Sfuei Mensîl Furlan Indipendent
Archivi de Patrie

E cumò i tocje a Cint. Il sindic Gianluca Falcomer: «I citadins a restaran cul Venit dome par fuarce, no par sielte»

............


Gianluca Falcomer, sindic di Cint
Gianluca Falcomer, sindic di Cint

Sapade e je tornade, ma no jere bessole… Anzit, in tancj si dismentein, ma ancjemò doi agns prin dai citadins di Plodn, tal 2006 a jerin stâts chei di Cint a pandi la lôr volontât di passâ in Friûl. Sapade e à spietât pardabon 10 agns, ma achì la situazion e je ancjemò plui grivie e tancj a varessin pierdude la fiducie. Nol è il câs di Gianluca Falcomer, 33 agns, il zovin sindic furlanist di Cint che dal 2014 al è ae vuide de aministrazion e al continue a lavorâ pal passaç di chest Comun dal Venit ae nestre Regjon. Une reson par impegnâsi che e ven di lontan: za di zovin al jere stât segretari dal Moviment furlanist “Dai monts al mâr” e dal 2007 al è consulent de Union dai Comuns talians che a vuelin cambiâ regjon.

Sindic, cemût vêso cjapade la gnove dal trasferiment di Sapade in Friûl?

«Al è clâr che o sin une vore contents pai confradis di Sapade che a son rivâts adore a tornâ a jessi furlans. La int di Plodn e à scombatût in maniere democratiche pai siei dirits e al è simpri impuartant e biel cuant che une comunitât e à sodisfazion ae fin di une bataie di civiltât. No pues platâ dut câs ancje un ciert marum, tant che prin citadin de nestre comunitât, intal viodi che, cuissà par cuale reson, il destin di Sapade al è stât separât di chel di Cint ancje se noaltris o vevin tacât prime la nestre lote, e il nestri referendum al è ancjemò precedent. I doi Comuns a vevin caratars identics, in plene soreposizion, rispiet al rapuart de lôr popolazion cul Friûl inte storie e ore presint».

Ce rapuart vêso cul Friûl?

«O sin leâts a fîl dopli a Siest e Cjons, tant che (al rît, ndr) o podaressin fâ la fusion doman! O vin lâts a mieç cun chescj Comuns, tant che o podìn fevelâ di un sisteme ambientâl integrât. I fruts di Siest a vegnin di simpri intes nestris scuelis, e cussì a cressin ducj cu la stesse educazion e vision di comunitât. E po a son frazions dai nestris comuns che a àn dome un cartel tal mieç che al separe il Friûl dal Venit, ma no si inacuarzarès nissun de diference de int che e sta di ca o di là».

Ma il fat che Sapade e vedi vinçude la sô bataie, rindial la vuestre plui facile? O isal il contrari?

«Dal pont di viste juridic, chel che al è sucedût al vierç une strade: lis resons tecnichis che a son stadis fatis buinis dal Parlament, dal Guvier e de Cort Costituzionâl a son compagnis des nestris, e duncje a varessin di jessi dopradis ancje par Cint. Dal pont di viste politic, invezit, l’afâr Sapade al à scjaldade la atmosfere e dut al dipendarà di ce che a pensaran chei che a laran al Guvier daspò des elezions di Març. Volarano sierâ la partide cul contentin di Sapade? O viodarano di no fâ une scarpe e un çucul, pendant ae disparitât di tratament rispiet a Cint?»

Il procès viers di une plui fuarte autonomie screât di Zaia podaressial convinci i siei citadins a restâ cul Venit?

«I citadins a àn fevelât, e cul Venit a restaran dome par fuarce, no par sielte. Par sigûr ducj a son a favôr de autonomie, e intal Mandament di Puart nô o vin ricognossude la nestre specificitât linguistiche e culturâl de leç regjonâl 16/93. Ciert, la sensazion e je che il Venit al sedi masse peât aes realtât urbanis, di Vignesie a Verone, di Padue a Vicence, di Trevîs a Belum. Pal rest dal teritori a restin i fruçons».

E chei altris Comuns dal Mandament di Puart?

«A stan a cjalâ. A spietin. Se Cint al ves di rivâ a stacâsi dal Venit, chest al sarès ancje par lôr un sburt a lâ indevant in cheste direzion. Cumò a viodin se lis robis si movin: e se a saran spazis di manovre, a fasaran ce che al larà fat…»

La politiche us aie judât o no?

«La grande assente e je stade la Regjon Friûl-Vignesie Julie. L’ultin president che nus à poiât e judât al è stât Illy, dopo ducj cidins, par 10 agns. Massime la presidente Serracchiani, che di vicepresidente dal Pd talian e varès podût movi lis robis cetant di plui. A dan la colpe a Gianclaudio Bressa, il sotsegretari pes autonomiis. Sarà, ma di citadin e di sindic mi spietavi che il vicesegretari dal plui grant partît di guvier al podès contâ plui di un singul sotsegretari».

Tondo?

«Lu ai za dit. L’unic president autonomist che o ai viodût fin cumò al è stât Illy. E no ai voie di dî altri. Al mancje però intal panorame furlan un riferiment furlanist fuart: jo o ai simpri fat cont su Marzi di Strassolt, e la sô pierdite e je grivie. Sperìn che al nassi alc che no si fâsi masse condizionâ des fuarcis di Rome».

Pal avignî? Ce viodial pe sô int?

«Se o passarìn in Friûl, la integrazion cun Siest e Cjons e sarà naturâl. Se o restarìn in Venit tocjarà scombati adun cun dut il Mandament di Puart par vê plui considerazion intai riparts e intai servizis. Fâ lobby, sperant che il volê de int al torni a jessi tignût di cont».

di Walter Tomada

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +