Sfuei Mensîl Furlan Indipendent
Archivi de Patrie

EDITORIÂL – Il luiar che i tocjà lâ fûr de scjaipule

............



Vie par Avost in Friûl a son stadis un biel trop di polemichis su le Sagre dai Osei di Sacîl, par altri une des plui antighis in Europe cui siei 744 agns. I animaliscj, e par prime nuie di mancul che un ex ministri tant che Michela Vittoria Brambilla, a àn protestât par vie che chei puars ucieluts a laressin liberâts de lôr cundizion.
_Par di la veretât al ucielut te scjaipule, e a lis bestiis di cjase in gjenerâl, no i va cussì mâl. Il luiar te sô scjaipule al varà un spazi limitât, ma par altri al cjatarà un bon stâ di temperadure, lûs, e il gustâ simpri pront. E tal câs di malatie, un miedi al so servizi.
_Il nestri luiar, invezit, se al fos libar in nature al varès cefâ par cjatâ di mangjâ, vuardâsi di çuitis e altris che a cirin di mangjâsal, e in câs di malatie, rangjâsi e vonde. Il pat fra om e bestie di cjase al è fat cussì: la rinunzie a une part di libertât in cambi di un bon stâ.
_Di chê altre bande, ancje il paron de besteute al met tante premure e amôr par viodi di jê, par fâle vivi ben. Tancj di lôr a stan plui daûr ae bestie che a la lôr femine, a ‘nt varês cognossût di chei…
_Il nestri luiar, cuntun bon paron, ancje se tu i vierzis la puartute de sô scjaipule nancje nol aprofite par scjampâ: parcè lassâ il sigûr, il bon stâ, par lâ daûr a une libertât che nol sa ce che je?
_Al pues sucedi però che il paron nol sedi plui e alore cheste besteute e ven passade di man a di un altri: un fi, un parint, un amì dongje. O al pues sucedi che une tradizion di famee come viodi di cualchi luiarut o canarin e vegni puartade indevant, ma di bande di un fi che dentri di se in realtât nol à tante voie o che nol vedi capacitât. In curt, il nestri luiar si cjatarà a stâ mâl, e tai câs piês adiriture a patî la fam.
_Ve alore che, tal câs che si cjatàs la puarte de scjaipule vierte, il nestri luiarut, par vivi miôr, nol varà altre maniere che scjampâ e cirî di fâsi une vite in autonomie.
_A rivin ancje chei moments, e magari cussì no al sucêt plui dispès par Sante Scugne che no par une romantiche idee di voie di autonomie. Mi somee che al sedi rivât chel moment, e no par lâ daûr ai animaliscj, ma pe nestre vite.
_E cuissà che chest luiarut ideâl nol sedi adiriture bon di mudâsi in acuile.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +