E je stagjon di jerbis spontaniis: lin a “fâ spese” pai cjamps

In Avrîl cjapìn sù la sporte e anìn a fâ la “spese” pai cjamps. Sì ma, cemût si fasie? Nô lu vin domandât a Giusi Foschia, zardiniere e artiste furlane nassude intune fazenda in Sud Americhe e cressude ator pal mont, che a Zumeais di Tarcint e à dade vite a une oasi speciâl, il Giardino Commestibile (www.ilgiardinocommestibile.it), li che e coltive, e racuei e e trasforme centenârs di jerbis e rosis di mangjâ. «Chestis plantis a puartin in taule la Primevere, e cul lôr savôr amâr a àn la funzion di depurâ e di riativâ il nestri organisim. Propite par disveânus tant che e fâs la nature in cheste stagjon».
TALE
(Taraxacum officinale)
Plante infestante une vore comun tai nestri prâts, si cjate de mont fin al mâr. E à tancj nons, ma e je simpri jê, cun lis sôs inconfondibilis rosis zalis che daspò de floridure si trasformin in çufs fofs di pei blancs pronts a svolâ vie cul vint: dint di leon, tale, talate. Ma i plui biei a son Pissecjan, che nus ricuarde lis sôs proprietâts diuretichis, e Lidrichesse. Il furlan nus al dîs: si pues mangjâ tant che lidric, intune salate amarotiche aviertane. No dome. «Lis fueis si puedin stofâ in padiele, doprâ intune fertaie o cuinçâ a pene saltadis a la romane cun sardons e ai» e spieghe Giusi. I butui, invezit, si puedin conservâ sot vueli o asêt e doprâ in cusine tant che capars. Des rosutis si pues otignî une sorte di mîl: si cuein a fûc bas cun zucar e aghe e si lasse masarâ. Po si conserve in vasuts e si dopre tant che dolcificant par dut l’an».
URTIE (Urtica)
Cuâl frut no le cognossie e no le ai in asse, cuant che e beche lis gjambis crotis vie pai cjamps e pai terens incults? La urtie, de famee des Urticaciis, plante pôc simpatiche par cheste sô carateristiche, no je gran indigjeste se si à di parâle jù. «La fuee cuete e à proprietâts depurativis: e je buine par fâ i gnocs, par cuinçâ la paste, par fâ la farse dai rafioi, lis tortis saladis, lis fertaiis» e sclarîs Giusi. «Si pues ancje conservâ preparant une creme di dâ sù. La semence invezit e je un ricostituent util: si pues brustulâ intune fersorie e po mangjâ tal jogurt pe gulizion o te mignestre». E sarà ancje antipatiche ma se e je, al è bon segn: «E cres te tiere azotade, dongje lis vecjis stalis o tai cjamps coltâts. Li che si cjate, al vûl dî che il teren al è bon».
AI SALVADI (Allium ursinum)
Al à rosutis picininis e blancjis e fueis largjis e delicadis. Al fâs part de famee des Liliaceis, ma… al sa di ai. «Si cjate tai boscs bande nord, ma par cognossilu si à di jessi un pôc esperts, no si pues improvisâ» e precise Giusi «no si à di confondile cun plantis de stesse famee che a son velenosis». Come, par esempli, il mughet (Convallaria majalis), il lavaçâl (Veratrum album o jerbe dal gomit: ancje chi il furlan nus jude!) e il cidivoc (Colchicum). ❚
✒ Natascia Gargano