EDITORIÂL – NO VIN PORE: une classe politiche corote no je Friûl

✽✽ Daûr lis peraulis dal president Tondo su la leç dal furlan, a son scuindûts i pinsîrs di dute la classe dirigjente regjonâl. No dome chê che e e va a comprâ scarpets e golosets, che e va in vacance al mâr e a schiâ cui nestris bêçs, ma ancje chê che si prepare a ocupâ il Palaç cu la benedizion di Grillo.
Ducj i partîts talians une robe le àn fisse tal cjâf: la cuistion furlane no esist.
✽✽ Di sigûr un alc tai programs eletorâi al vignarà fûr: cualchidun, viodude la sô ispirazion stataliste, al difindarà il valôr des leçs, cualchidun altri al cirarà cualchi vôt ricuardant i valôrs tradizionâi dal popul furlan. Cualchidun, par esempli il moviment Cinc stelis, al scrivarà su internet che a son dutis bufulis. I leghiscj a disaran che dome lôr a difindin la identitât, chê de macroregjon naturalmentri.
La veretât invezit e je clare: no dome nissun di lôr al crôt tal autoguvier dai Furlans, ma a stan fasint di dut par fâ tornâ indaûr lis concuistis e il nivel di cussience dal popul.
✽✽ O pensi propit ae coruzion: cheste classe politiche, e o met tal mieç ancje i furlans che a son adun in cheste mangjadorie, e je rivade a copâ la figure des istituzions buride fûr de ricostruzion dopo dal taramot.
“I furlans a son come chei altris”, chest il concet che a àn simpri cirût di fâ passâ. E se la mignestre e je cussì, ce coventino dôs universitâts, la tutele de lenghe, i contribûts ai imprescj de informazion? Il furlan a scuele: “Bêçs butats vie, cumò che e je  la crisi”, a sberlin chei che no àn fat nuie par fermâle.
✽✽ Noaltris invezit o savìn, no par ideologjie ma par storie vivude, che propit intai moments critics, il tirâsi dongje, il fâsi popul al rapresente la sole sperance.
✽✽ No torni a nomenâ il taramot, ma o pensi ae emigrazion, aes vueris, aes invasions, a dutis lis disgraciis che tai secui nus son rivadis.
Forsit chi e sta la nestre debilece: jessi fuarts dome in chei moments e molâ cuant che lis robis a somein plui cuietis.
✽✽ Visaitsi che par un popul piçul e discriminât tant che il nestri, la pâs no esist. Si à di scombati ogni dì, ogni secont pal nestri dirit ae esistence.
E cuant che al somee di jessi rivâts adore, cualchidun si met tal mieç par obleânus a scomençâ di gnûf.
No stin a spaventâsi duncje nancje cumò.
✽✽ Tal moment che o scrivìn no savìn ancjemò se o podarìn votâ alc di furlan tes prossimis elezions. Miôr se sì, ma tal câs contrari visìnsi che no sarà la muart.
Di sigûr o varìn di domandâsi – purtrop une volte in plui – il parcè, ma soredut o varìn di pensâ ae dì dopo, cuant che, ator pal Friûl, e tacarà une gnove bataie.
✒ Dree Valcic