E cumò i tocje ae ACLiF di bati un colp…

La cuistion de tabele plurilinguistiche de stazion de ferade di Cividât e je pardabon une polpete invelegnade. Tal sens che no je dome une sviste di RFI che si è dismenteade de leç 482/1999 ma, al contrari, al è un at volût par tornâ a fevelâ de toponomastiche plurilengâl e, se al fos pussibil, di tornâ a rindi evident che meti tabelis stradâls in plui lenghis no i interesse ae int, si spint bêçs publics e si fâs confusion ai forescj che a zirin des nestris bandis.
◆ A conferme di chest al è vignût fûr ancje il pseudo sondaç virtuâl di Mediofriulinews che al domande, in mût gjeneric, se si è dacuardi di gjavâ la toponomastiche bilengâl.
◆ Se o zontìn il fat che a Triest come che a Rome a son i fradis di Italie a guviernâ, che no àn nissune pice pes minorancis linguistichis e nancje pes diversitâts culturâls, alore o podaressin scrupulâ che il fat di vê gjavât chel cartel in trê lenghis nol è propit un câs ma une volontât politiche nete e sclete. Legjitime, pal amôr di Diu, ma preocupante. E palese un tornâ indaûr dai pas di libertât, di identitât, di cussience de alteritât di un popul che al è tal stât talian dome di un secul e mieç incà.
◆ Ancje Lui, il M., il duce ta chei agns al à fat di dut par disvinidrî la identitât di comunitâts che no jerin talianis ancje se a erin dentri tal Stât talian. Pensait dome ai todescs dal Sudtirôl folpeâts no dome dal duce ma ancje dopo de Republiche taliane. O i slâfs de Benecˇija che a son stâts obleâts a cambiâ i nons di persone, bandonâts ancje de Glesie e obleâts ancje a preâ intune lenghe che no jere la lôr. Ma ancje i furlans, lis sentinelis de patrie taliane, che se a scuele a fevelavin par furlan, come che a jerin usâts cjase, a vevin bachetadis su lis mans e no dome. Un vêr gjenocidi culturâl continuât e cometût ancje in timps republicans, tant che il ricognossiment di minorance linguistiche al rive dome dal Dicembar dal 1999, a plui di 50 agns de Costituzion che tal articul 6 e dîs a clâr che “la Republiche e pupile lis minorancis linguistichis”
◆ Vino di tornâ indaûr? Cui aial pôre des diversitâts, cui aial pôre de autonomie speciâl di cheste part di Europe?
◆ E soredut, cuâi sono i anticuarps? Lis difesis di chestis concuistis culturâls, ancjemò piçulis e creis?
No nus pâr di vê viodût manifestazions “catalanis” par denunziâ il fat.
◆ Gjave Gjeremie Gombôs, il “veteropassionari” de furlanetât, cui altri aial fat scjas?
Il president de ARLeF che al à mandât la letare al president Mattarella? No podevial clamâ par telefon il ministri des infrastruturis, che di lui e dipent RFI, che al è dal so stes partît, chel partît che lu à metût alì?
Ma plui di dut: dulà jerie la ACLiF?
◆ Ce aie fat in merit ae cuistion? Rispueste: “Al è dutun su la posizion de ARLeF”. Pont! Dacuardi sul fat che la unitât e fâs la fuarce, ma se la Assemblee de Comunitât Linguistiche Furlane, che e rapresente 150 comuns dulà che si fevele furlan, no cjape posizion cun fuarce su cheste cuistion che e je di competence sô, su ce aie di intervignî? ❚