Sfuei Mensîl Furlan Indipendent
Archivi de Patrie

ECONOMIE. Puars, la muse platade dal Friûl

............

La cuantitât di int che si cjate intune situazion di privazion materiâl e je dal 6 par cent

Intun dai cines plui biei mai zirâts  in Friûl, “Gli Ultimi” di pre David Maria Turoldo e Vito Pandolfi, si viôt ben che la nestre tiere e à simpri savût ce che al vûl dî jessi puars. Al jere il 1963: ma tai passe 50 agns che a son passâts il boom economic nus à fat crodi che la puaretât e sedi sparide. Isal pardabon cussì? Al è avonde clâr di no, soredut intai ultins agns, par efiet de crisi che dal 2008 no à ancjemò molât di muardi i sghirets de nestre economie. Il numars des aziendis e dai puescj di vore al è colât e cuissà cuant che al tornarà ai nivei di prin.

Stant che dut un sisteme economic al è lât sù pal stec, si fâs pocje fadie a capî che il redit di cetantis fameis al è vignût mancul e no son stadis plui lis cundizions par alimentâsi, curâsi e vivi come prin. E se cheste no volìn clamâle puaretât, al è dut câs un malstâ che al cjape dentri une part penze de societât. Lis statistichis, par no fâi un tuart ae sensibilitât di cheste int, le definissin “esclusion” e “a risi di puaretât”. Tancj di fat si vergognin e nancje a domandin jutori. E alore Eurostat e Istat a van a cjalâ la situazion economiche di cui che al cjape mancul dal 60 par cent de medie dal redit ecuivalent sul teritori. In Europe cussì a risultin in cheste fasse mancul fortunade di popolazion il 9,4 par cent dai citadins. Nol somearès cuissà ce: ma a son plui di 33 milions di personis a cjatâsi in cheste situazion, sù par jù la popolazion di un paîs come il Maroc.

E la Italie? In cheste classifiche e je plaçade al cuint puest, cul 20,3 par cent di puars, daûr di Grecie, Spagne, Lussemburc e Romanie. E no je cuistion dome di vielis o di disocupâts, che – al è clâr – a son une buine part di chest numar. Tal nestri Stât la crisi economiche soredut dal 2008 e à slargjât cence control lis formis di lavôr sotpaiât o precari o cun pocjis oris lavoradis, o cuntune alternance di periodis di ocupazion e disocupazion. E duncje la preocupazion e sta tal nivel simpri plui penç di lavoradôrs che a son a risi di puaretât. Working poor, ju clamin par inglês, parcè che il fenomen al è pardabon globâl, e di fat ancje chenti a son aumentâts une vore tai ultins agns. Al Nord il lôr nivel al è passât dal 4,5 par cent dal 2004 al 6,9 dal 2017: intal stes interval di timp la lôr presince tal centri Italie e je dopleade dal 5,9 al 11,2 par cent. Al Sud si è invezit passâts dal 19,2 al 22,8 par cent: cuasi 1 lavoradôr su 4 al è intune situazion di deprivazion materiâl dulà che nol rive a permetisi bens o servizis che ducj a considerin necessaris. Ma se o lin a considerâ la fasse di redit subite plui alte, chê che e va dal 60 al 80 par cent, la percentuâl di popolazion sul teritori talian che si cjate in dificoltât e devente dal 28,9 par cent.

Ancje par chest i guviers talians a àn dopradis diferentis strategjiis par cirî di judâ cheste int, prin cu la Mia (Misuris di inclusion ative) e po cul Redit di citadinance. Dome il timp al disarà se chestis iniziativis a saran coventadis o no a ridusi il divari jenfri chei che a àn e chei che no rivin adore a vivi in maniere dignitose. Dal sigûr eliminâ la puaretât al è un dai obietîfs plui seris che la politiche e varès di frontâ in chescj agns. E no dome par fâ la caritât, ma par judâ a dâ gnovis prospetivis a cui che in chescj agns lis à pierdudis.

Ma in Friûl cemût ise la situazion? Dal sigûr no sin tornâts ai timps di Turoldo, ma o sin ben inviâts… Il nivel di puaretât relative al è plui bas di chel talian: o sin al 9,3, plui o mancul sul nivel european, ma la fasse che e sta subit parsore (chê dal 60 al 80 par cent di redit median di lavôr) e puartarès la percentuâl al 17,2. La cuantitât di int che si cjate intune situazion di privazion materiâl e je dal 6 par cent (cuintri il 10 di dut il Stât talian). E la situazion si sclarìs ancjemò miôr se o cjalìn i dâts di acès ai servizis. Dome l’1,2 par cent al à une erogazion di aghe iregolâr e mancul dal 5 par cent al à dificoltât a paiâ la lûs: il 6,3 par cent nol rive a paiâ lis scovacis, il 4,2 nol rivarà a onorâ un mutui fat pe cjase. Cetancj di plui, si pues pensâ, ma lis statistichis no lu disin, a rivaran cif e çaf a paiâ l’afit. Il 22,3 par cent al lamente di vê fastidis cui traspuarts sedi pe mancjance di mieçs publics, sedi pal cost di chei privâts. Une famee su 5 no à la conession a internet, ma il digital divide si scurte une vore se o pensìn che dome il 7,5 par cent dai furlans nol à un telefonut.

Par ducj chescj aspiets, il Friûl-Vignesie Julie al à standard plui bogns de medie taliane. Ma se il confront al ven fat cu lis altris regjons dal Nordest, chenti o sin plui puars e o vin mancul puescj di vore. La bande largje pai citadins e pes impresis e je cetant mancul presinte e i servizis a son clopadiçs ancje par chel che al inten refudums e energjie. Par esempli i furlans che no rivin a paiâ il gas e par chest a tornin a brusâ i lens a son cetancj di plui dai venits.

Un discors particolâr si podarès fâlu sui fruts. Se in Italie cuasi 1 frut su 3 al è a risi di puaretât e di esclusion sociâl, in Friûl cheste percentuâl si sbasse al 14,9 par cent, ven a stâi 1 frut su 7. Lu dîs il Grup di lavôr su la Convenzion pai dirits de infanzie che al spieghe che in cheste regjon a son cetancj i minôrs forescj che a son di bessôi. Tal 2018 a jerin il 5 par cent dal totâl talian (629 su 12 mil 457): e ancje se il Stât ju cure, tancj a deventin in curt ireperibii slargjant il numar dai puars di chenti.

Il cuadri piturât des statistichis al è chel di une regjon dulà che 4 su 5 fin cumò si son tignûts fûr de zone di puaretât, ma 1 su 10 al è invezit cjapât dentri e nol rivarà a saltâ fûr de vuate cun facilitât.

Se i puescj di vore no tornaran a cressi, se no si risolvarà il probleme di fâ cressi la economie, la disponibilitât abitative e la accessibilitât dai servizis, il pericul di cjatâsi di gnûf a ce fâ cui “Ultins” al sarà simpri in vuaite. Lu disin ancje i Servizis sociâi dai Comuns e i Centris di scolte de Caritas. Tal 2016 i prins si ocupavin in regjon di plui di 31 mil adults (e un numar di minôrs compagn) cuntun aument dal 11,5 par cent rispiet al an prime e dal 37 par cent confrontât cul 2012. La Caritas invezit e jude a capî di ce int che o fevelìn: il 35 par cent al rivuarde cubiis cun plui fîs e il 30 par cent invezit al è dât di personis che a vivin di bessolis. Sedi lis fameis che i vielis a son in prime linie sul teren de privazion: e la Mia (che e à dât rispuestis a 15 mil e 800 fameis, cuasi 43 mil personis), e je stade la prime soluzion par frontâ cheste situazion. Di fat intai trê agns di aplicazion il 56 par cent dai beneficiaris al è di fameis cun plui fîs, il 34 par cent al è invezit di bessôl. Plui de metât dut câs e à un Isee di mancul di 3 mil euros.

I “Ultins” a son bielzà culì: ma il Redit di Citadinance, che al varès vût di vê un efiet imediât su chest teren, no ur plâs masse. Fin cumò in regjon a son stadis dome 10 mil lis domandis fatis buinis: ma dome 3 mil e 300 a àn vude la pussibilitât di fâ colocuis par un puest di vore, e la strade par meti in sine il sisteme e somee ancjemò lungje. ❚

Walter Tomada

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +