Sfuei Mensîl Furlan Indipendent
Archivi de Patrie

Dut al è partît cun…

............

I precursôrs che a àn vierte la vie ai gnûfs studis su Aquilee

La storie di Aquilee e à dispès patît di une mancjance di analisi “in autonomie”. Ma se vuê o podìn lei une storie “origjinâl “de metropoli Furlane e de nestre Basiliche Mari, il mert al è di cualchi pionîr che al à olsât sfidâ la “Academie”, inviantsi par percors libars.
I prins a son stâts religjôs che a àn vivude chê fortunade stagjon eclesiâl, siore di ferment e di slanç, che si è butade e che e à cjatât gnûf stimul tal Concei Vatican II (1962-1965). Chei ca, a àn savût capî e declinâ in Aquilee chel riclam – che si proclamave chê volte in maniere universâl – ae necessitât di dâ une “storie” ae proprie fede. In gracie de lôr passion, Aquilee no je stade dome ogjet di studis ma e je deventade protagoniste di chei agns di rinassite culturâl in Friûl.
Bons. Guglielmo Biasutti (Forgjarie 8.8.1904 – Udin 23.2.1985)
No si ocupe mai in maniere direte dai mosaics, ma il ritrat moderni de antighe Aquilee cristiane al è merit so. Ae sô precision e va di fat assegnade la intuizion de centralitât aquileiese e la capacitât di une descrizion cussì straordenarie e pûr dal dut di fûr des solitis oleografiis. Biasutti al rapresente par Aquilee ce che Jean Daniélou – autôr dal insuperât «La teologjie dal judeu-cristianisim» – al à rapresentât pe moderne storie des origjins cristianis. Purtrop al à simpri vût un rûl no di prin plan, che di sigûr nol jere stât promovût dal dibatit sientific, par masse timp ancorât a une idee di Aquilee dome tant che  monument archeologjic e storic artistic.
Bons. Enrico Marcon (Monfalcon 7.6.1902 – Palermo 1958)
Al à intuide la necessitât di “decifrâ” i mosaics aquileiês no dome intune otiche storiche artistiche o iconologjiche, ma tignint in considerazion il lôr contignût tant che une tape de storie cristiane aquileiese. Ae fin dai agns ’50, tal studi «La “Domus Ecclesiae” di Aquilee» (1958), al è stât di fat il prin a clamâ in cause il Pastôr di Erma te interpretazion dai mosaics de aule Sud. Purtrop, la sô  muart rivade masse adore, tal indoman de publicazion des sôs primis ricercjis sui mosaics teodorians, no i à permetût di lâ indenant in cheste direzion di ricercje, par altri çoncjade in maniere brutâl sul nassi, dopo la sô muart, di Giovanni Brusin, a conferme des fuartis resistencis che, su chest argoment, ogni novitât e cjatave.
Pre Gilberto Pressacco (Turide di Sedean 19.9.1945 – Udin 17.9.1997)
Par cierts aspiets, al è stât l’erêt di Guglielmo Biasutti, par altris al à rapresentât – e al va indenant a rapresentâ – un gnûf pussibil inizi pe storiografie sul cristianisim aquileiês. Tra i siei numerôs merits, si à di vê indiment dal sigûr la intuizion ecezionâl dal rûl documentari de musiche che e devente testemoni storic. Al à aprofondît, intun straordenari «Viaç te gnot de Glesie di Aquilee» chei leams cun Alessandrie tant cjârs a Guglielmo Biasutti, simpri scoltant lis notis dai Cjants Patriarcjins.
Bons. Gian Carlo Menis (Buie 10.12.1927)
Di interès plui varis, e duncje no impegnât in maniere uniche su lis origjins de Aquilee cristiane, al ricostruìs «La liturgjie batesimâl a Aquilee tal complès episcopâl dal secul IV», intuint il nes di fonde tra il document iconografic e il so ûs tal “spazi” liturgjic. Al cîr ancje di recuperâ dai mosaics de aule Sud «La culture teologjiche dal clericât aquileiês sul tacâ dal secul IV».
Renato Iacumin (Udin 1941)
Al rapresente dal sigûr l’erêt dai plui grancj tra i siei precursôrs. Il gnosticisim e Origjen a son l’orizont dulà inscrivi, secont lui, lis origjins dal cristianesim aquileiês: partint des intuizions dai siei predecessôrs, al aprofondìs dentri di gnovis viis interpretativis i disvilups particolârs de sô ricercje. Al à il grant merit di vê savût cjatâ tai mosaics teodorians un pont di sintesi documentarie ideâl, come che nissun al veve fat prime di lui, di indulà che al partìs par descrivi – une altre volte par prin – un discors unitari.
Christian Romanini

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +