EDITORIÂL – L’inteletuâl furlan e la fuarce dal cûr

La nestre cuviertine e je un ricognossiment al poete furlan Pierluigi Cappello. A la sô bravure, a la sô grinte, a la sô voie di vivi, al so amôr par il Friûl. O cognòs Pier di tant timp, la sô liriche mi veve fulminât fin dal principi, ma ancje la prose le cjatavi plene di rigôr e armonie. Mi visarai simpri di cemût che al jere rivât a sintetizâ la storie dal Friûl pal spetacul dai «Cercaluna». Di chel toc di teatri al pues vignî fûr ancjemò un test scolastic di grant nivel. E o ai di dîi graciis par vê vinçût il premi Viareggio, par cont di dut il Friûl. Di vê dimostrât che o sin tiere di poetis e che un popul cence poesie o al è malât o nol esist.
Ma Cappello nus fâs un altri regâl, nus permet di slargjâ il voli su la part dal inteletuâl tal Friûl di vuê.
Intant cheste figure e je cambiade tal cors dai agns: se tal ’900 al jere sempliç savê cui che al podeve jessi incuadrât cun cheste muse, (il mestri, il professôr, l’artist, il critic di art e vie indenant), tal dì di vuê al devente plui dificil. Al somee che ducj a podedin considerâsi cussì. Al baste lâ al Grande Fratello, fevelâ di cuatri monadis che tu finissis sui gjornâi, a fâ l’opinionist.
No je plui duncje la distinzion tra lavôr manuâl e inteletuâl che e fâs la diference, e alore cui sono i inteletuâi e, soredut, chei furlans?
Si podarès dî chei che a studiin, e che, po dopo, de lôr esperience a rivin a fâ un struc di pinsîr che al è pussibil pandi in mût no setoriâl. Par fâ un esempli: Sergio Cecotti al è un fisic teoric, ma al pues dî la sô su tancj argoments, in maniere adate. Un altri esempli ancjemò: Maniacco e Sgorlon a jerin scritôrs che tes lôr oparis no si son sierâts dome suntun argoment specific, ma a son intervignûts sul mont e su la vite.
Pre Gilberto Pressac al jere un espert di musiche, ma cjalait su trops argoments che al à scrit.
Cualchidun al dîs che in Friûl il vêr inteletuâl organic, par dîle cun Gramsci, al è propit il predi. E la storie i da reson, al bastarès nomenâ Biasut, Marchet, Placerean e, insom, Beline.
Chê altre figure no pues no jessi che Pasolini, une vôs isolade in Friûl, refudade dai siei compagns di chenti, sopuartade di chei forescj, ma cussì fuarte di jessi profetiche.
Ce che nus à lassât il poete di Cjasarse e je ancjemò la fonde par il pinsîr di un Friûl braurôs dal so particolarisim, des sôs lidrîs. No dome lis poesiis, la academiute, ma il pinsîr politic su la autonomie.
Tal volum «Trilogjie tormentade» propit pre Toni si domandave il parcè che Pasolini a un ciert pont al veve finît di scrivi par furlan. «Finide un part di vite, la scuvierte di une dimension plui grande par podê jessi let e cognossût, la fuarce dal palaç roman?» Dutis domandis che Beline nol à rivât a rispuindi. Figurâsi jo.
Dome che o sai une robe e o speri intune altre.
Che Cappello al continuedi a jessi l’inteletuâl, onest e franc, che al è cumò, che al continuedi a scrivi e pensâ par furlan, cence suditance viers nissun. Po dopo la vite le decît ognidun par so cont, ma Pier, visiti che il Friûl al à bisugne di poetis. E tu tu sês un grant poete furlan.
DREE VALCIC