Te liste dai prodots agroalimentârs tradizionâi
Cu la resinte XXII revision, inte Liste dai prodots agroalimentârs tradizionâi dal Friûl-VJ (PAT) a son stadis dôs gnovis iscrizions: il Persut di Ruvigne e la Cevole Rosse di Cjavàs, par un totâl di 181 prodots “tutelâts”.
Une risorse alimentâr preziose
La Cevole Rosse di Cjavàs e je une ortaie che la sô culture, fin ai agns ’60 dal ’900, e je stade une risorse alimentâr e economiche preziose par tantis fameis dal lûc. Une volte, lis feminis dal paîs si lassavin di mari in fie lis semencis, e si interessavin di dutis lis fasis de produzion de ortaie, de preparazion des famosis strecis e po dopo de lôr vendite in tancj paîs dal Friûl-VJ. Cu la industrializazion de societât e de agriculture, la produzion de Cevole Rosse si è ridusude a sec, e si è limitade a cuantitâts suficientis dome pal dibisugn familiâr, pierdint cussì la notorietât di une volte. Vuê, però, par contrastâ la omologazion alimentâr simpri plui slargjade, un numar simpri plui grant di consumadôrs al va a cirî lis tradizions rurâls antighis e i savôrs plui saurîts e rampits.
Un bulbi dolç
La Cevole Rosse di Cjavàs e jentre a plen titul intal cont di chestis pomis de tiere – lis cevolis – stant che lis sôs cualitâts organoletichis, la sô consistence e conservazion, il so savôr dolç e delicât che al risalte, le rindin inconfondibile tra lis tantis varietâts esistentis sul marcjât. Si trate duncje di un prodot carateristic, di podê coltivâ dome su cierts terens e cun cundizions climatichis particolârs, che l’ambient da pît des monts pordenonês al ufrìs. La zone di produzion de Cevole Rosse e cjape dentri dut il teritori dal Comun di Cjavàs e dai Comuns confinants. Une aree che si identifiche pe gjeografie tra la fasse culinâr tra i Magredis de alte planure dal Friûl Ocidentâl e lis Prealps Cjargnelis. La altitudin de aree di culture e je tra i 200 e i 400 m s.l.m. La culture de Cevole Rosse si fâs in gjenerâl in orts e piçui tocs caraterizâts di un teren di impast medi, che al tint a disfâsi, ben areât. La esposizion plui juste e je chê soreglade, areade, e a pene in cleve.
I dîs produtôrs de Cevole Rosse di Cjavàs, costituîts inte Associazion omonime, si son impegnâts a condividi la etiche e i principis de biodiversitât, aderint aes regulis di un dissiplinâr di produzion che al impon tecnichis di culture tradizionâls, cul ûs di fertilizantis naturâi. La Cevole di Cjavàs (e chê de Val Cose), Presidi Slow Food dal Friûl-VJ, si semene, o plui dispès si traplante, tacant dai prins dîs di Març, si cjape sù in Avost e po dopo si conserve in strecis dut l’an. Par ce che al tocje il gust, e je tant aromatiche, cuntune dolcece particolâr. Di forme taronde, fracade aes estremitâts in maniere carateristiche, e je par dentri di colôr blanc cun venis rossis; viole cun riflès dorâts intal rivistiment esterni, a maturazion. Par vie dal so cûr crocant e dolç, e je otime ancje di mangjâ crude. Ogni bulbi al à un pês dai 100 ai 150 g, ma a son cevolis che dispès a rivin ancje a 300 g. ❚