In chei dîs cà mi è vignût iniment un zûc che o faserin di piçui cun gno fradi e i miei cusins, a cjase di mê none. Une baronade di chês che i fruts a fasin, plui che par tristerie, par une sorte di «curiositât cence dûl».
Mê none e veve une scjaipule grande cun dentri un canarin; un dopodimisdì nô canais, dacuardi, o vierzerin la paurtute. L’intent nol jere tant chel nobil di dâi la libertât ma il gust di viodi une fuide. Il zugut lu vin fat nome un pâr di voltis parcè che la none nus becà e o ‘nt sinterin une sporte. Duncje dopo, vonde. Insome, il canarin al ve un pâr di ocasions ma nol aprofità par fuî.
La Storie (cul S maiuscul, chê dai popui) e je un tic cussì: tant al dipent dal moment li che tu ti cjatis a jessi. Il Friûl tai ultims secui nol à vût tes mans nissune briscule buine: si è simpri cjatât jenfri cumbinazions politichis e economichis che i fasevin cuintri.
Fale i langobarts che i tegnerin cetant a cheste tiare, o cualchi Patriarcje inluminât, no nus è lade masse ben: dongje dal imperi Gjermanic e duncje sot di lui, dongje la espansion de Serenissime e duncje sot di chê, dongje de Austrie tal so plui grant periodi di potence e vie a scugnî ubidî ai mucs, te penisule taliane in plene mode di stâts nazionâi e ju cul «Risorgimento». E, dentri di un stât nazionalistic, la sfortune dal prevalê de vision centralistiche rispiet a chê federaliste e po dopo la sfortune dal fassisim.
Il fondatôr dal nestri gjornâl, Feliç Marchi, la dì de liberazion a Udin – cuant che in vie Vittorio Veneto al metè fûr la bandiere furlane – al pensave che cu la fin dal fassisim finalmentri si sarès podude vierzi une gnove stagjon pai furlans ae insegne di chel che al fò il so slogan: «di bessôi». Purtrop a pene tibiât di une ditature, il Friûl al colà tal mieç de Vuere Frede: deventât l’estrem confin orientâl al veve di jessi il plui talianon di ducj i teritoris talians. Lis aspirazions di Marchi e dai autonomiscj di chê volte a forin contrastadis in dutis lis manieris, e no si fevele nome di cualchi malatie di stagjon come cumò, ma di cjossis plui penzis.
In dì di vuê il periodi al samee gambiât: no sin intun cjanton o sfracheâts jenfri centris di podê ma si cjatìn tal mieç di une Europe che forsit – forsit – e podarès deventâ Europe dai popui. Finalmentri si rive a tirâ flât, stant che la cuarde tor dal cuel dai stâts nazionâi e je daûr a molâsi un tic. La lenghe furlane e rive a chest moment tirant il flât a grops ma e je achi. Adiriture il Friûl al à l’as di briscule di jessi tal mieç dal Ovest svilupât e chel dal Est in svilup.
Ma, magari cussì no, la discussion pe gnove leç sul furlan no nus mostre bielis prospetivis par une autonomie madure, come che e podarès jessi daûr de combinazion storiche. A son propit i sorestants furlans che no difindin la nestre lenghe, che no le calcolin util pal futûr. Come il canarin di mê none, a àn la puarte vierte ma no si inecuarzin. O forsit al è come che a disin dai canarins domestics: a son usâts a vê la mangjative pronte e fûr de scjaipule a muriressin parcè che no son bogns di sostentâsi bessôi. Si pense che adiriture se tu i vierzis la puartute lôr no scjampin, talmentri a son ben usâts a mangjâ e a cjantâ pal paron. Si à di dî a lôr laude, che a son cetant brâfs a sivilotâ e si fasin amirâ par chest.
Par fortune tal cîl furlan a ‘nd è ancje cualchi acuile, che tra l’altri al è il simbul de nestre Patrie. La acuile e à la carataristiche di jessi un uciel che nol svole in trops ma di bessôl, anarchic scuasit, ma potent par vie che al vualme il teritori, lu controle e e sa cjalâ lontan. Come pre Toni, come Feliç Marchi, come Fausto Schiavi, come pre Bepo o pre Checo. Acuilis che a sielzin di svolâ bessolis e no lâ daûr di chel che ur dîs il partît, il trop culturâl, la asociazion. In chei dîs ca nus plâs segnalâ une che si clame Gianfranco D’Aronco. Cumò come cumò si sintin a sberlâ tancj canarins, ma o viodìn ancje cualchidune di chestis che nus mostre il so esempli e la sô grande dignitât.
La dignitât però no je nome des acuilis, ma le varessin compagne i canarins salvadis che a cjantin par sè e no pal paron, viôt chei autoctons des Canariis, fûr de scjaipule. Simpri – come che si diseve – a inecuarzisi che e je vierte…
Dree Venier
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +