Ducj al mâr ta la splaze dal Friûl: Grau

Cul Istât e il cjalt che al scjafoie, ancje nô furlans o cirìn une polse dal lavôr e par ducj i vacancîrs, ancje dome di une zornade, la mete preferide e reste il mâr. Cuant che però si fevele di Friûl, al è une vore dificil che come prin riferiment si imagjini il mâr. Ma invezit la nestre Patrie e à ancje il mâr, e la splaze dai furlans e je Grau.
Des planuris fin su tes monts, se o domandais a un furlan, us contarà che si vise che fin di piçul lâ al mâr al voleve di lâ a Grau.
La storie de isule e je simpri stade leade cul Friûl, in prin cul patriarcjât e jere colegade a Aquilee e duncje ancje a Çarvignan. Daspò, cu lis bonifichis e la creazion di une viabilitât gnove, la isule si è leade ancje cun Monfalcon.
La isule, ancje se ridusude a un puart pai pescjadôrs, e conserve il so aspiet magnific: dentri des muris e ufrîs al visitadôr la citât viere, cu la sô struture di “castrum” e i tesaurs di architeture paleocristiane tant che la glesie di Sante Eufemie, il Batisteri e Sante Marie des Graciis.
Grau, fin prin che a rivassin i todescs in vacance, e je simpri stade plene di furlans tant che si sint a fevelâ par furlan plui a Grau che no a Udin.
I furlans, soredut anzians, che in prin a frecuentavin la isule in maniere saltuarie, fin che a àn tacat a comprâ cjase su la rive, a son simpri di plui. Dut chest sucès al è stât pussibil ancje in gracie de stazion termâl, de elioterapie e de talassoterapie, che a àn rindût la isule famose par dute la Europe.
Par cui che si intint di storie e lenghe, nol è di dismenteâ che Biagio Marin (1891-1985), un dai poetis plui alts in dut il Nûfcent leterari talian nassût a Grau, al jere iscrit ae Societât Filologjiche Furlane e subit dopo de Seconde Vuere Mondiâl al veve aderît al Moviment autonomist furlan dal nestri Pieri Pauli Pasolini.
Intal graisan, il lengaç de isule, il non di Grau al sune “gravo” che al rive dal latin bas e al vûl dî puart, ancorament.
Duncje Grau, al restarà simpri il puart dal Friûl e ancorament dai furlans. ❚
Moira Pezzetta