Docuscuele, un gnûf imprest impuartant pe scuele in marilenghe

Midiant di un protocol di intese firmât a Udin di Lorenzo Fabbro, president de ARLeF (Agjenzie Regjonâl pe Lenghe Furlane) e di Federico Vicario, president de Societât Filologjiche Furlane, si invie un gnûf imprest impuartanton pe scuele dal Friûl: Docuscuele, il centri di documentazion didatiche pe lenghe furlane. Il gnûf sogjet al è stât presentât ai 22 di Fevrâr cuntun event public in Filologjiche.
Al jere za un prin nucli dal Centri li de sede de SFF a Udin di miâr di publicazions, ma al covente dâ gnûfs stimui e contribûts economics, che ju metarà la ARLeF, par ufrî ancje continuitât ae formazion culturâl, professionâl e linguistiche dai insegnants di lenghe furlane, inviade e disvilupade di tancj ents intai agns passâts. Cumò i docents a podaran vê a disposizion risorsis culturâls adeguadis e ancje materiâi par integrâ e disvilupâ la preparazion iniziâl cul studi e l’impegn individuâl.
«Docuscuele al è un progjet strategjic di politiche linguistiche e di educazion plurilengâl cul fin di meti in rêt progjets e competencis e di creâ ocasions di confront, di inricjiment e di ideazion» al à vût dit il president de ARLeF Fabbro. Vicario al à marcade «la grande sodisfazion di viodi ricognossude la funzion strategjiche dal Centri su la scuele furlane, pont di riferiment pai insegnants impegnâts inte introduzion de marilenghe intai programs formatîfs dai istitûts dal nestri teritori».
Pe assessore regjonâl pal Lavôr, formazion e istruzion Loredana Panariti «il Centri al metarà i insegnants di lenghe furlane intes cundizions di confrontâsi te suaze culturâl e in maniere professionâl cui coleghis de proprie scuele, di altris contescj talians minoritaris e europeans e cun ducj i interlocutôrs interessâts ai problemis de scuele e de educazion».
Ae vuide dal Comitât Sientific, che al varà di coordenâ lis ativitâts e viodi de realizazion dai obietîfs previodûts dal Protocol, al sarà Walter Tomada (che al è ancje nestri colaboradôr, ndr).
Dentri dal Comitât a saran un rapresentant di ognidun dai sogjets aderents, e ancje trê esperts di dissiplinis leadis aes ativitâts dal Centri, nomenâts de ARLeF. ❚
✒ Redazion