsi nomenâ prin ministri. Si trate di un guvier di coalizion ma ce che al conte al è che si è rot un “tabù” e un indipendetist al pues vuidâ la sô nazion e fâ lis tratativis cu la capitâl dal Ream.
Ma nol è stât chest il risultât eclatant. Dopo mancul di un mês di guvier-Salmond e je rivade la prime sorprese: daûr di indiscrezions a saressin deputâts conservadôrs pronts a firmâ la domande di referendum pe secession. E pôc al impuarte se no je nissune sigurece che i scozês e votaressin pe secession.
No je plui une cuestion di numars: che a sedin 4 o 5 i “dissidents” che tradiressin il lôr partît pe indipendence o che sedin plui dal 50% i scozês che a àn voie di vivi intune nazion indipendente al impuarte pôc. Ce che al conte al è che si tabai di “referendum” e che nol sedi plui un tabù pensâ che il popul si pronuncii suntun argoment cussì impuartant.
Al è alc di rivoluzionari in cheste storie: un om moderât come Salmond, cence mai menaçâ un at violent e cun elezions liberis al à tornât a puartâ il teme de indipendence e dal autonomisim tal centri de agjende politiche dal so paîs. La vitorie di Salmond e je la vitorie de Scozie e il troi segnât dal SNP al pues deventâ la strade di fâ par ducj i moviments locâi dal mont.
Simone Bressan
