Sfuei Mensîl Furlan Indipendent
Archivi de Patrie

«Il valôr di Aquilee al è vuê, te cussience di une identitât»

Christian Romanini
Gabriele Pelizzari intun dissen di Gianni Di Lena
Grabriele Pelizzari intun dissen di Gianni Di Lena

Interviste cun Gabriele Pelizzari, autôr dal libri “Il Pastore ad Aquileia”, un gnove leture dal paviment musîf de aule sud de Basiliche Mari dal Friûl
Cemût nassie la idee dal libri?
Intune lezion dal cors di Storie dal Cristianisim antîc dedicât al Pastôr di Erma – al jere il 2000 e o jeri ancjemò matricule –, il prof. Cacitti nus à proponude une diapositive de aree ocupade dal panel dal Gjal e de Copasse inte aule Sud. Vint acetât une mê osservazion relative ae partizion gjeometriche di chê zone, il professôr mi à domandât di destinâ une note di pocjis riis che al varès doprât inte recension di “Le porte della salvezza”, un libri di Renato Iacumin: i ai consegnât un scrit di 5 pagjinis. Mi à invidât alore a preparâ un articul curt dilunc de polse estive. Al è stât propit in chel Istât che, aprofondint il studi, o ai isolât chê che o definìs la “triangolazion rete”, o sedi la costruzion di un triangul retangul pontât sul baricentri des figuris principâls dal paviment musîf. O ai clamât entusiast il professôr, comunicantji par altri che lis pagjinis che o vevi butadis jù a jerin sul centenâr: mi visi ancjemò il sconciert inte vôs di Remo Cacitti. In ogni mût, di chês 100 pagjinis al è nassût il percors che mi à puartât ae publicazion dal libri.
Parcè une tesi propit sui mosaics di Aquilee?
Pûr vint visitât di persone la Basiliche di Aquilee dome tant tart, o soi stât cussient daurman de cifre documentarie enorme cjapade dentri intal mosaic teodosian. A incuriosîmi e je stade ancje la sproporzion impressionante tra chest document e i studis relatîfs. Jessint intant lât indevant il gno iter academic, il gno prin studi – che al veve di jessi incentrât dome sul aspiet gjeometric dai mosaics – al è stât ampliât ancje de interpretazion des imagjins, deventant la mê tesi di lauree.

La cuviertine dal libri di Pelizzari
La cuviertine dal libri di Pelizzari

Parcè la aule Sud e no la aule Nord?
In sostance parcè che il mosaic dal aule Sud al esist, intant che il mosaic de aule Nord al è stât comprometût de costruzion dal cjampanili di Popon. La uniche leture plausibile di chel che al reste de aule Nord mi somee che e sedi chê proponude di Renato Iacumin – che al coleghe in sostance il mosaic ae Pistis Sophia –, ma la insuficience de testemoneance musive, insiemi cu la ambiguitât estreme dal test gnostic, no permet di tradusi la ipotesi in tesi. La aule Sud invezit e je complete e, in gracie ancje dal orizont teologjic plui ampli di riferiment, e permet une analisi plui aprofondide e articolade.
Il paviment musîf tant che strument di catechesi: ma cemût nassie cheste idee?
Ae epoche de realizazion dai mosaics, dome une élite cetant limitade e veve acès ae leture des Scrituris e di ducj chei tescj che a costituivin il “fondament” teologjic de proprie comunitât. I mosaics duncje, fissant la catechesi aquileiese midiant di un codiç espressîf acessibil par ducj, cence dibisugne de intermediazion di un letôr, a deventin un “depositum fidei” pal popul, pardabon un manifest, fat disponibil a ducj.
Cuâi sono i indizis?
Cence dubi chei racuelts di Enrico Marcon e, in misure ben plui grande, di Renato Iacumin. Plui in gjenerâl, però, si à di vê indiment i supuescj di metodi fissâts des ricercjis de scuele todescje su la art imperiâl – che si pensi a figuris tant che Tonio Hölscher e Paul Zanker –, strument autentic di propagande istituzionâl dal imperi. Al è stât duncje naturâl pai cristians che a àn vivût in chê volte ricori ancje aes imagjins par comunicâ la lôr fede.
Ce isal il Pastôr di Erma?
Il Pastôr di Erma al è un dai tescj plui antîcs de tradizion cristiane – in maniere sintetiche si pues definî une catechesi leterarie di tenôr apocalitic –, componût par ce che si pues pensâ a Rome viers il 130 e.v. (de ete volgâr, ndr); cuasi contemporani, a volê prestâ fede a cualchi ipotesi resinte, massime statunitens, al Vanzeli di Luche, che la sô datazion si volarès posticipade in maniere nete fin al 110 e.v. Al è stât un scrit tant difondût inte Antichitât – ma la sô fortune no si è studade nancje inte Ete di Mieç –, atestât ancje dal codiç Sinaitic; par tant timp al comparìs tra lis listis dai tescj canonics. Cumò al è daûr a vivi une gnove “Vierte” di studis e di analisi.

Studi sui mosaics di Aquilee
Studi sui mosaics di Aquilee

Cui jerial il so autôr?
Erma – che lis fonts in Antîc a coleghin a Aquilee ricuardant la parintât cun lui dal vescul di Rome, Piu I (al è curiôs che il vescul di Rome al vegni ricuardât pe sô consanguineitât cun “Erma, di origjin aquileiese”, e no vicevierse) – al reste un personaç che la sô biografie e risulte scuasi no cognossude. Par altri viers, cheste notizie – di liende o storiche che si le vueli calcolâ – e conferme il lustri che la Aquilee cristiane e veve di gjoldi inte Antichitât.
Cuâl jerial il rûl di Aquilee tal Cristianesim antîc?
Al è cognossût il rûl de metropoli inte scachiere gjeopolitiche de Antichitât: no tant diviers, inte costelazion des glesiis antighis, al veve di jessi il “pês” de comunitât cristiane locâl. Il probleme di Aquilee al è la resistence a frontâ il studi “in autonomie”; cheste atitudin, insiemi cu la grande prudence che e anime tante part de bibliografie a cheste dedicade, e pues dome che determinâ la perifericitât che e caraterize la memorie di Aquilee inte considerazion dai plui. Ben diviers, invezit, par Antîc: di là di Erma e Piu I, al baste visâsi de stagjon Cromaziane, o de “Letare di Jacum”, preservade intal Cjanul ocidentâl in gracie ancje de valorose difese che e à fate propit Aquilee; par tasê di chel altri grant naufrac, socorût di Aquilee: Origjen, tradusût e tramandât, cundut dal discredit là che al colà.
Dispès si sint a fevelâ di Aquilee tant che “seconde Rome”, ma de sô tesi al somee che nol sedi chest rapuart di subalternitât. Nus spieghial?
Il rapuart cun Rome al è un probleme che si pon cuasi simpri in tiermins che a distradin. No crôt che al sedi mai esistût un sôl cristianisim: fin dal timp dai apuestui, clamâts a misurâsi cuntun anunzi che al savolte, che dal sigûr a àn interpretât e a àn declinât in manieris tant difarentis – che si pensi al cussì clamât “incident di Antiochie” –, lis variis comunitâts cristianis a àn vût di disvilupâsi daûr paradigmis teologjics particolârs, a ben che cuasi simpri compatibii a plen. Vuê la confession catoliche e loghe inte sede romane il propit baricentri: chest risultât, però, al è risultât di un percors milenari, fat pussibil di un sfuarç di aprofondiment cence polse e di comprension di se, che no i son nancje mancjadis, come che si sa, stagjons une vore gravis. In passât a esistevin diviersis comunitâts – tra chestis Aquilee e Rome – che a reclamavin, par lustri e par antichitât, un rûl eminent, ognidune però tacant de proprie identitât autonome. Ancje lis provis di prae-valere su chei altris a jerin cun modalitâts e daûr principis ben diviers di chei che a caraterizin la nestre contemporaneitât.

Aquilee, mosaic cun i "animai impuri"
Aquilee, mosaic cun i

Parcè si isal simpri insistût suntune vision edulcorade e folcloristiche dai mosaics?
Assumi la imagjin tant che “document” e no dome tant che “monument” al è presupuest di metodi avonde resint. Ancje par chest no si pues rabiâsi cun cui che tal passât, basantsi suntun altri metodi sientific, al meteve ae base al propri lavôr altris premessis. I timps a saressin però aromai madûrs par acetâ chest vision inovative, ma logjichis di basse buteghe a smirin vuê a conzelâ il dibatiment. Cun di plui, e je une tindince distradante e cetant odeose chê di ridusi la storie al pinsîr, aes azions, aes decisions des solis élites, come se la umanitât e fos dividude tra une cente minuscule di erois e une enorme, indistinte, masse di vuarps, cjadocs, beotis. A chest, e va zontade une atitudin  difondude al ûs strumentâl de storie: il passât, che al varès di insegnânus cui che o sin, al ven sdrondenât di ca e di là par legjitimâ ce che o crodìn di jessi. Ducj chescj elements si son incagnîts su Aquilee tant che suntune vitime ideâl.
Dispès si fâs il confront cu la realtât di Piazza Armerina, parcè?
Piazza Armerina e je une vile tarde antighe al centri de Sicilie, note pai tancj mosaics presints: la estension complessive e je superiôr dal sigûr al paviment musîf de Basiliche di Aquilee, ma nissune porzion singule di chei mosaics e rive ae imponence dal sôl paviment de aule Sud aquileiese. Il ranc patrizi che le à comissionade al à colocât in chei mosaics un grant manifest ideologjic de ultime stagjon dal paganisim, religio classica. Chest grup monumentâl dispierdût intal cûr de Sicilie, ben vint une rilevance dal dut paragonabil – se no inferiôr – a chê dal complès teodorian, al à rivât a un nivel di cognossince mondiâl. Mês indaûr, par pûr gust, o ai fate une verifiche sperimentâl: intal catalic de biblioteche de Harvard University a esistin 6 titui dedicâts ai mosaics di Piazza Armerina  e nissun a chei di Aquilee, a conferme dal fat che intai lûcs dulà che si cree dibatiment sientific si disvilupe cognossince e turisim.
Il rûl di Aquilee vuê?
Aquilee e je forsit l’unic – e dal sigûr chel plui significatîf – tra i lûcs che o cognòs bon di gjenerâ identitât: al è straordenari il rûl propulsîf, il significât ancjemò atuâl che al ven assegnât di tancj Furlans ai “valôrs” di chescj mosaics. A pet di cheste cussience, forsit ancjemò no maioritarie ma dal sigûr tant fuarte, i mosaics di Aquilee a rapresentin une ereditât preziose, e chest al è un fat râr pardabon. Dopo, al è il daûr de medaie: lis potenzialitâts sientifichis e turistichis di chest lûc no son ancjemò disfrutadis in maniere adeguade.
Cualis sono stadis lis reazions dal mont academic al So studi?
Chei che ur ai sometût il test mi àn dimostrât subit un preseament grandon; par altri, se la mê tesi di dotorât e vignarà publicade, tant o ai di dâ mert a chest libri. Purtrop, la circolazion dificoltose e penalize il dibatit sientific.
Nus comential il passadôr che al passe parsore dai mosaics o la costruzion in muradure poiade al batisteri e screade di pôc?
No vuei limitâmi ai manufats singui che in dut câs, ancje se in divierse misure, no rivi a condividi. Un passadôr tant che chel presint dentri de Basiliche Mari al sarès ideâl par Piazza Armerina che e je un lûc dal passât; ma par Aquilee, ancjemò cussì vive, chest gjenar di intervents al assum i conotâts dal drame. Meti sot di une teche ce che al vîf, al vûl dî copâlu. Se la impuartance de Basiliche e ven confinade intal passât, Teodôr e la sô comunitât a viodaran proclamât il lôr faliment. Pal moment, però, il valôr di Aquilee nol è passât, ma presint inte cussience di une identitât. Ce che o deplori, in fin dai conts, no je cheste o chê soluzion, ma il principi: trasformâ un lûc vivent intun cadavar monumentâl di “netâi vie il polvar” tra lis scansiis di une “vetrinute” museâl.
Christian Romanini

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +