Sfuei Mensîl Furlan Indipendent
Archivi de Patrie

EDITORIÂL – La lezion catalane

............

Une desene di canâi televisîfs publics, scuasit ancjetancj cuotidians, sîts internet di informazion che a viazin sui 300 mil contats al mês: a bastaressin chescj trê dâts par capî parcè che chest an il «Seminari di gjornalisim interladin», rivât ae sô cuinte edizion, al à traviersât lis Alps e i Pireneus par confrontâsi cu la situazion dai media par catalan. Une esperience che e à coventât no dome par vê confermis su trops brâfs che a son i catalans (chest lu savevin za), ma massime par capî la mentalitât che e sta daûr a une comunitât cussì seneose di puartâ indevant la sô identitât.
Vie pal seminari, l’intervent che, a dite di ducj, al à entusiasmât di plui e ancje dât informazions une vore origjinâls e utilis, al è stât chel di Vicent Partal, diretôr di Vilaweb, il prin cuotidian par catalan on line nassût tal 1995 e fra i sîts in assolût plui seguîts. La sô lungje relazion, che e à tocjât la nassite di internet in Catalugne, fint a rivâ ae impuartance dai programs tv «a la carta» (viodibii a richieste, n. d. r.), si è sierade cun dai sugjeriments une vore concrets pal svilup dai media des nestris comunitâts: 1) ogni lenghe e varà un avignî te misure che e savarà coniugâsi e massime identificâsi cu la inovazion; 2) par rivâ a fâ chest nol baste l’intervent di une piçule elite, ma al covente il coinvolziment di dute la societât (dongje dai professioniscj, il volontariât al zuie une part impuartante); 3) ogni lenghe, ancje se minorizade, e je in stât di tignî teste al contest globâl, vâl a dî di sei «glocâl»: il mût miôr par fâ vignî mancul ogni prejudizi sul so cont al è propit dimostrâ sul cjamp chestis potenzialitâts.
IMNIS NAZIONÂI A CONFRONT_ A la elencazion a pene fate, si podarès zontâ un altri pont, che naturalmentri Partal al à dât par scontât: la determinazion, il snait, la fuarce di volontât. I catalans, cun di fat, no le àn vude simpri facile. Anzit, a àn vût moments dulà che a àn riscjât pardabon di disparî. A la fin dai agns Cuarante, propit su chestis pagjinis, Pre Marchet al dave scuasit par spaçâts i catalans, tibiâts ben e no mâl di Franco e, pûr tal so pessimisim, al viodeve cualchi sperance pai furlans. Venus chi vuê, invecit, cuntune situazion denantdaûr. E la diference principâl fra Friûl e Catalugne no sta tant o dome tai numars e forsit nancje te identificazion de classe dirigjente barcelonese te lenghe e culture catalanis.
Ancje il Friûl, fin ai prins dal ‘900, al à vût une borghesie citadine (dispès iluminade) che si ricognosseve pal plui te identitât furlane. La diference le à fate il «mût» di intindi la propie identitât: tant che un valôr di par sé (i catalans) o ben tant che un element strumentâl a alc altri (i furlans). Une sotanetât culturâl, chê furlane, che e je stade (fûr che ecezions, tant che il moviment autonomist-indipendentist dal gurizan) la carateristiche de grande part de borghesie furlane che, dopo de Prime Vuere, e à pierdût ogni leam cul teritori. Lu testemonee ancje la diferente reazion dal mont culturâl furlan devant dal Fassisim: in Catalugne cu la creazion di une fuarte dissidence, politiche e culturâl parie; in Friûl cuntune corâl adesion al Regjim fintremai de Societât Filologjiche Furlane. Di fat, l’imni nazionâl catalan (Els segadors) al fevele de difese de libertât de Catalugne; il pseudo-imni nazionâl furlan (che al plasi o no, al è il Cjant de Filologjiche) nus piture come sentinelis romanis dal cunfin todesc e sclâf (a proposit: cuâl cunfin?).
VIERS DE INDIPENDENCE_ Chestis premessis a fasin capî ancje parcè che mentri che in Friûl il moviment autonomist nol conte plui nissune rapresentance politiche, in Catalugne i partîts catalans a àn savût superâ lis fuartis divisions politichis in viste de indipendence. Esquerra republicana de Catalunya (di estreme çampe e al Guvier de Generalitat) e Convergència i Unió (di centri-drete e ae oposizion a Barcelone), adun cun cetancj altris moviments politics locâi (tant che Reagrupament, Verts e piçulis fuarcis di çampe) a àn za tacât a meti in cjamp une schirie di referendums comunâi par domandâ l’indipendence dal Paîs. Il prin a tacâ, ai 13 di Setembar, al è stât il Comun di Arenys de Munt, dulà che i sì a la indipendence a àn rivât al 96%. I prossims referendums, za fissâts pai 13 di Dicembar, a cjaparan dentri ben 103 Comuns e, pe Vierte dal 2010, si calcule che a podaressin lâ a votâ 600 Comuns suntun totâl di 940.
Il dut fi di un procès democratic e pacific, come tal câs de separazion de Cecoslovachie.
William Cisilino

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +