EDITORIÂL – Prime il Friûl o prime la Italie?

✽✽ Dai risultâts des elezions politichis dai 4 di Març stâts, e ven fûr clare la imagjin di une Italie che e à voie di cambiâ la sô classe dirigjente, talmentri fuarte che i talians a son pronts ancje a cori il pericul di cualchi “aventure”. Il messaç dai eletôrs nol lasse dubis, ancje se al è un grum dificil viodi une maiorance in grât di guviernâ, che di fat no je. In struc, il Movimento 5 stelle al à stravinçût ae Cjamare e al Senât, prin partît in Italie; altri vincidôr di chestis elezions e je la Lega, che e à fat miôr di Forza Italia, deventant cussì il prin partît dentri de coalizion di centridiestre, coalizion che, pûr vint vût il plui alt consens popolâr, no à i numars par guviernâ di bessole; il Partito democratico, che al à vuidât tai ultins agns il Paîs, al è vignût fûr sdrumât e ancje i partîts di ce che e reste de çampe.
✽✽ A nivel regjonâl, su 20 seçs a disposizion pal Friûl-Vignesie Julie (13 ae Cjamare e 7 al Senât), il centridiestre a ‘nd à puartâts a cjase 14 (6 ae Lega, che e va a Rome cun Massimiliano Fedriga, Vannia Gava, Raffaella Fiormaria Marin, Daniele Moschioni, Massimiliano Panizzut, Mario Pittoni; 5 a Forza Italia cun Franco Dal Mas, Roberto Novelli, Guido Germano Pettarin, Sandra Savino e Laura Stabile; 2 a Fratelli d’Italia – Luca Ciriani e Walter Rizzetto – e 1 a Noi con l’Italia-Udc, ven a stâi Renzo Tondo). Pal M5s in Parlament a van Sabrina De Carlo, Stefano Patuanelli e Luca Sut e pal Pd Ettore Rosato, Debora Serracchiani (che si imbuse intal zûc dai rescj dal Rosatellum dopo vê riscjât la esclusion, tant che al è sucedût al ex president de Regjon, Riccardo Illy, candidât pal Pd) e Tatjana Rojc, che e je subentrade al cjâf di liste dem pal Senât Tommaso Cerno, elet a Milan. A Rome a van 16 musis gnovis, dai parlamentârs di prime a son stâts riconfermâts dome in 4, e lis feminis eletis a son 7, 2 di plui dal 2013.
✽✽ Sot des spietis l’esordi dal Pat pe autonomie, la gnove fuarce politiche dal teritori che e à puartât a nivel talian lis istancis de autonomie speciâl dal Friûl-Vignesie Julie, un teme che al varà dal sigûr plui pês tal cuadri des elezions aministrativis dai 29 di Avrîl, passât chest colp in secont plan ai voi dai eletôrs, plui atents – ancje in gracie dal sburt dai media statâi e locâi – a cuistions tant che la imigrazion, lis tassis, la abolizion de leç Fornero, il redit di citadinance.
✽✽ In maniere indipendente di cui che al guviernarà la Italie (che no savìn al moment di lâ in stampe), si spietìn dai nestris gnûfs parlamentârs a Rome che a metin al centri de lôr azion l’interès dal Friûl e la difese e valorizazion de autonomie regjonâl. Cjalant a diestre, savaraie la Lega locâl – la fuarce politiche cul plui alt consens numeric chi di nô – lavorâ pardabon pal teritori o continuaraie a cori daûr ae politiche nazionaliste taliane dal so leader? E, butant il voli a çampe, rivaraie Rojc, scritore di marilenghe slovene, a fâ il ben di dutis lis minorancis di cheste regjon speciâl? A ducj al va l’auguri di un bon lavôr pal Friûl di vuê e di doman. ❚
Erika Adami