EDITORIÂL – Superficialitât vuarbe

Ce che al colpìs inte politiche regjonâl si pues ridusi a un sôl adietîf: superficiâl.
Ma par un partît, par un moviment che al vueli presentâsi ae int, ai eletôrs tant che strument di rinovament, o ancje di conservazion, de vite sociâl complessive, cheste e varès di jessi la ofese plui grande.
Superficiâl al significhe no dâ rispuestis a ce che al sucedarà doman, no dâ in definitive une prospetive e duncje dineâle.
Acetâ in maniere sotane ogni propueste che e rivuarde la viabilitât, la energjie, cuant che e rive di potentâts economics, e je la sintesi di chest mût di agjî.
No si partìs mai de domande: «Trop covential al Friûl chel che o soi daûr a fâ?», no si domandisi mai, une volte dât l’assintiment a un progjet, cualis che a saran lis sôs incidencis doman sul teritori o su la societât.
Su la imigrazion, che al è un cantin fragjil e sensibil tra i autonomiscj, par esempli si à volût simiotâ lis sieraduris padanis, invezit che partî di doi fats obietîfs: che par sô nature il Friûl al è stât e al sarà simpri tiere di passaç, e secont che, stant che i imigrâts no son dome bestiis di cjame o cjar di disfrutâ intes fabrichis o intai cantîrs, prime o dopo il probleme di ce gjenar di integrazion che e puedi jessi o varessin di domandâsal. Viodût che lôr i fîs ju fasin e i furlans no.
Cuant che dopo a legjiferin, i nestris elets a fasin ancjemò piês.
Se no fos ae fin une vuere di podê tra guvier nazionâl e regjonâl, il numar di leçs confezionadis a Triest e boladis a Rome al bastarès a dimostrâ la incapacitât di cjalâ plui in là dai nestris governants.
Cualchidun al podarès daurman rispuindi che al è l’enesim at di imperi dal centralisim viers il Friûl. Chel al è simpri, in assolût, ma chi si trate invezit di ignorance semplice, facilonarie inte compilazion des stessis leçs.
Se dopo o volìn ancje dî che Rome e je daûr a fâ di dut par indebilî la specialitât regjonâl, sminuint pês e impuartance, fasìnlu ancje.
Ma la superficialitât, la facilonarie no puartin di nissune bande.
Dree Valcic