Ogni tant a tornin a saltâ fûr lis propuestis di meti man ae gjeografie dal stât talian e soredut ae articolazion regjonâl. Agns indaûr, tes elementârs, si zuiave ae tombule des regjons di Italie: un biel tabelon cu lis 19 regjons e lis cartelis cu lis provinciis coloradis, une diferente di chê altre, e cul cjâf lûc che al al jere al puest dai numars: 90, come chei de tombule! E pensâ che te prime propueste de Costituzion a jerin 23, ma pôcs dîs dopo il 20 di Dicembar dal 1947 a son 19, par deventâ 20 tal 1963 cuant che il Molise si è dividût dai Abruçs.
Tal mês di Dicembar dal an passât, la Societât Gjeografiche Taliane, storiche associazion cun sede a Rome, fondade tal 1867, e à presentât une propueste che e previôt une gnove gjeografie cun 31 o 36 regjons, poiadis su la fonde che cu la sparizion des provinciis e va pensade une gnove organizazion teritoriâl che, come che al dîs il document, e à di puartâ a un model di regjon eficient, avuâl, di dimension juste, economichementri vivarose, e soredut dongje dai citadins. Il document, une vore articolât, cun tabelis e cjartis tematichis, al pues jessi discjamât dal sît de Societât Gjeografiche www.societageografica.it. No je la prime volte che si fasin propuestis: si visarês des 12 macroregjons de Fondazion Agnelli, dulà che il Friûl al finive insiemi al Trentin-Sudtirôl e al Venit, propueste cjapade sù ancje de Leghe Nord che e pensave di fâ nome trê macroregjons, e – come che o savìn – progjet di gnûf metût in vore cu la propueste de regjon Padanie, firmade ancje de zonte Tondo.
Ma cumò viodìn la propueste une vore interessante, par vie che e fronte une vore di cuistions, cu la idee che une gnove organizazion teritoriâl e aministrative e fasarès sparagnâ une vore di bêçs: 3 miliarts di euros. Ma prin di dut, al va dite che la propueste e je une vere revision dal titul V de Costituzion, cun dut ce che e compuarte. Ma viodìn di dongje la propueste: pal Friûl, te ipotesi di 31 regjons, i confins a restaressin chei di cumò, in chê di 36 e je la ipotesi di scandaiâ cu la int par tirâ dentri ancje il mandament di Puart. Ma lis novitâts a son ancje tai nons di chestis gnovis regjons: la nestre regjon e deventarès Friuli/Iulia, ma altris a cjaparessin nons mai sintûts, gnûfs, o vielis come: del Tanaro, Insubria, Etruria, Salento, Padania est/del Delta, Padania ovest/le città del Po e po dopo le Grandi Torino, Milano, Bologna, Firenze, Roma capitale e vie dilunc. Ma al di là dai nons, par esempli la Friuli/Iulia e ven definide regjon policentriche che e previôt lis comunitâts teritoriâls di Tumieç, Pordenon, Udin, Gurize, la aree metropolitane di Triest e la polaritât urbane di Udin.
Il lavôr si fonde su une ricercje aprofondide e suntune vore di indicadôrs economics, sociâi e teritoriâi come le fuarce di gravitazion, il pendolarisim, e vie dilunc, ma soredut lis gnovis agregazions comunâls a medi rai a àn di vê une fuarte identitât coerente cul teritori. Insome, in pocjis peraulis: i comuns si varessin di meti dongje par dâ vite aes Comunitâts teritoriâls che a son caraterizadis di une base sociâl, economiche e di relazions comunis, e cuntun numar di abitants avonde grant, i centris plui impuartants par popolazion e economie a deventin Polaritâts urbanis e chês ancjemò plui grandis Lûcs metropolitans.
Ce dî: bielis ideis, une vore buinis par vierzi un discors gnûf che al al varà di jessi dal sigûr confrontât cu la necessitât di resonâ ancje ator dai gnûfs coleçs eletorâi… Mi sa che o varìn di fâ tantis tombulis o miôr meti adun un puzzle une vore complicât: ma voaltris ce regjon volêso? Si vierç la discussion: non, confins, teritoris… La ultime robe che o ai voie di sotlineâ e jê che il studi al dîs che cheste gnove regjon Friuli/Iulia(?) e ven fate par: “finalmentri stramontâ la anacronistiche contraposizion tra il Friûl e la Vignesie Julie”… lei par crodi! ❚
Mauro Pascolini
Stin dongje ae Patrie
Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +